ကောံဓရီုဇၞော်ဏံဂှ် စနူဂိတုမေ စၟတ်တ္ၚဲ ၁၊ ၂ ၊ ၃ ကၠောန်ဗဒှ်အာ ပွိုၚ်ပိတ္ၚဲပေၚ်ပေၚ်ရောၚ်ဂှ် ညးနွံတာ လျိုၚ်သၟတ်မန်လညာတ်တၟိ နာဲဉာဏ်သိုက် ရာမာန် ဟီုလဴရ။
နာဲဉာဏ်သိုက်ဂှ် “ကောံဓရီုဏံ ဒှ်အလန်ကၠာအိုတ်ဂှ်ရ အနာဂတ်ဂတးဏံ သၟတ်မန်ပိုဲဖအိုတ် ဗီုလဵုဂွံ ပါလုပ်ကၠောန်အာ ရန်ကဵုကောန်သၟတ်တအ် ဂွံတီကၠးအာတုဲ ကၠောန်သ္ပအာကောံဓရီုဏံရ” ဂှ် သာ်ဏံ ဟီုလဴရ။
အပ္ဍဲကောံဓရီုဇၞော်တေံဝွံ ကဏ္ဍသၟတ်ကဵု ပရေၚ်ဍုၚ်ကွာန်၊ သၟတ်ကဵုပရေၚ်ပညာ၊ သၟတ်ကဵု ဂဥုဲၜူမာဲ၊ သၟတ်ကဵု လိက်ပတ်ယေန်သၞာၚ်၊ သၟတ်ကဵု ပွဳပွူသဘာဝ စွံအဓိကကဵုတၚ်ဂမၠိုၚ်ဏအ်တုဲ သဳကၠဳ အာရောၚ်ဂှ် ဂွံတီကေတ်ရ။
သွက်ဂွံတိုန်စိုပ်ကောံဓရီုဇၞော်ဏံဂှ် မွဲပွိုၚ်ဍုၚ်မ္ဂး ညးစၞးကမ္မတဳ ၅ တၠ၊ ညးစၞးသၟတ် ၁၅ တၠကဵု သီုကဵုညး လ္ၚတ်တအ် ဘိက်ပၟိၚ်လဝ်ကီုရဂှ် နာဲဉာဏ်သိုက် ဟီုလဴရ။
“သွက်ဂွံတိုန်ကောံဓရီုတေံ ပိုဲကော်ကောံစရီုညးသၟတ်ပ္ဍဲပွိုၚ်ဍုၚ်ပိုဲတုဲ ရဲမိက်ဂွံတိုန်စိုပ်တအ်ဂှ် ပိုဲကေတ် လဝ်စရၚ်ရ” သာ်ဝွံ ညးသၟတ်ကွာန်ဖံၚ်စိၚ် ပွိုၚ်ဍုၚ်ဇြပ်ဗုမွဲတၠ ဟီုလဴရ။
ရဲတိုန်စိုပ်ကောံဓရီုဇၞော်တေံဂှ် ပိုၚ်ခြာစၟတ်သမ္တီလဝ်အယုက် သၟဝ် ၄၀ သၞာံတုဲ လတူအယုက် ၄၀ မ္ဂး နကဵုညးလ္ၚတ်ဟေၚ် တိုန်စိုပ်မာန်ဒၟံၚ်ဂးရ။
သွက်ဂွံကၠောန်ဗဒှ်ကောံဓရီုဇၞော်ဏအ်ဂှ် စနူဂိတုမာတ် တုဲကၠုၚ်တေံ ကၠောန်သ္ပမံၚ်ပရေၚ်သောၚ်ကလး ပ္ဍဲကဵုညးသၟတ် ရးဒေသပွိုၚ်ဍုၚ်ဂမၠိုၚ်တုဲ သီုကဵုပစူတဴလဝ်ဂတဵုမုခ်ဂမၠိုၚ်ကီု ဂွံဆဵုပ္ဍဲဗီုရုပ်တံရ။
ဂကောံသၟတ်မန်လညာတ်တၟိဝွံ ဗော်ပရေၚ်ဍုၚ်ကွာန်ဂမၠိုၚ်၊ ဂကောံမၞိဟ်ဂမၠိုၚ်၊ ဂကောံလိက်ပတ်ယေန် သၞာၚ်ဂမၠိုၚ်၊ ဂကောံဘာသာဂမၠိုၚ်ကဵု နူကဵုသၟတ်ချဳဓရိုၚ်ရးဒေသတအ် တိုန်စိုပ်ရောၚ်ဂှ် ဂွံတီရ။