ပေဲါသောၚ်ကလးဝွံ ကၠောန်ဗဒှ်ဏာလဝ် ဒၞာဲဇြပ်ဂကောံဗော်သွးမန်ဍုၚ်သေံ ဍုၚ်ၜၚ်ကရဍဳ၊ ခရိုၚ်ဍုၚ်ၜၚ်ကံက် အပ္ဍဲဂိတုနဝ်ဝေမ်ဗာ ၉ တုဲ ဥက္ကဌဗော်ကောန်ဂကူမန် နာဲၚိုဲတိၚ် ကေုာံ ညးတာလျိုၚ်ဗော်ဂမၠိုၚ်၊ ဂကောံမန်ပံၚ်ကောံဍုၚ်သေံ၊ ဂကောံမန် အပ္ဍဲဍုၚ်မဟ္ၚာှာဲ ကေုာံ က္ဍိုပ်သၟာကမၠောန်ကောန်ဂကူမန် မၞံုဒေသဗ္ဒါဲတံ ၁၀၀ တၠပြၚ်ၚ် တိုန်စိုပ်အိုတ်ရ။
ကေၚ်ကာဗဟဵုဗော်ကောန်ဂကူမန် နာဲသဵုမျေအ်ဂှ် ＂ကိုပ်ကၠာတှေ် ဥက္ကဌဇၞော် နာဲၚိုဲတိၚ် ဟီုဏာဂလာန်သြဝါဒရ၊ နကဵုအဲဂှ်တှေ် အဓိကသောၚ်ကလးဏာ ဗီုဗော်ကောန်ဂကူမန်က္တဵုဒှ်ကၠုၚ်၊ အကာဲအရာပရေၚ်ဍုၚ်ကွာန် က္တဵုဒှ်မံၚ်တ္ၚဲဏံကီု သီုကဵုဗတိုက်ဖအောဝ်ဏာကောန်ဂကူမန်ပိုဲ သွက်ဂွံစုတ်မာဲ အပ္ဍဲပေဲါရုဲမာဲ ၂၀၁၅ဏံဂှ်ရ＂ သာ်ဝွံ ညးဟီုရ။
အပ္ဍဲကဏ္ဍသၟာန်သွဟ်ဂှ်လေဝ် ရဲတိုန်စိုပ် ပေဲါသောၚ်ကလးတံ သၟာန်သၟုက်လဝ်တၚ်သၟာန်ဂမၠိုၚ် စပ်ကဵုအကာဲအရာဗော်မန်ၜါဗော် ကေုာံစပ်ကဵုဗတောန်လိက်မန်အပ္ဍဲဘာအလဵုသဳတံဂှ်လေဝ် သောၚ် ကလးဏာလဝ်ကီုရ သာ်ဝွံ ညးဟီုရ။
တုဲပၠန် သဘာပတိဂကောံမန်ပံၚ်ကောံဍုၚ်သေံ MAT နာဲမန်အေ ဂှ်＂နူကဵုဗော်မန်ပိုဲတံ ကၠုၚ်ဟီုသောၚ်ကလးကဵုဗီုဗီုဏံဂှ်တှေ် ခိုဟ်ကွေဟ်ဟ်ရ၊ ပိုဲတံလေဝ် ဂွံတီကၠိုဟ်ကၠုၚ် အကာဲအရာပရေၚ်ဍုၚ် က္တဵုဒှ်မံၚ် အပ္ဍဲဍုၚ်ပိုဲတံလၟုဟ်ဂှ်၊ တုဲပၠန် နူကဵုဂကောံပိုဲတံလဝ် ၜိုတ်သ္ပမာန်ဂှ် ဘိုၚ်ကဵုအာအရီုဏောၚ်＂ သာ်ဝွံ ညးဟီုရ။
စပ်ကဵုတရဴဗော်ကောန်ဂကူမန် MNP ကၠုၚ်သောၚ်ကလး ကေုာံဆဵုဂဗကုကောန်ဂကူမန် မၞုံဍုၚ်သေံတံ ဂှ် စပ်ကဵုပရေၚ်အာကၠုၚ် ကေုာံပရေၚ်ဆက်စၠောံဂမၠိုၚ်ကီု နူကဵုဂကောံ ΜAT တံ ကေတ်တာလျိုၚ် ကဵုမံၚ်အရီုဗၚ်ရဂှ် သာ်ဝွံ ညးဆက်ဟီုရ။
ပေဲါသောၚ်ကလး ကေုာံဆဵုဂဗကုကောန်ဂကူမန်ဂှ် ကိုပ်ကၠာအိုတ် ကၠောန်ဗဒှ်လဝ် ဒၞာဲဘာဝါတ်ပြော် ဍုၚ်ၜၚ်ကံက်ကီုရ။
သတ္တဟဂတဏံမ္ဂး နကဵုဗော်ကောန်ဂကူမန် MNP တံ သွက်ဂွံအာသောၚ်ကလး ကေုာံဆဵုဂဗကု ကောန်ဂကူမန်တံ အပ္ဍဲဘာဝါတ်ဗီု ခရိုၚ်အယုထယာ နွံတုဲ တုဲနူဂှ်မ္ဂး သွက်ဂွံအာလ္ပာ်ဒေသတၞဟ်ဟ် ဒၞာဲကောန်ဂကူမန် တန်တဴမံၚ်တံဂှ် အစဳဇန်လဝ်နွံရောၚ် ဂွံတီကေတ်ရ။