ကၠောန်အခန်ကၞာဗှ်ဗၞုဟ် တ္ၚဲနာဲနလ္လာစုတိ

by | Aug 9, 2015 | ပရိုၚ် | 0 comments

ဂျူမန် – ဒုဥက္ကဌဗော်ဍုၚ်မန်တၟိ(တြေံ) တ္ၚဲနာဲနလ္လာစုတိကလိလောန်အာလဝ်ဂှ် ကၠောန်ဗဒှ်အခန်ကၞာ ဗှ်ဗၞုဟ်ရှေ်သှေ် သ္ပကုသဵုပတုဲဒါန်စရိုဟ်ဍာ် ပေၚ် ၉ ဝါ

ပ္ဍဲဂိတုအဝ်ဂေတ် ၈ အခိၚ်နူဂယး ဒၞာဲကွာန်သၞေဟ်ဗ္ဒဝ် ကျာ်လဒေါဝ်ကွာန်ရ။

နာယကဂကောံနာနာ ကွာန်သၞေဟ်ဗ္ဒဝ် နာဲသိုက်အံၚ်ဂှ် “သွက်ကောန်ဂကူပိုယ်မန် အခိၚ်တ္ၚဲဏအ် အလဵုအသဳတအ် ပံက်လဝ်ကဵုဂၠံၚ်တုဲ သွက်ကောန်ဂကူညးကဵုညး၊ အရေဝ်ညးကဵုညး၊ ယေန်သၞာၚ်ညးကဵုညး၊ လိက်ပတ်ညးကဵုညး ကောန်ဂကူပိုယ်ညံၚ်မတ်ဂွံပံက်အာမာန် ဥက္ကဌဇၞော်ပိုယ်ကၠောန်ကၠုၚ်လဝ် အာကၠုၚ်လဝ်က္ဍိုပ် ဒုၚ်ကၠုၚ်လဝ်ဒဒိုက်သွက်ညးဟလိုၚ်တုဲ အခိၚ်တ္ၚဲဏအ်ပိုယ်တအ် ဂွံအခေါၚ်ရော်ဂုဏ် ရှေ်သှေ် က္ဍိုပ်သ္ကိုပ် ဒုဥက္ကဌနာဲနလ္လာပေၚ် ၉ ဝါ ” ဂးရ။

စနူဂယးကဵုဒါန်ဖာပ်သၚ် စရိုဟ်ဍာ်၊ ရှေ်သှေ်အလာံကောန်ဂကူ သ္ပဂါရဝ ရှေ်သှေ်အစာနာဲနလ္လာကေုာံ အာဇာနည်သ္ဂံၚ်ပြဟ်လလုဲဂမၠိုၚ်၊ ဗှ်ဝၚ်အထုပ္ပတ္တိ သာ်ဝွံကၠောန်သ္ပအခန်ကၞာဂှ် နူဂကောံနာနာ ၇၀ တၠပြၚ်တိုန်စိုပ်လဝ် ဂွံဆဵုရ။

အ္စာမှောံလိက်ပတ် မိအာဲမန်ဂှ် “ရန်တၟအ်ပိုယ်ဂှ်တှေ် ဒဒှ်ရဥက္ကဌနာဲနလ္လာဂှ် ဒုၚ်လဝ်ဒဒိုက်သွက်ဂကူ ထောံသ္ၚိ ထောံကောန်ဇာတ်တုဲ လုပ်အာပရေၚ်ပၠန်ဂတး၊ ဟိုတ်ဂှ်ရ ညံၚ်ကောန်သၟတ်တအ် ဂွံတီအာ ဗီုညးကေၚ်ဒုၚ်ကၠုၚ်လဝ်ဒဒိုက် ရံၚ်ဂုဏ်ညးတုဲ ပိုယ်တအ်ကၠောန်ဗဒှ်အခန်ကၞာရောၚ်” ဟီုရ။

ဗီုအခန်ကၞာဏံကီု ဂကောံကောန်ဍုၚ်ကျာ်ပိတံ သ္ကိုပ်သ္ကကၠောန်ဗဒှ်အခန်ကၞာတ္ၚဲဗှ်ဗၞုဟ်အစာနာဲနလ္လာ ဒၞာဲဘာကျာ်ပိ(ကုန်သေံ) ပ္ဍဲကဵု အဝ်ဂေတ် ၈ အခိၚ်နူဂယး(အကြာပိုန်ၜါ) ကီုရ။

ပ္ဍဲအခန်ကၞာဏံဂှ် ညးတာလျိုၚ်ဗော်ဍုၚ်မန်တၟိ၊ ဂကောံလိခ်ပတ်ယေန်သၞာၚ်မန်(ဍုၚ်ကျာ်ပိ)၊ ရဲဗော်ပရေၚ်ဍုၚ်ကွာန်မန်ဂမၠိုၚ်ကေုာံ ကောန်ဇာတ်ကလောကောဒေံဂမၠိုၚ် ၜိုတ် ၃၀၀ တၠပြၚ်တိုန်စိုပ် သ္ပဂါရဝ ဗှ်ဗၞုဟ်အစာနလ္လာဂှ်လေဝ် ဂွံဆဵုကီုရ။

ပရေၚ်ကလိုက်ကၟဵုအလုံဍုၚ် ပေါဲအာတ်မိက်ဒဳမဝ်ကရေသဳ ၈ ပန်မက္တဵုဒှ်တုဲ ပေၚ်ကၠောံမွဲသၞာံ ပ္ဍဲဂိတုအဝ်ဂေတ် ၈ သၞာံ ၁၉၈၉ ဒပ်ပၞာန်ကွးဘာဗၟာ ABSDF သ္ကုတ်ကျာ်ပိတံ ကၠောန်သဘၚ်ကၞာဂှ် အစာနာဲနလ္လာ အဃောတိုန်ဟီုတွံဂလာန်သဘာပတိ ကောန်တၟံဒေါအ် စုတိကလိလောန်အာလဝ် လ္တူစၚ်ရ။

နာဲနလ္လာဂှ် ဒှ်ဇာတိကွာန်သၞေဟ်ဗ္ဒဝ် မအံက် နာဲမး၊ မိအံက် မိပရေအ်တံ သးၠလဝ်ဂဝ်ဂၞဴ ပ္ဍ္ဍဲသက္ကရာဇ်ခရေတ် ၁၉၁ရ သၞာံ ဂိတုအေဗရဴ ၂ ၊ ကာလစုတိဂှ် ဂွံအာယုက် ၇၂ သၞာံရ။

ကာလဗော်ဍုၚ်မန် ပါ်အာၜါလွ(၁၉၈၀-၈၇) ဂှ် နဒဒှ်ဥက္ကဌဗော်ဍုၚ်မန်တၟိ(သ္ကုတ်ကျာ်ပိ) နာဲနလ္လာ ကေတ်ကၠုၚ်တာလျိုၚ်တုဲ ဗော်ဍုၚ်မန်တၟိ ကလေၚ်ပံၚ် ၁၉၈ရ ဂှ် ဆက်ကေတ်တာလျိုၚ် နဒဒှ် ဒုဥက္ကဌ ဗော်ဍုၚ်မန်တၟိ ဒဵုကဵုအခိၚ်စုတိအာရ။

Written by

Related Posts

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

ပ္ဍဲစင်အသေအဟာန်တ္ၚဲကောန်ဂကူမန် လ္ဒောဝ်တပ်တပ်ဂှ် ဒးပစူသၠုင်လဝ်အလာံကၟိန်ဍုင်ရောင် ဂျာန်နဝါရဳ ၃ တုဲ ကၠုင်ဂှ် နူကမ္မတဳကၠောန်ဗဒှ်တ္ၚဲကောန်ဂကူမန် ဗဟဵုတအ် ပတိတ်ကၠုင်လိက်စေဝ်ပၞောန် စပ်ကဵုအလာံတုဲ မၞိဟ်လ္ၚဵုဟွံ ပေင်စိုတ်ရ။

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲကဵုသၞာံ ၂၀၂၅ ဏံ ညံၚ်မိမညးဍုၚ်ကွာန် ကေုာံ သၟတ်ကွးဘာမန်တအ် သ္ဂောံစကာအာ လိခ်ပတ်မန် လတူလပှ်ကျာမာန်ဂှ် နကဵုညးတာလျိုၚ်ဌာနကမၠောန်ပတိုန်လိခ်ပတ်မန် လတူဓါတ်လပှ်ကျာ ဘာကဝ်လိက်မန်တအ် ဂစာန်ကၠောန်မံၚ် (Mon E-book project) မွဲနွံဂှ် ဂွံတီကေတ်ရ။

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

ကြဴနူကဵု ကမ္မတဳကၠောန်ဗဒှ်တ္ရဲကောန်ဂကူမန် မရနုက်ကဵု (၇၈)ဝါ ဗဟဵုတံ ပတိတ်ကၠုင်လိက် စေဝ် ပၞောန် အလာံပ္ဍဲတ္ရဲကောန်ဂကူမန်ဂှ်တုဲ ညးဂမၠိုင် ဟီုပါ်ပါဲကၠုင်နွံရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.