မၚ်မွဲ – အတိုၚ်အစဳဇန် ကိုန်စဳရေၚ်ပညာဥတုကညၚ် “ဝေပုလ္လသိပ္ပံ” ပ္ဍဲကဵုစၟတ်တ္ၚဲ (၂၅-၅-၂၀၁၃) ဂိတုပသာ် (၁) စွေက်ဂှ် ကၠောန်ဗဒှ်ပံက်ဏာဘာဒါန်ပညာ ဥတုကညၚ် ပွိုၚ်မွဲဂိတု ပ္ဍဲဘာသာသနာဝေပုလ္လာရာမ ကွာန်ကအ်ခပုၚ် ပွိုၚ်ဍုၚ်မုဟ်ဍုၚ်ရောၚ် ဂွံတီကေတ်ရ။
ဗီု ပဵုသတာ အစဳအဇန် ဘာဥတုကညၚ် ‘ဝေပုလ္လသိပ္ပံ’
ပ္ဍဲကဵုတန်ဗ္တောန်ဝွံ နဒဒှ်အ္စာတန်ဗ္တောန်ဂှ် သၚ် (၅) ဇကု ကေုာံ ခရှ် (၁) တၠ ပါလုပ်ဗ္တောန်မံၚ်ကဵုတုဲ နကဵု လၟိဟ်ကွးဘာ (၁၆၀) တၠပြၚ်ၚ်၊ အပ္ဍဲဂှ် သၚ် (၆၀) ဇကု၊ ခရsှ် (၁၀၀) တၠတံ ကတ်ဗ္တောန်ဒၟံၚ် တန်ဗ္တောန်ခမ်ပျူတာ၊ ဘာသာ သေံ ကေုာံ ဘာသာအၚ်္ဂလိက် မၞုံ (၄) က္ဆံၚ်အိုတ်ရောၚ်ဂှ်လေဝ် ဂွံတီကေတ်ရ။
“ကောန်ဂကူမန် နွံပ္ဍဲကွာန် ရးဋ္ဌာန်ဒေသအတေံဏံဂမၠိုၚ် ကဆံၚ်ပညာ၊ လညာတ်ညာဏ်ဂတာပ်ခေတ် ညံၚ်သ္ဂောံ တတ်ၜက် အကြာကောန်ဍုၚ်အရၚ် ကေုာံ သီုမွဲအလုံဂၠးတိမာန် ရန်တၟံတုဲ ဂကောံသၚ်မန် ဂကောံသၚ်မန် ကလေၚ်စဴ နူဗ္တောန်ပညာ တ္ကအ်သိၚ်ဃဵုဂမၠိုၚ် ပံက်ကောံညးသ္ကအ်တုဲ ပံက်တန်ဗ္တောန် ဥတုကညၚ်ဝွံရ။ ကောန်သၚ် သၟတ်၊ ကောန်ကွာန်သၟတ်၊ ကွးဘာသၟတ်တံဂမၠိုၚ် စပ်ကဵုဘာသာအၚ်္ဂလိက် ခမ်ပျူတာ ညံၚ်ဂွံဒှ်အာသ္ဇိုၚ်ကီု၊ နူသ္ဇိုၚ် ညံၚ်ဂွံဆက်ပၠအာဂတတေံမာန်ကီု ဗွဲဒဒှ်သ္ဇိုၚ် ဗွဲဒဒှ်ကဵုဂၠံၚ်နဲကဲတုဲ သၞာံဏံ စပံက်ဗ္တောန်လဝ်ရ” သာ်ဝွံ ညးတာလျိုၚ်တန်ဗ္တောန်ဂှ် သ္ဂးရ။
ပ္ဍဲကဵုဘာတန်ဗ္တောန်ဝွံ သၚ်မအံၚ်လဝ် တန်ဇၞော်ကီု၊ ခရှ်ဘာတုဲလဝ် ဂမၠိုၚ်ကီု စပ္တံတံ ပါလုပ်တုဲ တန်ဗ္တောန်ဘာသာ အၚ်္ဂလိက်ဂှ် မွဲတ္ၚဲမ္ဂး ပွိုၚ် (၅) နာဍဳကီု၊ ခမ်ပျူတာဂှ် မွဲတ္ၚဲမ္ဂး ပွိုၚ် (၂) နာဍဳကီု၊ ဘာသာသေံဂှ် ပွိုၚ်မွဲနာဍဳကဝက်ကီု သာ်ဝွံ ကဆံၚ်ၚ် ပါ်လဝ်အခိၚ်ဗ္တောန်နွံရ။
“ကွးဘာဂှ် နူပွိုၚ်ဍုၚ်မုဟ်ဍုၚ်သၟးဟွံသေၚ်၊ ပွိုၚ်ဍုၚ်တၞဟ်ဟ်တံလေဝ် ပါလုပ်ကၠုၚ် ကတ်လ္ၚတ်မံၚ်ကီုရ။ ဒၞဲါမံၚ်ကီု ပရေၚ်စသုၚ်ကီုဂှ် ဟွံဒးဂွိၚ်မွဲသာ်ရ။ ကျာ်ဇၞော်အ္စာဘာဏံ ညးစွံစေတနာတုဲ သွက်စသုၚ်မံၚ်စံၚ် ပရေၚ်အုပ်ဓုပ် ကောပ်ကာဲသီုဖၟိုတ် ညးကေတ်လဝ်လျိုၚ်ရ။ ပိုဲတအ် ဂွံအခေါၚ်ကတ်လ္ၚတ်ဗီုဏံဂှ် သွက်ပိုဲဂုဏ်ဖဵုနွံတၟာဂလိုၚ်၊ တုဲ တှေ် သီုကဵုတၚ်ဂုဏ်ကဵုလ္တူတၠဂုဏ်အ္စာတံ ဗွဲမလောန်ရ” ဂှ် ကွးဘာတိုန်စိုပ်ကတ်လ္ၚတ်မွဲတၠ ဟီုရ။
ဘာတန်ဗ္တောန် ကိုန်စဳရေၚ်ပညာဥတုကညၚ် “ဝေပုလ္လသိပ္ပံ” ဝွံ သၞာံဂတအဆက်က်တေံ ညံၚ်သ္ဂောံပံက်အာမာန် ပၠန်ဂှ် ရန်တၟံလဝ်နွံတုဲ ပ္ဍဲကဵုသက္ကရာဇ် (၁၃၇၅) သၞာံ၊ ဂိတုဇှေ် (၁၄) မံက် (၂၂-၆-၂၀၁၃) မ္ဂး သွက်ဂွံကၠောန်သ္ပ သ္ဘၚ်ကၞာစှေ်ဘာတန်ဗ္တောန်နွံရောၚ်ဂှ်လေဝ် ဂွံတီကေတ်ရ။
