Categories
ပရိုၚ်

ဗစူပတူ ဂတဵုမုက်တ္ၚဲကောန်ဂကူမန် မရနုက်ကဵု ၆၅ ဝါ

မာံသုတ – ဂတဵုမုက်ဗစူတိ တ္ၚဲကောန်ဂကူမန် မကၠောန်ပတိတ် နူကမ္မတဳ ကၠောန်ဗဒှ် တ္ၚဲကောန်ဂကူမန် မရနုက်ကဵု ၆၅ ဝါဂှ် ပတူဗစူမံၚ် ပ္ဍဲဒေသတွဵုရးမန်နာနာအိုတ်ရ။

ပ္ဍဲဂိတုဖေဖဝ်ဝါရဳ ၈၊ သၞာံ ၂၀၁၂၊ သက္ကရာဇ်ဍုၚ် ၁၃၇၃၊ မာ်မွဲစွေက်ဂှ် ဒှ်တ္ၚဲကောန်ဂကူမန် မရနုက်ကဵု ၆၅ ဝါရ။

“ပဝ်သတာဗဳနာၚ် ကၠံပြၚ် ပရးလဝ်တုဲယျ၊ အစဳအဇန် ဇကုကၠောန်သ္ပဂှ်လေဝ် ချူကဵုလဝ် ပ္ဍဲပဝ်သတာဂှ်ရ။ ကေတ်အဆက်ကဵုအဲ တိုက်ရိုက်တုဲ ကၠုၚ်ကေတ်ဗဳနာၚ်မာန်မံၚ်” သာ်ဝွံ နာဲမေန်မေန်နဲ မဒှ်ညးလျိုၚ်လလောၚ်ပရိုၚ်ကေုာံ ဆက်ဆောံ၊ ကမ္မတဳကၠောန်ဗဒှ် တ္ၚဲကောန်ဂကူမန် မရနုက်ကဵု ၆၅ ဝါ (ဗဟဵု) ဟီုရ။

ၚုဟ်ဗဳနာၚ်ဂှ် ၁၅ ပေ× ၁၀ ပေ (၃၇၅၀၀) ဒကေဝ်၊ ၁၂ ပေ× ၈ ပေ (၂၄၀၀၀) ဒကေဝ်၊ ၉ ပေ× ၆ ပေ (၁၃၅၀၀) ဒကေဝ် မဒှ်ရောၚ်ဂှ် ညးဆက်ဟီုရ။

ပရူပရာပဝ်သတာ ဂတဵုမုက်ဗစူတိ သၞာံဏံဂှ် ဓမံက်ထ္ၜးလဝ် ပရူဂၞကျာ်မတ္တမ ဃောတန်တဴမံၚ် ပ္ဍဲဍုၚ်ဒုအ်ဝေါပ် (Duwop) တေံ ချူပုတ်ကှေ်လဝ် လိက်တၟံမန် ၂၃ ပၞောန် ပ္ဍဲဂိုဟ်ကအ်ဂေါန် မၞုံဇရေၚ်ဍုၚ်ဖာအၚ်ဂှ်ရ။

အဓိပ္ပါယ် ပဝ်သတာ တ္ၚဲကောန်ဂကူမန် သၞာံဏံဂှ် “ကျာ်ပဋိမာရုပ်ဝွံ အဲ မဒှ် (ဂၞကျာ်) မတ္တမဂှ် ဃောတန်တဴမံၚ် ပ္ဍဲဍုၚ် “ဒုအ်ဝေါပ်(Duwop)” ပုတ်လဝ်ရောၚ်။ ကျာ်တိကဵုတၟံ ၜိုတ်နွံတံဂှ် အဲကဵု ကောန်ကွးအဲတံဟေၚ် ပုတ်လဝ်ရောၚ်။ ကျာ်တၟံတံဂှ် ကဵုအာစာတၞဟ်တံ ပုတ်လဝ်ရောၚ်” သာ်ဝွံ ထမံက်ထ္ၜးလဝ်ရ။

ပၞောဝ်ပွိုၚ်ဍုၚ် ၁၀ ပွိုၚ်ဍုၚ် မၞုံပ္ဍဲတွဵုရးမန်ဂှ် သအာၚ်နူပွိုၚ်ဍုၚ်ၜဳကလေၚ်တုဲ ပ္ဍဲပွိုၚ်ဍုၚ်တၞဟ်တၞဟ်တံဂှ် ဒက်လဝ်ကမ္မတဳကၠောန်ဗဒှ် တ္ၚဲကောန်ဂကူ ကဆံၚ်ပွိုၚ်ဍုၚ်၊ ကဆံၚ်ကွာန်တံရ။

တုပ်တဴသာ်ဂှ်ကီု ပ္ဍဲပွိုၚ်ဍုၚ်ကအ်သံၚ်၊ ဗိက်၊ ဍာ်ဗု မၞုံပ္ဍဲရးတၞၚ်သဳကီု၊ ပ္ဍဲပွိုၚ်ဍုၚ်ကျာ်ပိ၊ ဗြဝတဳ၊ ကအ်ကြိအ် မၞုံပ္ဍဲတွဵုရးကရေၚ်ကီု ဒက်လဝ်ကမ္မတဳ ကဆံၚ်ပွိုၚ်ဍုၚ်တုဲ ပ္ဍဲဍုၚ်လ္ဂုၚ်၊ ဗဂေါ ကေုာံ ဍုၚ်မာန္တလေဝ်တံလေဝ် စဳဇန်မံၚ် သွက်သ္ဂောံကၠောန် တ္ၚဲကောန်ဂကူမန်ရ။

စၚ်တ္ၚဲကောန်ဂကူမန် (ဗဟဵု) သၞာံဏံဂှ် ကၠောန်ဗဒှ် ပ္ဍဲကွာန်ကအ်ဗိန် ပွိုၚ်ဍုၚ်ကအ်ကြိက် တွဵုရးကရေၚ်ရောၚ် ဂွံတီကေတ်ရ။

သကိုပ်ဝန်ဇၞော် တွဵုရးမန်လေဝ် စဳဇန်မံၚ် သွက်သ္ဂောံပလံၚ်လိက်သဝဏ် တ္ၚဲကောန်ဂကူမန်ရ။

ပ္ဍဲကမ္မတဳ ကၠောန်ဗဒှ် တ္ၚဲကောန်ဂကူမန် မရနုက်ကဵု ၆၅ ဝါ (ဗဟဵု) ဂှ် ကလေၚ်ရုဲစှ်လဝ် နဒဒှ်ဥက္ကဌ ဒံက်တာမေန်ကျဳဝေန်၊ နဒဒှ်ဒုဥက္ကဌ နာဲပါန်အေ၊ ဒံက်တာမေန်သဵုလေန်၊ ဒံက်တာမေန်လွောန်တေန်၊ နာဲလွောန်အံၚ် ကေုာံ နဒဒှ် ညးအုပ်ကာနာနာ မာံဝဏ္ဏကျဳတံရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.