ရာၚ်မြဟ် – ကြဴနူဂိတုမာတ်ချ် သၞာံ ၂၀၁၁ ဏံဂှ် ညးတာလျိုၚ် သွာၚ်ပၞာန် ဒပ်ပၞာန်ဗၠးၜး ကောန်ဂကူမန် ၜါတၠ သွက်ဂွံဒေါံဇူ နူဗော်ဍုၚ်မန်တၟိဂှ် ပတိုန်လဝ်လိက် နွံရောၚ်ဂှ် ညးတာလျိုၚ် ဗော်ဍုၚ်မန်တၟိ ဟီုရ။

ဗိုလ်ဇၞော် နာဲဗော် ဃောကေတ်တာလျိုၚ် သကိုပ်ဒပ်ပံၚ် ပ္ဍဲတ္ၚဲကောန်ဂကူမရနုက်ကဵု ၆၃ ဝါ ကွာန်ပလိုၚ်ဂျပါန် ဒေသပွဳူဗဟဵု (ဗီု-ဌာန်ပရိုၚ်ဗၠးၜးမန်)

“ပတိုန်လဝ်ဂှ် နွံကွေံ၊ ဆဂး နကဵုဗော် ဟွံကဵုအခေါၚ်ဇူဏီပုဟ်၊ ဒးကလေၚ်သဳကၠဳမံၚ်ဏီ၊ အတိုၚ်ပ္ဍဲလိက် ညးတံ ပတိုန်လဝ်ဂှ်တှေ် ဟိုတ်နူပရေၚ်ခက်ခုဲပူဂဵုကဵု ပရေၚ်ထတ်ယုတ်ညးတံတုဲ ညးတံ အာတ်အခေါၚ်ဒေံါဇူဏောၚ်” သာ်ဝွံ ညးလျိုၚ်ဆက်ဆောံဍုၚ်သၟာၚ် နာဲဟံသာဗိုန်ခိုၚ် ဟီုရ။

ညးပတိုန်လိက်ဒေါံဇူ ၜါတၠတံဂှ်ဝွံ ဒု-လျိုၚ်ဌာနက္ဍိုက်ပ်ပၞာန်  ဒု-သ္ကိုပ်ဗိုလ်ဇၞော် နာဲဇၞူဆာန် ကေုာံ သကိုပ်ဒပ် ပွိုၚ်ဍုၚ်ကျာ်ပိ ဗိုလ်ဇၞော် နာဲဗော်တံ မဒှ်ရ။

“ပတိုန်လဝ်လိက်ဂှ် နူဂိတု မာတ်ချ် ၂၈ တေံ၊ ဆဂး နူကဵုဗော် ကဵုအခေါၚ်ကီု ဟွံကဵုအခေါၚ်ကီုဂှ် ဟွံကလေၚ်ကဵု ပရိုၚ်ဏီပုဟ်၊ ဟိုတ်နူခက်ခုဲ ပရေၚ်ပူဂဵု ရံၚ်အာပရေၚ်ဘဝကောန်ၚာ် အဓာန်ဂတတေံတုဲ ဒးအာတ်အခေါၚ်ဒေံါဇူ၊ ပရေၚ်တၞဟ်ဟ်ဂှ်တှေ် မွဲသာ်လေဝ် ဟွံမွဲပုဟ်” သာ်ဝွံ နာဲဇၞူဆာန် ဟီုရ။

နာဲဇၞူဆာန်ဝွံ နူသၞာံ ၁၉၇၉ ဂှ် စလုပ်ကၠုၚ် ဗော်ဍုၚ်မန်တၟိတုဲ ပ္ဍဲသၞာံဂှ်ဟေၚ် ဒေံါဇူလဝ် မွဲချိုန်ခဏရ။ ပ္ဍဲသၞာံ ၁၉၈၇ ဂှ် ကလေၚ်လုပ် ဗော်ဍုၚ်မန်တၟိတုဲ စဵုကဵုအခိၚ်ဒေံါဇူဏံ ယိုက်ဂၠေၚ်ကၠုၚ် တာလျိုၚ်ကဆံၚ်ဆံၚ် ဟွံသြုၚ်ရ။

ကိုပ်ကၠာနူဟွံအာတ်အခေါၚ် ပတိုန်လိက် ဒေံါဇူဏီဂှ် ကေၚ်ယိုက်ဂၠေၚ်ကၠုၚ်တာလျိုၚ် သကိုပ်တမ်ဒပ် လၟိဟ် (၇) တုဲ ဃောကဆံၚ်ဌာနန္တရတိုန် ဒု-လျိုၚ်ဌာနက္ဍိုက်ပ်ပၞာန် ကိုပ်ကၠာနူဟွံဂွံယိုက်ဂၠေၚ်ဏီဂှ် အာတ်အခေါၚ်ဒေံါဇူရ။

ကြဴနူသၞာံ ၁၉၉၅ ဒေံါပန်ပှော်တုဲဂှ် လပါ်သွာၚ်အုပ်ဓုပ် ကမ္မတဳကေၚ်ကာဗဟဵု ၂ တၠ၊ ကမ္မတဳဗဟဵု ၈ တၠ၊ လပါ်သွာၚ်ပၞာန် သကိုပ်ပၞာန် ၁ တၠ၊ သကိုပ်ဗိုလ်ဇၞော် ၃ တၠ၊ ဒု-သကိုပ်ဗိုလ်ဇၞော် ၁ တၠ ကေုာံ သကိုပ်ဗိုလ် ၃ တၠတံလေဝ် ကေၚ်အာတ်အခေါၚ် ဒေံါဇူလဝ် နူဗော်ဍုၚ်မန်တၟိကီုရ။