မာံသုတ – နဒဒှ်ပရေၚ်ချဳဒရာၚ် စဵုဒၞာကူသာန်မၞိဟ်တုဲ ကောန်ဂကောံ Freedom to Walk ၜိုတ် ရ၀ တၠတံဂှ် နူဍုၚ်ၜၚ်ကံက် ဍုၚ်သေံ စဵုစိုပ်ပယျဵုကျာ်ပိ ပံၚ်ကောံကွာ်ဂၠံၚ် ပွိုၚ် ၁၅ တ္ၚဲတုဲ ပ္ဍဲဂိတုနဝ်ဝေမ်ပါ ၁၇ အခိၚ်ဒေါဝ်တ္ၚဲဂှ် အာစိုပ်ဒတုဲရ။
ဂၠံၚ်ကွဳစက်ကာ နူပယျဵုကျာ်ပိ စဵုစိုပ်ဍုၚ်ၜၚ်ကံက် မၞုံဇမၠိၚ် ၃၇၀ ကဳလဵုမဳတာဂှ် ပ္ဍဲအရာကူသာန်မၞိဟ် ဒှ်ဂၠံၚ်အဓိကမွဲရောၚ် မိက်ဂွံကဵု မၞိဟ်ဂမၠိုၚ် စွံအာရီုတုဲ မဒးသ္ပပရေၚ်ချဳဒရာၚ်ဏံရောၚ်ဂှ် ကောန်ဂကောံ Freedom to Walk မွဲတၠ ဟီုရ။
“ပရေၚ်ချဳဒရာၚ်ဏံဂှ် တၚ်ရန်တၟံ နွံမံၚ် ပိကဆံၚ်။ သွက်ဂွံစဵုဒၞာ ပရေၚ်ကူသာန်မၞိဟ်ဂှ် ဂွံသြန်ထံက်ပၚ်ဂၠိုၚ်ကၠုၚ်။ မွဲပၠန်ဂှ် ကောန်ဂကောံပိုဲကဵု ညးပါလုပ်ချဳဒရာၚ်တံ တီဂၠိုၚ်ကၠုၚ် ပရေၚ်ကူသာန်မၞိဟ်။ အခိၚ်သဝ်တ္ၚဲ ဒေံါဇူတုဲ ကၠောန်သ္ပပေဲါသဳကၠဳတှေ် မိဿဟာဲနာနာ နူဂၠးတိတံ ညးတံပါ်ပရအ် ပရေၚ်ဆဵုဂဗညးတံ” သာ်ဝွံ ကောန်ဍုၚ်သေံ မၞုံယၟု TANNY မဒှ်ကောန်ဂကောံ Freedom to Walk ဂှ် ဟီုရ။
ဂကောံကွာ်ဂၠံၚ် Freedom to Walk ဏံဂှ် ကဵုဒါန်ထံက်ပၚ်မံၚ်ကဵု ဂကောံချဳဒရာၚ်မံၚ် အစဳအဇန် ဗတိုက်ပလီု ပရေၚ်ကူသာန်မၞိဟ်ဂမၠိုၚ် မပ္တံကဵု ပ္ဍဲဍုၚ်သေံမ္ဂး DREAM House၊ ပ္ဍဲဍုၚ်ဂါနာ တိုက်အာဖရိကတေံမ္ဂး IOM၊ ပ္ဍဲဍုၚ်ယူရောပ်ဗၟံက်မ္ဂး La STRADA International၊ ပ္ဍဲဍုၚ်အမေရိကာန်မ္ဂး POLARIS PROJECT ကေုာံ ပ္ဍဲတိုက်အမေရိကသၠုၚ်ကျာမ္ဂး FUNDACION AMAUTA တံရ။
“ပ္ဍဲပရေၚ်ချဳဒရာၚ်ဏံ ဂွံဒဝ်ဠာ ၜိုတ်မွဲကိုဋ်ဏောၚ် စၟဳကေတ်လဝ်။ ဆဂး လၟုဟ်ပိုဲဂွံဒဝ်ဠာ မွဲကိုဋ်ၜါလက်တုဲယျ” သာ်ဝွံ TANNY ဆက်ဟီုရ။
ပ္ဍဲအစဳအဇန် DREAM House မပံက်လဝ် ပ္ဍဲပယျဵုသေံ-ဗၟာဂှ်မ္ဂး ရံၚ်စံၚ်လွဳပရာလဝ် ကောန်ကၠၚ် ၜိုတ် ၄၀ တၠတုဲ ထံက်ပၚ်မံၚ် မပ္တံကဵု ပရေၚ်စသုၚ်မံၚ်စံၚ်၊ ပရေၚ်ဗ္တောန်ပညာတံကီုရ။
ပ္ဍဲဍုၚ်ဗၟာဂှ် နူဂိတုဂျာန္နဝါရီ စဵုစိုပ်ဂိတုဂျူလာဲ ပရေၚ်ကူသာန်မၞိဟ် ကတဵုဒှ်ကၠုၚ် ၁၅၄ အမှုတုဲ ကေတ်ကၠုၚ်အရေဝ် ကုညးကူသာန်မၞိဟ် ၂၆၆ တၠ နကဵုအမှုစဵုဒၞာ ပရေၚ်ကူသာန်မၞိဟ်ရောၚ်ဂှ် ဂွံတီကေတ် အတိုၚ်ဓမံက်ထ္ၜးလဝ် ပရိုၚ်ကူသာန်မၞိဟ်တံဂှ်ရ။
ပ္ဍဲအရာဗတိုက်ပလီု ပရေၚ်ကူသာန်မၞိဟ်ဏံ ညးဗြဴ ကေုာံ ကောန်ၚာ်တံ တတ်ကၠောံပယျဵုတုဲ ညံၚ်ဟွံဂွံဒှ် ပရေၚ်ကူသာန်လိၚ်ဂှ် ညံၚ်သ္ဂောံတေၚ်လဴမာန် နကဵုအလဵုအသဳဗၟာ ချူဓမံက်လဝ် ဂၞန်ဖုန်ကာတၟေၚ် နကဵုဂတဵုမုက် (ပဝ်သတာ) ပ္ဍဲရး ကေုာံ တွဵုရးနာနာရ။