ပံက်ဘာတန်သၠုၚ်တၟိ ပရေၚ်ပညာကောန်ဂကူမန်ဗဒိုပ်ညဳသာ

သဘၚ်ကၞာပအပ်ဘာတန်သၠုၚ်(နန်းနွယ်)

ဇမၠိၚ် ၉၆ ပေ၊ အနာံ ၃၂ ပေ၊ သၠုၚ် ၁၁ ပေ၊ ဘာတၟိၜါထပ်ဂှ် ဂကောံ Swiss Agency for Development and cooperation(SDC) ကဵု ဌာနဝန်ဇၞော်ဖေါအ်ဗြဳကောန်ဍုၚ်အရၚ်ဒေသပယျဵု(နတလ) တံ ပံၚ်တောဲတုဲ ကၠောန်ဗဒှ်လဝ် ၚုဟ်မး ၂၁၈၄ ကိုအ်နွံရောၚ်ဂွံတီရ။

မိမကွးဘာတိုန်စိုပ်မွဲတၠဂှ် “ဘာဏံဂှ်ဘာသာအၚ်္ဂလိက်ကဵုဘာသာမန် ကောန်ၚာ်တအ်စိစောန်ရ၊ ကၠာတေံဒၞာဲဒၟံၚ်ကောန်ၚာ်တအ် ဟွံခိုဟ်ကီုလေဝ် အခိၚ်လၟုဟ်ကောန်ၚာ်တအ်ဂွံမံၚ်အာ ဒၞာဲခိုၚ်ၚ်ကၠိုက်က်ဗီုဏံဂှ် တၚ်ဂုဏ်ကဵုဂကောံကၠောန်ဗဒှ်ဗွဲမလောန်” သာ်ဝွံ ဟီုရ။

အခိၚ်ပံက်အခန်ကၞာဂှ် ဥက္ကဌဗော်ဍုၚ်မန်တၟိ နာဲထဝ်မန် ကဵုဂကောံကေၚ်ကာဗဟဵုဂမၠိုၚ်၊ ကၟုဲဂမၠိုၚ် ၊မိမကွးဘာ၊ ကောန်ကွးဘာသၟတ်တြုံဗြဴ အပံၚ်ဖအိုတ်ၜိုတ် ၅၀၀ တိုန်စိုပ်တုဲ ကၠာဟွံစိုပ်တ္ၚဲပံက်သဘၚ်ကၞာ အခိၚ်ဗ္တံဂှ် ဒုၚ်တၠုၚ်နကဵုအခိုက်ကၞာယေန်သၞာၚ်မန်ရ။

ဘာတန်သၠုၚ်ဏံမ္ဂး ကွးဘာနူတွဵုရးမန်သၟးဟွံက တွဵုရးဍုၚ်ဗဂေါတေံလေဝ်ကၠုၚ်ဗ္တောန်ဒၟံၚ်ကီုရ။

ဗော်ဍုၚ်မန်တၟိကဵု အလဵုအသဳပၞာန်နဝတတုဲကၠုၚ်တေံ ကေတ်ဂွံကၠုၚ်လဝ်တၚ်တုပ်စိုတ် ပရေၚ်ဒေံါပန်ပှော်အလန်ကိုပ်ကၠာ ၁၉၉၅ တေံဂှ်တုဲ ကွးဘာ ၁၀ တန်ဘာကောန်ဂကူမန်တံ က္လိဂွံအခေါၚ်သွဟ်လိက် အပ္ဍဲဌာနစၟဳစၟတ်လိက်အလဵုအသဳဒဵုကဵုလၟုဟ်ရ။

ဒဵုအခိၚ်လၟုဟ် ကောန်ကွးဘာကောန်ဂကူမန် ၅၅၆ တၠအံၚ်ကၠုၚ်လဝ် ၁၀ တန်တုဲ တိုန်လဝ်တက္ကသဵုနွံ ညးတာလျိုၚ်ကမ္မတဳပညာကောန်ဂကူမန် မိလွဳဟာန် ဟီုရ။

သွက်ကွးဘာမန်အလုံဖအိုတ် မွဲသၞာံမ္ဂးသြန်ဘဏ္ဍာၜိုတ် ၅၅၀၀ ကိုဋ်ပြၚ်၊ သွက်အစာဘာမန်ဖအိုတ် သြန် ၄၀၀၀ ကိုဋ်ပြၚ်အိုတ်နွံဏောၚ် မိလဝဳဟာန် ဆက်ဟီုရ။
သွက်အစာဘာမန်မွဲတၠထံက်ပၚ်ကဵုကၠုၚ်မံၚ်၂၀၀၀၀ ဒကေဝ်ဂှ် သၞာံဏံထပ်သၠုၚ်ကဵုသြန်ဂိတု ၅၀၀၀၀ ဂှ် နူ World Education ထံက်ပၚ်ကဵု သွက်အ္စာဘာမွဲသြန်ဂိတု ၁၂၀၀၀ ဒကေဝ်ကီုဂွံတီရ။

သၟဝ်တဲဌာနပရေၚ်ပညာကောန်ဂကူမန်မ္ဂး ဘာကောန်ဂကူမန် ၁၄၂ ဘာ၊ ဘာပံၚ်တောဲကဵုအလဵုအသဳတုဲဗ္တောန် ၁၀၇ ဘာ၊ ဘာတန်သၠုၚ်လောန် post-ten ၁ ဘာ ၊ ဘာတန်သၠုၚ် ၃ ဘာ ကဵုဘာတန်ဒေါဝ် ၁၂ ဘာနွံတုဲ ဘာတန်သၠုၚ်ပရေၚ်ပညာကောန်ဂကူမန်ကွာန်ညဳသာဂှ် နွံဒေသ ကၞောတ်ၜဳရေဝ် ကရပ်ဌာန်ဂအုပ်ဗဟဵု ဗော်ဍုၚ်မန်တၟိရ။