Categories
ပရိုၚ်

ဗော်ကျဖောအ်တံ ကဵုလှုဲတုဲ စကာကဵုစုတ်မာဲကီုလေဝ် ဟွံဇၞးမာဲ

စၠန်ထဝ် – ပေဲါရုဲမာဲအကြာ မကၠောန်ဗဒှ် အေပရဴ (၁) တေံဂှ် ပ္ဍဲပွိုၚ်ဍုၚ်မတ်မလီု သွက်သ္ဂောံဂွံမမာဲဂၠိုၚ် ဂးတုဲ ဗော်ကျဖောအ်တံ ကော်နၚ်ညးဍုၚ်ကွာန်ကဵု ကောန်ဂကောံဗော်ညးတံ နူဒေသနာနာတုဲ ကဵုလှုဲ စကာကဵုစုတ်မာဲကီုလေဝ် ဟွံဇၞးကၠုၚ်မာဲရ။

သ္ဂောံဂွံမမာဲဂၠိုၚ်ဂှ် နူကဵု ဗော်ကျဖောအ် ကော်နၚ် ကောန်ဂကောံညးတံကဵု ညးဍုၚ်ကွာန် နူတွဵုရးဍုၚ်မန် (၉) ပွိုၚ်ဍုၚ်ရောၚ်ဂှ် ကောန်ဍုၚ်ဇြပ်ဗု ညးမပါလုပ် ရီုဗၚ်လဝ်မွဲတၠ ဟီုရ။

“မွဲပွိုၚ်ဍုၚ်တှေ် နွံၜိုတ် (၁၀၀) တၠဏောၚ်၊ သွက်ဂွံဘိုၚ်ရီုကဵု ရုၚ်မာဲနာနာကီု၊ တုဲတှေ် မၞိဟ်သောၚ်တှေ် ဂွံဘိုၚ်စုတ်ကဵုမာဲကီု” သာ်ဝွံ ညးဟီုရ။

ကၠာဟွံစိုပ် တ္ၚဲပေဲါရုဲမာဲဏီ ပ္ဍဲဂိတုမာတ်ချ် (၃၀) ဂှ် ကော်ပကောံလဝ် ရဲဒေသကဵု ကောန်ဂကောံ ဗော်ကျဖောအ် နူတွဵုရးဍုၚ်မန် ပွိုၚ်ဍုၚ် ကျာ်ထဝ်၊ ၜဳကလေၚ်၊ သဓီု၊ ပံၚ်၊ မုဟ်ဍုၚ်၊ ဇြပ်ဗု၊ ရေဝ်၊ ပွိုၚ်ဍုၚ်ၜါသွာၚ်တံတုဲ ကဵုဇူတဴလဝ် ပ္ဍဲဘာလကျာ် ဍုၚ်မတ်မလီုရောၚ် ဂွံတီကေတ်ရ။

တ္ၚဲပေဲါရုဲမာဲအကြာဂှ် ပ္ဍဲရုၚ်မာဲမွဲရုၚ်မ္ဂး ကောန်ဂကောံကျဖောအ် ညးမကၠုၚ် နူပွိုၚ်ဍုၚ်နာနာတံ ၜိုတ် (၄/၅) တၠ မၚ်မံၚ်ဇရေၚ်ရုၚ်မာဲတုဲ သ္ပပတောံ ဘိုၚ်ရီုဗၚ်ကဵု ညးမကၠုၚ်စုတ်မာဲတံဂှ်တုဲ အခိၚ်မၞိဟ်သောၚ်ဂှ် ဂစာန် ခရက်စုတ်မာဲကဵု ဗော်ကျဖောအ်တံရောၚ်ဂှ် ဥူကုိုဝ်ကိုဝ်ဇြဝ် မဒှ်ညးတာလျိုၚ် လလောၚ်တြး နူဗော် NLD ဟီုရ။

“မၞိဟ်ဍေံတံ ဗလးလဝ်ဂှ် ဍေံတံ ဂစာန်မံၚ် ဂွံစုတ်မာဲကီုရ၊ ဒၞာဲရုၚ်မာဲလ္ၚဵုဂှ်တှေ် ဍေံတံ ဂွံစုတ်ကီုလေဝ်၊ ဒၞာဲလ္ၚဵုဂှ်တှေ် ညးတာလျိုၚ်ရုၚ်မာဲတံ ဟီုဗျိဏာလေဝ် နွံမံၚ်ကီု” သာ်ဝွံ ဥူကိုဝ်ကိုဝ်ဇြဝ် ဟီုရ။

ကောန်ကွာန်ကွိက်ဝါန် နူပွိုၚ်ဍုၚ်မုဟ်ဍုၚ်မွဲတၠဂှ်လေဝ် “ရဲကွာန်ပိုဲ (၂၀) တၠ သွက်ဂွံရီုဗၚ် ဟီုဟဂှ်တုဲ ဂကောံကျဖောအ်တံ ကၠုၚ်ဒုၚ်ဏာ၊ မၞိဟ်အာဂှ်တှေ် မၞိဟ်မွဲ ဍေံကဵုလှုဲ (၃၀၀၀) ဒကေဝ်” ဟီုသာ်ဂှ်ရ။

ကောန်ဂကောံ ဗော်ဒဳမဵုကရေဇြဳ အလုံရးမန် ပွိုၚ်ဍုၚ်ၜါသွာၚ် မွဲတၠဂှ်လေဝ် “နူပွိုၚ်ဍုၚ်ပိုဲဏံ ကောန်ဂကောံဍေံတံ ဇၟာပ်ဇၟာပ်ကွာန် အာရီုဗၚ်ကဵု ဍေံတံ၊ ပ္ဍဲကွာန်ပိုဲဂှ် ပါအာ (၂) တၠ” ဟီုသာ်ဝွံရ။

နကဵုဗော်ကျဖောအ်တံ ဂစာန်မံၚ် နာနာသာ် သွက်သ္ဂောံဂွံ လၟိဟ်မမာဲဂၠိုၚ်ကီုလေဝ် ပ္ဍဲဍုၚ်မတ်မလီုဂှ် ဗော်ဂဥုပ်ဒဳမဵုကရေဇြဳ ကောန်ဂကူ NLD ဂှ် ဇၞးအာမာဲရ။

တွဵုရးဍုၚ်မန် ပွိုၚ်ဍုၚ်မတ်မလီုဂှ် ဗော် NLD ဂွံအာမမာဲ လၟိဟ် (၇၁၄၈၀) မာဲ၊ ဗော်ကျဖောအ်ဂှ် (၁၉၆၄၈)၊ ဗော်ဒဳမဵုကရေဇြဳ အလုံရးမန်ဂှ် (၄၈၂၄)၊ ဗော် တစည ဂှ် (၂၀၈၂) မာဲရ။

ပွိုၚ်ဍုၚ်မတ်မလီုဂှ် မၞိဟ်ဂွံအခေါၚ်စုတ်မာဲ မၞုံလၟိဟ် (၁၅၈,၃၂၁) တၠတုဲ လၟိဟ် (၉၈,၀၃၄) တၠဟေၚ် ကၠုၚ်စုတ်မာဲရောၚ် နူရုၚ်ဗော် NLD ဍုၚ်မတ်မလီု ဟီုပတိတ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.