ညးတာလျိုၚ်ဗော်ညးဗြဴ Women Party(Facebook)
ဗော်ညးဗြဴ (Women Party) ဂှ်ဝွံ ဟိုတ်နူဒှ်ဗော် သ္ပအဓိကကဵုမၞိဟ်ဗြဴတံကီု ဒုၚ်သ္ဇိုၚ်ကဵုဂကောံပရဟိတကီုတုဲ ယဝ်ရစှေ်ပရေၚ်စန်ဒက် ပကောံကောန်ဗော်မ္ဂး လောဲသွာရောၚ် ဥက္ကဋ္ဌဒက်ပတန်ဗော်ညးဗြဴ မိလျိုၚ်မန် ဟီုရ။
“ညးဍုၚ်ကွာန်မန်ပိုဲဂှ် ဘိက်ပၟိၚ်ကၠုၚ် အာတ်မိက်ကၠုၚ်လဝ်ပိုဲ သွက်ဂွံအာစှေ်ပရေၚ်စန်ဒက် လပါ်ဒေသညးတံ နွံမံၚ်ရ။ စှေ်ကၠုၚ်ကဵုညိ၊ ညးတံအာတ်မံၚ်ပိုဲယျ။
ပွိုၚ်ဍုၚ်လ္ၚဵုဂှ် ညးတံ ပံက်လဝ်ဂကောံတုဲယျ၊ ညးတံ ပလံၚ်နၚ်ကဵုမံၚ် ယၟုစရၚ်မၞိဟ်ညးတံ ဥက္ကဋ္ဌ၊ ညးအုပ်ကာညးတံ ဇြဟတ်ညးတံ မူစိဂှ် စိုပ်ကၠုၚ်မံၚ်ယျလေဝ်” သာ်ဝွံ မိလျိုၚ်မန် ဟီုရ။
ဗော်ညးဗြဴဂှ် ဒုၚ်လဝ်သ္ဇိုၚ်ကဵု ဂကောံမိစဴဗု (ဂကောံအစောန်စရာဲညးဗြဴမန်) ကီု ဒှ်ဗော်သ္ပစၞးကဵု မၞိဟ်ဗြဴတံကီုတုဲ ဂၠာဲကောန်ဗော်လောဲသွာမာန်ရောၚ်။ ပြဟ်ဟ်ဏံ သွက်ဂွံအာသောၚ်ကလး စပ်ကဵုဗော်ညးဗြဴဂှ် ရးဒေသဇၞော်လ္ဂုၚ်၊ ရးဗ္ဂော ကေုာံ ရးတၞၚ်သဳတံဂှ် ဖျေံလဝ်သ္ဂုတ်သွာတ်နွံရောၚ် မိလျိုၚ်မန် ဆက်ဟီုရ။
ဗော်ညးဗြဴဂှ် အာတ်လဝ်အခေါၚ်ဒက်ပတန်ဗော် ပတိုန်လဝ်လိက် ပ္ဍဲကဵုကဝ်မယှေန်ပေဲါရုဲမာဲကၟိန်ဍုၚ်တုဲ ပ္ဍဲကဵုဂိတုနဝ်ဝေမ်ဗာ လပါ်မံက်ဂှ် နကဵုစၞောန်ပ္ညုၚ်ကဝ်မယှေန် ညးတာလျိုၚ်အုပ်ဓုပ်ဒေသ ကေုာံ ဗၠာဲသၟိၚ်တံ ကၠုၚ်စၟဳစၟတ်လဝ် ဝၚ်ပူဂဵု ညးဒက်ပတန်ဗော်ညးဗြဴ မၞိဟ် (၁၅) တၠတံ တုဲဒှ်အာရ။
ဖက်ဆောညးအုပ်ကာ ဗော်ညးဗြဴ မိနန်ထဝ် နူဍုၚ်ခေါဇာဂှ် “ဂၠာဲကောန်ဗော်ပိုဲ မၞိဟ်ဗြဴရတှေ် ဟွံဒးကျာတ်ပုဟ်လေဝ်။ ရဲကၠောန်မံၚ်ဂကောံ ပ္ဍဲကဵုကွာန်ဒေသလဵုဒှ်ဒှ်ရ မၞိဟ်ဗြဴဂၠိုၚ်နူမၞိဟ်တြုံတွဵုရဏောၚ်။ ဗော်ပိုဲဂှ် ဗော်ညးဗြဴသၟးသၟးရတှေ် မၞိဟ်ဗြဴလုပ်ကၠောန် ပရေၚ်ဍုၚ်ကွာန်ပ္ဍဲဗော်ပိုဲ ဟွံဒးရောံဓညပုဟ်” သာ်ဝွံ ဟီုရ။
မၞိဟ်ဗြဴတံ က္ဍိုက်က္ဍိုပ်ကေတ်မံၚ်ဒၞာဲ ပ္ဍဲကဵုသွာၚ်ပရေၚ်ဍုၚ်ကွာန်ဂှ် လၟိဟ်အောန်မံၚ်တုဲ နကဵုအယောၚ်အလာဗော်မွဲ စရာဲနွံနွံ ဍာ်ဒကေဝ်ပေၚ်ၚ် ဂွံဂံါကွာ်အာ ဂၠံၚ်တရဴပရေၚ်ဍုၚ်ကွာန်ဂှ် ထေက်ကဵုဒးဒှ်ဓဝိၚ်ရောၚ် ညးမစိုန်သကီုပရေၚ် ဍုၚ်ကွာန်မွဲတၠ ဟီုရ။
ဗော်ညးဗြဴမန် ပတိုန်လဝ် အခေါၚ်ဒက်ပတန်ဗော်တုဲ ပ္ဍဲကဵုအခိၚ်အခြာဟွံလအ်ဏံ ကလိဂွံအခေါၚ်ဒက်ပတန်ဗော် မာန်ရောၚ် ဂွံတီကေတ်ရ။
