ပ္ဍဲကဵုပ္ၚံက်ပရေၚ်ဍုၚ်ကွာန် သၞာံ ၂၀၁၁ တုဲကၠုၚ်တေံ ဟိုတ်နူပရေၚ်ပြံၚ်သၠာဲတအ် ပြဟ်ပြေဟ်တဴဗွဲမလောန်တုဲ ဂကူမန်ပိုဲတအ် ဗက်ဟွံဂတာပ် ဒှ်ကၠုၚ်ရ။ ဆဂး ပရေၚ်ပြံၚ်သၠာဲတအ်ဂှ် ဒှ်ဒၟံၚ် လ္တူဍုၚ်သၟးရောၚ်တုဲ ပ္ဍဲကဵုရးဒေသဂမၠိုၚ်တအ် မုလေဝ်ကွေံကွေံကြာန်န် ပြံၚ်သၠာဲဒၟံၚ်ဂှ် ဟွံဂွံဆဵုဏီ ညးဍုၚ်ကွာန်တအ် ဟီုဂးတဴအိုတ်ရ။
ဍာံမံၚ်ရ။ ပ္ဍဲကဵုလ္တူဍုၚ်လ္ဂုၚ်၊ ဍုၚ်မာန္တလေဝ်၊ ဍုၚ်ဇၞော်နေပျဳတဝ်တအ်ဂှ် လိက်ပရိုၚ်ဘာသာဗၟာဂမၠိုၚ်တအ် ချူဇန်ဒၟံၚ်ပရိုၚ် ကေုာံ လိက်ပရေၚ်တအ် ဗွဲမသၠးပွး နွံရ။ လိက်ပရိုၚ်တအ်ဂှ် ဂွံအခေါၚ်ချူပရိုၚ်ပရေၚ်ချဳဒရာၚ် က္ဍိုပ်သ္ကိုပ် ”ဗော်ဒဳမဝ်ကရေဇြဳကောန်ဂကူ” (ဗော်အေန်အေဝ်ဒဳ) ”ဒဝ် အံၚ်သာန်သုကျဳ” တုဲ ပရိုၚ်အကာဲအရာတၞဟ်ဟ်တအ် ဗွဲမဂၠိုၚ် ဂံၚ်ချူကၠုၚ်ရ။
ညးသၟတ်လ္ၚဵုတအ်မ္ဂး နရန်တၟအ်သ္ပစၟတ်သမ္တီ အဃောခမဳသၚ် ထ္ၜးဆန္ဒတုဲ ပ္ဍဲကဵုဂိတုအံက်တအ်ပါ (၂၀၁၁) ဂှ် ညးလ္ၚဵုတအ် တိတ်ဂၠံၚ် ထ္ၜးဆန္ဒရ။ ပ္ဍဲဍုၚ်ဒဳမဝ်ကရေဇြဳမွဲဂှ် အခေါၚ်ထ္ၜးဆန္ဒနွံတုဲ ညးလဵုမွဲလေဝ် ဟွံရပ်ညးထ္ၜးဆန္ဒတအ်ရ။ ဟိုတ်ဂှ်ရ နူကဵုကၠတ်ထဝ် ဓမံက်ထ္ၜးကၠုၚ် သၞောတ်ဝ် ကဵုအခေါၚ်ကုညးဍုၚ်ကွာန်တအ် သွက်ဂွံထ္ၜးဆန္ဒ ဗွဲမသၠးပွးရ။
လၟုဟ်မ္ဂး၊ ဟိုတ်နူကဵုအမာတ်ကောန်ဍုၚ်အရၚ်တအ် ပတိုန်ထ္ၜးတုဲ နူကဵုကၠတ်ထဝ်ဂှ် သဳကၠဳကၠုၚ် ပရူသၟာဗ္ၚတအ် ဂွံပိုၚ်ပြဳတိဗ္ၚနွံရ။ ဆဂး သၞောတ်ဝ် ဥပဒေချိုတ်တ်ပၠိုတ်တ်မွဲသာ်ဂှ် ဍေံဟွံတိတ်ကၠုၚ်ဏီ။
အခေါၚ်အရာဒဳမဝ်ကရေဇြဳ မံက်ဂတဝ်ကၠုၚ်ညိညိညည သာ်ဏအ် ဂှ် ဂကူမန်ပိုဲ ထေက်ကဵုဒးစကာလေပ်တုဲ အခေါၚ်အရာတအ်ဏအ်ဂှ် ဒှ်အခေါၚ်အရာသဇိုၚ် သွက်ကံကုသဵုဂကူမန်ပိုဲ ပိုဲတအ်သ္ဂောံဖန်က် ကေတ်ရောၚ်။ လတူအခေါၚ်အရာ မံက်ဂတဝ်ကၠုၚ်သာ်ဏအ်ဂှ် ပိုဲတအ် ဒးကေံဇေဈာပ်လေပ်ရောၚ်။
ကိုပ်ကၠာအိုတ် စပ်ကဵုအခေါၚ်အရာချူဇန်ဟီုဂး၊ တက်တရးဗွဲမ သၠးပွးဂှ်တုဲ ဂကူမန်ပိုဲတအ် ဒးစကာလေပ်ရောၚ်။ ပ္ဍဲကဵုဗွိုၚ်ဂကူပိုဲတအ်ဂှ် သွက်ဂွံဒက်ခၞံပ္တိုန် ဂကောံမဳဒဳယာဂကူမန်တအ်တုဲ ပ္ဍဲအရာဓမံက်ထ္ၜး ပတိတ်ပရိုၚ်ပ္ဍဲဒေသမန်နာနာ၊ နကဵုဘာသာမန် သီုကဵုဘာသာဗၟာဂှ် ပၟိက်ဇၞော်ရ။ ဘာသာဗၟာဂှ် ဂကူဗၟာတအ်ကီု၊ ဂကူမန်ဟွံလေပ်လိက် မန်တအ် ဂွံအခေါၚ်ဗှ်တုဲ တီကၠိုဟ်ကၠုၚ် ပရူဂကူမန်မာန်ရ။
ပ္ဍဲကဵုမွဲကာလ ဒေံါပန်ပှော်တုဲဂှ် ဂကူမန်ပိုဲတအ် ဒးဆောံလေၚ်အာ တိကၠအ် ဗွဲမဂၠိုၚ်ရ။ ဒပ်ပၞာန်ဗၟာတအ် ဖျေံဒပ်ပၞာန် ပ္ဍဲကဵုဒေသရေဝ် ကေုာံ ဍာ်ဗုတုဲ သီကေတ်ထောံတိကၠအ်ရ။ သၟာဗ္ၚဆောံလေၚ်လဝ် တိကၠအ်တအ်ဂှ် ထေက်ကဵုဒးကောံညးသ္ကံရ။ အခိၚ်ကာလအလဵုအသဳကီု ကၠတ်ထဝ်ကီု သ္ၚဳဂၠိပ်ဒၟံၚ်ပရူတိကၠအ် ဆောံလေၚ်တအ်ဂှ် ဗော်ပရေၚ်ဍုၚ် ကွာန်မန်တအ် ထေက်ကဵုဒးထ္ၜလဘာ် သၟာဗ္ၚတအ်တုဲ ထေက်ကဵုဒး ဂၠာဲဓရ်ဍာံ သွက်ညးတအ်ရောၚ်။
လၟုဟ်မ္ဂး စပ်ကဵုအခေါၚ်အရာ ဒက်ပတန်ဂကောံဗွဲမသၠးပွးဂှ် မံက် ဂတဝ်ကၠုၚ်တၟာဂလိုၚ်ကီုရ။ အ္စာဘာ၊ သၟာဗ္ၚ၊ သၟာကမၠောန်၊ အ္စာဂဥုဲ၊ အ္စာပရိုၚ် (သၟာပရိုၚ်) သၟာပရေၚ်ပိုန်ဒြပ် ပ္ဍဲကဵုဒေသမန်တအ် ထေက်ကဵု ဒးဒက်ပတန်ပ္တိုန်တုဲ သွက်ဂွံချဳဒရာၚ်အာ ဗွဲမသၠးပွးတုဲ ဒတုဲအာဂုဏ်ဖဵု သွက်ဂကူမန်မာန်မ္ဂး ခိုဟ်အိုတ်ရောၚ်။
သရုပ်မိက်ဂွံဟီုဂှ်ဝွံ အတိုၚ်အခေါၚ်အရာမံက်ဂတဝ်ကၠုၚ် ပ္ဍဲကာလပစ္စုပ္ပန်ဏအ်ဂှ် သၟာပရေၚ်ဍုၚ်ကွာန်တံကီု ဂကောံကၠောန်ၜိုတ်ဒၟံၚ် ပရေၚ်မၞိဟ် (ဝါ) ဂကောံမှာဇန်တံကီု ညံၚ်ဂွံကေံဇဈာပ်ကေတ် အခေါၚ် အရာတအ်ဏအ် ဗွဲကိုပ်ကၠာတုဲ ကံကုသဵုဂကူမန် မန်တအ်ညံၚ်ဂွံဖန်က် ကေတ်မာန်ဂှ် ဒးဆက်လုပ် အာပေါဲဗတိုက်ရောၚ်။
0 Comments