မာံသုတ – သၞောဝ်ဥပဒေမူအပြောံ ကမၠောန်ပွမတက်တြးပ္တိက်လိက်ကဵု ပ္ဍဵုဗီုလိက် ကၠတ်ထဝ်ညးဍုၚ်ကွာန် သ္ပဒတန်လဝ်ဂှ် ဂကောံဌာန်ပရိုၚ်ကောန်ဍုၚ်အရၚ် (Burma News International – BNI) ပ္တိတ်လိက် လလောၚ်တြး ပ္ဍဲဂိတုဂျူလာၚ် (၉) ဂှ်တုဲ ဒစဵုဒစးဏာရ။
သၞောဝ်ဥပဒေမူအပြောံ ကမၠောန်ပွမတက်တြးပ္တိတ်လိက်ကဵု ပ္ဍဵုဗီုလိက် သ္ပဒတန်လဝ်ဂှ်ဝွံ ထိၚ်ဒဝ်လဝ်ပရိုၚ်မဳဒဳယာဂမၠိုၚ် မွဲနဲမွဲဗီုတုဲ သၞောဝ်ဥပဒေဗီုဏံ ဟွံမွဲပၟိက်ရဂှ် ဂကောံပရိုၚ်ဗၟာဍုၚ်သၟာၚ် (BNI) ညာတ်ကေတ်လဝ်ရောၚ် ဓမံက်ထ္ၜးလဝ် ပ္ဍဲလိက်လလောၚ်တြးဂှ်ရ။
ညးလျိုၚ်ပရေၚ်ဖောအ်ဗြေဝ် ဂကောံ (BNI) နာန်ဖဝ်ဂေဂှ် “ပ္ဍဲသၞောဝ်ဥပဒေအပြောံ ကမၠောန်ပွမတက်တြးပ္တိက်လိက်ကဵု ပ္ဍဵုဗီုလိက်ဂှ်ဝွံ စေဝ်ပၞောန်ၝောံပိုဒ် (၇) ဂှ် ဓမံက်ထ္ၜးလဝ် ဗွဲမကၠးဖ္ဍး ဟွံမွဲတုဲ သွက်ဂွံချူဓမံက် ပရေၚ်ဟွံညိၚ်ဝတ် ကတဵုဒှ်မံၚ်လၟုဟ်ဂှ် ဟွံဗၠးၜးပေၚ်ၚ်ရ။ ဗွဲတၟေၚ်မ္ဂး ပွမကေတ်ပရိုၚ်၊ ဓမံက်ပရိုၚ် ပဋိပက္ခ ဒေသမဆေၚ်စပ်တံ၊ ပရေၚ်ဖံက်ပကဝ်အခေါၚ်အရာမၞိဟ် ဒေသကောန်ဍုၚ်အရၚ် ကဏ္ဍမဳဒဳယာတဴတက်အောန်မံၚ်တံဂှ် သာတုဲ ခက်ခုဲအာမာန်ရ” သာ်ဝွံ ဟီုရ။
တုဲပၠန် သွက်ဂွံကေတ်ပရိုၚ် ဂကောံအလဵုအသဳ ကေုာံ ဌာနမဆေၚ်စပ်ဂမၠိုၚ်တံဂှ် ဒှ်ပရေၚ်တာဒၞာကဵု သၞောဝ်ဥပဒေဂှ်တုဲ ပွမချူပရိုၚ် မွဲလ္ပာ် ဗီုကၠာတေံဟေၚ် ဆက်တုဲ ကတဵုဒှ်အာမံၚ်ရောၚ်ဂှ်လေဝ် ညးထံက်ထ္ၜးရ။
ညးဝွံ “သၞောဝ်ဥပဒေဏံဂှ် ဌာနဝန်ဇၞော်ပရေၚ်လလောၚ်တြး မဒှ်ဌာနဝန်ဇၞော်အလဵုအသဳဂှ် ကဵုအခေါၚ်ထိၚ်ဒဝ်ပ္တိုန်စရၚ် ဌာနပရိုၚ်ဂမၠိုၚ်ရ။ ဟိုတ်နူကဵုထောံ အခေါၚ်ထိၚ်ဒဝ်ဏံတုဲ ပရေၚ်ဗၠးၜးပရိုၚ်ဂှ်လေဝ် ထိခေက်အာ ဇၞော်ကဵုဇြဟတ်ရ” သာ်ဝွံ ဟီုရ။
ပ္ဍဲကာလဂွံဗၠးၜးဂှ် ကၟိန်ဍုၚ်ဗၟာဝွံ အခေါၚ်ဗၠးၜးပရိုၚ် ၜိုတ်ထေက်ကြိုက်နွံကီုလေဝ် ပ္ဍဲသၞာံ (၁၉၆၂) ဥူနေဝေန် (တော်လှန်ရေးကောၚ်စီ) သီဏာအဝဵုတုဲ ပ္တိတ်သၞောဝ်ဥပဒေ ပွမပ္တိုန်စရၚ်အခေါၚ် ညးတက်တြးပ္တိတ်ဂမၠိုၚ်ကဵု ညးပ္ဍဵုဗီုလိက်ဂမၠိုၚ်တုဲ ကၠောန်သ္ပကၠုၚ် ပရေၚ်ထိၚ်ဒဝ် ပရိုၚ်မဳဒဳယာဂမၠိုၚ်ရောၚ် ဓမံက်ထ္ၜးလဝ်ကီုရ။
သၞောဝ်ဥပဒေအပြောံ ဌာနဝန်ဇၞော် ပရေၚ်လလောၚ်ပရိုၚ် ချူလဝ်ကဵု သၞောဝ်ဥပဒေအပြောံ အ္စာပရိုၚ်ဂမၠိုၚ် ချူလဝ်တံ သွက်ဂွံပ္တိုန်ထ္ၜးကၠတ်ထဝ် သီုၜါဂှ် ကိုပ်ကၠာတေံ အလဵုအသဳကဵု အ္စာပရိုၚ်ဂမၠိုၚ် တုပ်စိုတ်ကီုလေဝ် သၞောဝ်ဥပဒေအပြောံ ဌာနဝန်ဇၞော်ပရေၚ်လလောၚ်ပရိုၚ် မွဲဂှ်ဟေၚ် ပ္တိုန်ထ္ၜး သ္ပကၠုၚ်ဒတန်ရ။
ဌာနဝန်ဇၞော်ပရေၚ်လလောၚ်ပရိုၚ်ဝွံ အတိုၚ်တုပ်လဝ်စိုတ်ကဵု ကံၚ်ဇြဳပရိုၚ်မဳဒဳယာ(ယာယဳ) ကိုပ်ကၠာတေံဂှ် ဟွံပ္တိုန်ထ္ၜးကဵုကၠတ်ထဝ်တုဲ ပ္တိုန်ထ္ၜးသၞောဝ်ဥပဒေ ပရေၚ်တြးပ္တိတ်ကဵု ပ္ဍဵုဗီုလိက် အ္စာပရိုၚ်ဂမၠိုၚ် ဒစဵုဒစးလဝ်ဂှ် မဒှ်ပွမဖံက်ပလီု ညးဇၞော်ဂမၠိုၚ် တုပ်လဝ်စိုတ်ရောၚ်ဂှ် ညးအုပ်ကာ ကံၚ်ဇြဳပရိုၚ်မဳဒဳယာ(ယာယဳ) ဥူကျဝ်မေန်ဇြိုဲ ဟီုကဵုဌာန်ပရိုၚ်ရ။
နကဵုကံၚ်ဇြဳပရိုၚ်မဳဒဳယာ(ယာယဳ)ဝွံ သၞောဝ်ဥပဒေအပြောံ ကၠတ်ထဝ်ညးဍုၚ်ကွာန် သ္ပလဝ်ဒတန်ဂှ် ဆက်ဒစဵုဒစးအာတုဲ ယဝ်ရ နကဵုဥပဒေ လက္ကရဴအိုတ် ဒှ်ကၠုၚ်ဒတန်မ္ဂး ကောန်ဂကောံ ကံၚ်ဇြဳပရိုၚ်မဳဒဳယာ(ယာယဳ) သီုဖအိုတ် နုက်တိတ်ရောၚ် ဂွံတီကေတ်ရ။
ပ္ဍဲဂိတုဂျူလာၚ် (၄) လောန်ကၠုၚ်ဂှ် သၞောဝ်ဥပဒေအပြောံ ကၠတ်ထဝ်ညးဍုၚ်ကွာန် သ္ပဒတန်လဝ်ဂှ် ထပ်သ္ပဒတန် ပ္ဍဲကၠတ်ထဝ်ကောန်ဂကူတုဲ သမ္မတ ထ္ပက်စၟတ်တဲမ္ဂး သၞောဝ်ဥပဒေ ပွမတက်တြးကဵု ပွမပ္ဍဵုဗီုလိက်ဂှ် ဒှ်အာဒတန်ရောၚ် ဂွံတီရ။