စၠန်ထဝ် – လိက်ဂျာနေဝ် “သံလွၚ်တိုၚ်း(မ်)” ဖျေံလဝ်သဇိုၚ် ပ္ဍဲတွဵုရးဍုၚ်မန် ဍုၚ်မတ်မလီုဂှ် တ္ၚဲဏံ (ဂိတုမေ ရ) စတြးပတိတ်ရ။
အပ္ဍဲတွဵုရးဍုၚ်မန်သၟးဟွံက ဆေၚ်သွံလိက်ပတ်ပ္ဍဲဍုၚ်လ္ဂုၚ်တေံလေဝ် ပလံၚ်ဗစိုပ်ကဵုဒၟံၚ် လိက်ဂျာနေဝ်ရောၚ် ဂကောံအေဝ်ဒီတာ လိက်ဂျာနေဝ် “သံလွၚ်တိုၚ်း(မ်)” နာဲမေန်မေန် ဟီုရ။
လိက်ဂျာနေဝ် “သံလွၚ်တိုၚ်း(မ်)” ဝွံ စပ်ကဵုပရေၚ်တွဵုရးဍုၚ်မန် မကတဵုဒှ်ဒၟံၚ် ပရေၚ်ပိုန်ဒြပ်၊ ပရေၚ်မၞိဟ်၊ ပရေၚ်ပညာ၊ ပရေၚ်ထတ်ယုက် ကေုာံ ပရေၚ်ဍုၚ်ကွာန်နာနာတံဂှ် နကဵုဘာသာဗၟာဟေၚ် အလန်ကၠာအိုတ် တြးပတိတ်လဝ်ရ။
မုက်လိက် (၃၂) မုက်ပါလုပ်တုဲ လၟိဟ်ကၞပ် (၃၀၀၀) အုပ်၊ မွဲကၞပ်မ္ဂး (၅၀၀) ဒကေဝ် တြးသွံကဵုဒၟံၚ်ရ။ အကာဲအရာလၟုဟ် ပ္ဍဲတွဵုရးဍုၚ်မန် ပွိုၚ်ဍုၚ်သဓီု၊ ၜဳကလေၚ်၊ ကျာ်ထောဝ်တံဂှ် ဟိုတ်နူညးစၞးသွံပတိတ်ဂျာနေဝ်ဟွံမွဲတုဲ ဟွံဂွံတြးဏီဂးရ။
တွဵုရးကရေၚ်ကဵု ရးတၞၚ်သဳတံဂှ် ဟိုတ်နူညးစၞးခါန်ကၞက်လဝ် ညးစၞးတြးလိခ်တံဟၟဲဏီတုဲ အလဵုညးတံ ဒပလံၚ်ဗစိုပ်ကဵု ဆေၚ်လိက်ဂျာနေဝ်တံရ။
တန်တဴကဵု ဆေၚ်ဖျာသွံလိက်ဂျာနယ်တံ ဒုၚ်တဲလိက်ဂျာနေဝ် “သံလွၚ်တိုၚ်း(မ်)” တုဲ ဂိတုဂတဏံမ္ဂး ထပ်ပဵုပတိတ်အာရောၚ် နာဲမေန်မေန် ဟီုရ။
သွက်ဂွံစၟဳစၟတ်လိက်ဂျာနေဝ် “သံလွၚ်တိုၚ်း(မ်)” တုဲ ဌာနစၟဳစၟတ်လိက်ပတ်အလဵုအသဳတံ တးပဲါထောံ ပရောပရေၚ်ဍုၚ်ကွာန်ညိညနွံကီုရောၚ် နာဲမေန်မေန် ဆက်ဟီုရ။
လိက်ဂျာနေဝ် “သံလွၚ်တိုၚ်း(မ်)” ချူဇန်လဝ်ဂှ် ၜိုန်ရစိုတ်လုပ်စမံၚ်ကီုလေဝ် စိုပ်ကဵုမအခဝ်တံ ဗၠေတ်ဗၠေၚ်မှာရာစှေ်မံၚ်ညိညနွံကီုရောၚ် ပူရိဿတ်ညးဗှ်လိက် နူဍုၚ်မတ်မလီု မိမိုဝ်မိုဝ် ဟီုရ။
မိမိုဝ်မိုဝ် ဂှ် “ပရိုၚ်စပ်ကဵုတွဵုရးမန်တံ ပါဂၠိုၚ်မံၚ်တှေ် တၟော်ကဵု လိက်ဂျာနေဝ်တၞဟ်ဟ်တံတှေ် ပဵုတုဲစိုတ်လုပ်စဂၠိုၚ်မံၚ်ညိ၊ တုဲတှေ် ပရိုၚ်စုၚ်နူကဵု လိက်ပရိုၚ်တၞဟ်ဟ်တံဏီ၊ ဆဂး မအခဝ်ဒၞာဲပၟိက်ဇၞော်တံ လ္ၚဵုဂှ်မလိက်ဗၠောတ်နွံမံၚ်” သာ်ဝွံ ညးဟီုရ။
လိက်ဂျာနေဝ် “သံလွၚ်တိုၚ်း(မ်)” ဝွံ ပ္ဍဲသၞာံ ၂၀၁၂ ဂိတုမါတ် ၃၁ ဂှ် ဂွံလဝ်အခေါၚ်ပတိတ်လိခ် နူကဵုဌာနစၟဳစၟတ်လိက်ပတ်အလဵုအသဳတံရ။
ညံၚ်ဂွံပတိတ်အာ နကဵုဘာသာမန်မာန်ဂှ် အာတ်မိက်လဝ်ကီုလေဝ် ဟွံဂွံအခေါၚ်ဏီဂှ် ဂအုပ်ညးဒါန်လိက် နာဲဆာန်တိ ဟီုရ။
ပ္ဍဲဂကောံ လိက်ဂျာနေဝ် “သံလွၚ်တိုၚ်း(မ်)” ဂှ် ဂအုပ်ညးဒါန်လိက် နာဲဆာန်တိ မဒှ်တုဲ၊ ညးလျိုၚ်အေဝ်ဒဳတာ မာံအံၚ်ဇေ၊ ဂကောံအေဝ်ဒဳတာဂမၠိုၚ်ဂှ် မာံရာဇာ၊ မာံအံၚ်ထူ ကဵု နာဲမေန်မေန်တံ နွံရ။