မိလျးထဝ် – ပ္ဍဲဍုၚ်ကျာ်ပိဂှ် ဝိုၚ်ဝေၚ် ဒှ်ဆက်မံၚ်တုဲ ကမၠတ်ကၠတ် ကွဳလိုန်ဓါတ် ကေုာံ ကပေါတ်တၞဟ်တၞဟ်တံကီု ရဲပၠံၚ်ကွဳလိုန်ဓါတ်တံကီု ဂၠိုၚ်ကၠုၚ်မံၚ် ရိုဟ်ရိုဟ်တ္ၚဲရောၚ်ဂှ် ကောန်ဍုၚ်ကျာ်ပိတံ ဟီုအိုတ်ရ။

လောန်ကၠုၚ် နူၜါဂိတုတေံတုဲ စဵုကဵုအခိၚ်လၟုဟ် ညးတာလျိုၚ် အလဵုအသဳတံ ပံက်မံၚ်ဝိုၚ်ဝေၚ်တုဲ အောန်အိုတ် ဝိုၚ် (အနီထောၚ်) ၜိုတ် ၁၀ ဝိုၚ်၊ ဝိုၚ်ဒဵုလာ် ၜိုတ် ၅၀ ဝိုၚ် နွံမံၚ်ရိုဟ်ရိုဟ်တ္ၚဲရ။ သအာၚ်နူဂှ်ပၠန် ဝိုၚ်ဖေဝ်၊ ဝိုၚ်စာၚ်၊ လံၚ်ပေဲါဗဝ်တံလေဝ် နွံရ။

“ကောန်ၚာ် ပၠိုၚ်ပၠိုၚ် အာယုက် ၜိုတ် ၁၂ – ၁၃ တံဂှ်တှေ် ဗက်ဖံက်သ္ၚိတုဲ ကၠတ်ကပေါတ် ဂၠိုၚ်ကွေံ၊ ရပ်ဂွံမံၚ် မွဲနှေံမွဲနှေံ၊ ဆဂး ရဲကၠတ်ကွဳလိုန်ဓါတ် ရဲပၠံၚ်ကွဳလိုန်ဓါတ်တံဂှ်ရ ရပ်ဟွံဂွံ” သာ်ဝွံ ကောန်ဍုၚ်ကျာ်ပိ နူအရာပ် ၃ မွဲတၠ ဟီုရ။

ပ္ဍဲအရာပ် ၃ ဂှ် မပ္တံ စက်ဇြဳဒဳ၊ တဳဗဳ၊ ကွဳလိုန်ဓါတ်တံဂှ် ကၠေံမံၚ်ဇၟာပ်တ္ၚဲတုဲ ကွဳလိုန်ဓါတ် ဗၠာဲသၟိၚ်တံလေဝ် ကၠေံမံၚ်ကီုရောၚ်ဂှ် ညးဆက်ဟီုရ။

ဟိုတ်နူဂၠာဲကမၠောန် ဝါတ်ဂါတ်ကီု၊ ဟိုတ်နူကြပ်ကဵု အခိၚ်ဂၠံၚ်ကွဳစက်ကၟာတ် ဂၠံၚ်ဍာ် ဟွံပံက်ဏီတုဲ ကမၠောန်ကၟိတ် ဟွံမွဲဏီဂှ်ရ ညးစိုတ်လုပ်စကဵု ဝိုၚ်ဝေၚ်ဂၠိုၚ်တုဲ ဒ္ဂေတ်ပဋိပတ်မၞိဟ် လီုလာ်ကၠုၚ် ဂၠိုၚ်ရောၚ်ဂှ် သၟာပရေၚ်ပိုန်ဒြပ် လတူဍုၚ်ကျာ်ပိမွဲတၠ ဟီုရ။

ပ္ဍဲဝိုၚ်ဝေၚ်တံဂှ် ညးဝါတ်ဒိုက်တံကီု ကောန်ၚာ်တံကီု ညးဗြဴတံကီု ဂွံဆဵုကေတ်တုဲ လဆောဝ်မ္ဂး ဂွံဆဵုကေတ် သီုခမဳသၚ်တံရောၚ်ဂှ် ညးဆက်ဟီုရ။

“မၞိဟ်ဗြဴလ္ၚဵုတံဂှ် မုဟိုတ်တြံုတၠသ္ၚိဇကု ဂွံဝေၚ်ရော ဟီုတုဲ ညးတံလေဝ် ဗ္တောန်ဝေၚ်တိုန်ကီု” သာ်ဝွံ ညးဟီုရ။

သအာၚ်နူဂှ်ပၠန် ကမၠောန် ဝေၚ်္ၚၚ်လံၚ်သြန် (ပန်းသီးပုံး) ဂှ် လတူဍုၚ်ကျာ်ပိ မၞုံၜိုတ် ၅၀၀ စေဝ်တုဲ မွဲစေဝ်မ္ဂး မွဲဂိတု ဒးကဵုအကံက်ကဵု အလဵုအသဳတံ ၅၀၀ ၜါတ်ရောၚ် ကောန်ဍုၚ်ကျာ်ပိမွဲတၠ ဆိၚ်ဆရ။

ထ္ၜးဟိုတ်ကဵု သြန်ဗွဝ်တုဲ နူဂိတုဖေဖဝ်ဝါရဳ ၂၃ စဵုဂိတုအိုတ်ဂှ် သကိုပ်ဗျူဟာ သကိုပ်ဗိုလ်ဇၞော် တိၚ်ဇြဝ် နူ (စကခ ၈) ပံက်ကၠုၚ်ဝိုၚ်ဝေၚ် ပ္ဍဲဖလာတ်တက်ဂံက် ယှိုဲတံၚ်ကျာတုဲ နူဂိတုမာတ်ချ် ၈ စဵုစိုပ် ဂိတုအေဗရာဂှ် ထ္ၜးဟိုတ်ကဵု ဂၠာဲသြန်ဗွဝ် ပလေဝ်ကျာ်တုဲ ကျာ်ဇၞော်ဝါအနာၚ် က္ဍိုက်ပ် ထပ်ပံက်ကၠုၚ် ဝိုၚ်ဝေၚ်ပၠန်ရ။

ၜိုန်ရကပေါတ် ကၠေံဂၠိုၚ်ကၠုၚ်မံၚ်ကီုလေဝ် ဟိုတ်နူညးတာလျိုၚ် အလဵုအသဳတံ ပံက်လဝ် ဝိုၚ်ဝေၚ်ဂှ်ရ ညးဍုၚ်ကွာန်တံဂှ် ဟွံဂံၚ် ဟီုပတိုန်ထ္ၜးကဵု ညးတာလျိုၚ်တံရောၚ်ဂှ် သၟာပရေၚ်ပိုန်ဒြပ် လတူဍုၚ်ကျာ်ပိမွဲတၠ ဟီုရ။