မာံတဵုလွဳ – ၜိုတ်ကရိုက်ဇကုမာန် ဂွံအခေါၚ်ခဲါဗကောဝ်တုဲ ညးဒေသကေုာံ သၟာကမၠောန်ဆုဲပြံၚ် မၞုံပ္ဍဲပွိုၚ်ဍုၚ်ကျာ်ပိ တွဵုရးကရေၚ်တံ ပရေၚ်စသုၚ်မံၚ်စံၚ် ပြေပြံၚ်ကၠုၚ်ရောၚ်ဂှ် ဂွံတီကေတ် နူသၟာကမၠောန်ခဲါဗကောဝ်တံရ။
သ္ပပ္တံ နူဂိတုနဝ်ဝေမ်ပါ၊ သၞာံ ၂၀၁၁ ဂှ် ကုမ္ပဏီခဲါဗကောဝ်တံ ကဵုအခေါၚ် ခဲါဗကောဝ် ၜိုတ်ကရိုက်ဇကုမာန်ဂှ်တုဲ သၟာကမၠောန် ခဲါဗကောဝ်တံ ပြေပြံၚ်ကၠုၚ်အိုတ်ရ။
“သၞာံကၠာတေံဂှ် ညးဒေသတံ၊ သၟာကမၠောန်ဆုဲပြံၚ်တံ ဟွံဂွံအခေါၚ် လုပ်ကၠောန် ဒၞာဲခဲါဗကောဝ်ဂှ်ပုဟ်။ လၟုဟ် မ္ၚးနူဒၞာဲခဲါဗကောဝ် ကုမ္ပဏီဂှ် ဗီုညးကဵုညး ခဲါကၠုၚ်ဗကောဝ် ဂွံတုဲ ဒၞာဲဇကုဒးစိုတ်ဂှ် သွံဂွံမံၚ်” သာ်ဝွံ ညးမသွံရာန်ဗကောဝ် နူကွာန်မာကသ မွဲတၠ ဟီုရ။
ဟိုတ်နူဂွံအခေါၚ်ခဲါဂှ်ရ သၟာကမၠောန်ဆုဲပြံၚ် ကၠောန်ကမၠောန်တ္ၚဲ နူကွာန်မာကသ၊ ဇံၚ်ကွဳ၊ စောဝ်ဇဗၠု ကေုာံ ကွာန်ပွဳပွူ ပွိုၚ်ဍုၚ်ကျာ်ပိတံ ကၠောန်ကၠုၚ်ကမၠောန် ခဲါဗကောဝ်ဂှ် အိုတ်ရ။
ဂအာၚ်ခဲါဗကောဝ်ဝွံ အကြာပွိုၚ်ဍုၚ်ကျာ်ပိကဵု ပွိုၚ်ဍုၚ်လှာဒကှ် မၞုံနူစၟတ် ၁ စဵုစၟတ် ၆ တုဲ ဂအာၚ်ခဲါ ၜိုတ်ကရိုက်ဇကုမာန်တံလေဝ် မၞုံဗွဲမဂၠိုၚ်ရ။
သွက်သ္ဂောံဂွံ အခေါၚ်ခဲါဗကောဝ်ဂှ် ကုမ္ပဏဳပတိတ်ဗကောဝ် ဇြဲက္ၜၚ် ကေုာံ ကုမ္ပဏဳဗၟာ၊ ကုမ္ပဏဳသေံတံကီု ကေအေန်ယူတံကီု ကဵုကၠုၚ်အခေါၚ်ရောၚ်ဂှ် သၟာကမၠောန် ခဲါဗကောဝ် နူဂအာၚ်ခဲါဗကောဝ် စၟတ် ၁ နာဲနာၚ်ဝေန် ဟီုရ။
“ဗကောဝ်ဇကုခဲါလဝ်ဂှ် သွံပ္ဍဲဂအာၚ်ခဲါဗကောဝ်ဂှ်လေဝ် ဂွံ၊ ဟွံသေၚ်တှေ် သွံပ္ဍဲကျာ်ပိလေဝ် ဂွံ၊ ဗကောဝ်မွဲရိုက် ၅၀ ကဳလဵုဂှ် သွံပ္ဍဲဂအာၚ်ခဲါတှေ် ဂွံ ၆၀၀ ၝာတ်၊ သွံပ္ဍဲကျာ်ပိတှေ် ဂွံၜိုတ် ၁၀၀၀ ၝာတ်၊ ၚုဟ်ဍေံကွာမံၚ်” သာ်ဝွံ နာဲနာၚ်ဝေန် ဟီုရ။
သွက်ညးခဲါဗကောဝ် အလုံအိန်ထံၚ်တံဂှ် သြန်လုပ်ခိုဟ်တုဲ ပြေပြံၚ်မံၚ်ကီုလေဝ် ဟိုတ်နူပရေၚ်ထိၚ်ဒဝ် ပရေၚ်ထတ်ယုက် ဟွံမွဲတုဲ ကာလဂိယဲမ္ဂး ဆဵုဂဗ အခက်အခုဲ ဂၠိုၚ်ရောၚ်ဂှ် မိစပေဝ် မဒှ်သၟာကမၠောန်ညးဗြဴ နူဂအာၚ်ခဲါဗကောဝ် စၟတ် ၃ ဂှ် ဟီုရ။
ၜိုန်ဂှ်လေဝ် သွက်ညးဒေသတံကဵု သၟာကမၠောန်ဆဵုပြံၚ်တံဂှ် ဒှ်အထံက်အပၚ်တုဲ ပြေပြံၚ်မံၚ်ကီုရောၚ်ဂှ် မိစပေဝ် ဆက်ဟီုရ။
ဗကောဝ် တိတ်နူဒေသပွဳပွူကျာ်ပိဂှ် ပၠုပ်လပါ် အပ္ဍဲဍုၚ်ဗၟာလေဝ် နွံတုဲ သွံပတိတ် လပါ်ဍုၚ်သေံလေဝ် နွံကီုရ။