အံက်တဝ်ဗာ ၂၈
ညးတေံတုန် “သ္ၚိပၟတ်ဓါတ် နူဂျပါန် ကဵုလဝ်ဒါန်ဂှ် စိုပ်မံၚ်ပ္ဍဲပိုဲယျ။ ထၟာဲဒြဟတ်ဍေံဂှ် ဗပေၚ်ကဵု သဵုဠာလေဝ်ဂွံ၊ ဗပေၚ်ကဵု ဓါတ်လလဳလေဝ်ဂွံရ။ ဗပေၚ်လဝ်ဒြဟတ်တုဲ စကာတှေ် စကာဂွံလအ်မံၚ်” သာ်ဝွံ ဂးရ။
ရုၚ်မာဲ နွံပ္ဍဲကွာန် မကြပ်ကဵု ဍုၚ်ရေဝ်ဂှ်ကီု ၊ရုၚ်မာဲ နွံပ္ဍဲဍုၚ်လၟိုၚ်ကဵု ဍုၚ်ခေါဇာဂှ်ကီု က္လိဂွံပၟတ်ဍုၚ်တုဲ ရုၚ်မာဲကွာန် မသှေ်မံၚ်တအ်ဂှ် ဟွံဂွံပၟတ်ဍုၚ်အိုတ်ရောၚ် ဂွံတီကေတ် အတိုၚ်စရၚ် မကၠုၚ်နူ ရုၚ်ကမ္မယှေန် ပွိုၚ်ဍုၚ်ရ။
ပ္ဍဲတွဵုရးမန်ဂှ် ရုၚ်မာဲ နွံ ၉၁၉ မတုဲ၊ရုၚ်မာဲ ဟွံဂွံပၟတ်ဓါတ်လလဳဂှ် နွံ ၃၃၄ ရုၚ်ရ။ သွက်ရုၚ်မာဲတအ်ဂှ်မ္ဂး ရုၚ်မာဲမွဲမတှေ် သ္ၚိပၟတ်ဓါတ် မၞုံတဆိပ်ယၟုတၠဒါန် The People of Japan ဂှ် နူတၠဒါန်တအ် ပလံၚ်ကဵု ၜါၜါမရောၚ် ဥုဟိၚ်လေန်ထိတ် မဒှ်ဒုညးစၞောန်ပ္ညုၚ် နူရုၚ်ကမ္မယှေန် ပေါဲရုဲမာဲ တွဵုရးမန် ဟီုရ။
ပၟတ်ဓါတ်လလဳဝွံ ပၟိက်ဇၞော်တဴ ပ္ဍဲအရာရိုဟ်လၟိဟ်မာဲသၟး ဟွံသေၚ်တုဲ၊ ပ္ဍဲရုၚ်ကမ္မေယှန် ကွာန်/အရာပ် မဖန်ဇန်ဒၟံၚ် ကိစ္စပေါဲရုဲမာဲတံဂှ်လေဝ် ဒးစကာမံၚ်ကီုတုဲ ဟီုပ်ညဳလဝ်ကဵု ဂကောံအုပ်ဓုပ် ကေုာံ ဂကောံအလဵုအသဳ တွဵုရးမန်တအ်တုဲ ဖန်ဇန်ကၠုၚ်လဝ်ရောၚ် ညးဟီုထ်ၜးရ။
“သွက်ဂွံရိုဟ်မမာဲကီု၊ သွက်ညးနွံမ္ၚး ရုၚ်မာဲတအ်ကီု ညံၚ်ဂွံပြေပြံၚ်ဇၟာပ်ပ်အရာဂှ် ပၟတ်ဍုၚ်ဂှ် ဒှ်အဓိကဏောၚ်” ဥုလှခေန် အရာပ်သဳရိမာလာ ဍုၚ်ရေဝ် ဂးရ။
ပၞောဝ်ကဵု စှ်ပွိုၚ်ဍုၚ် နွံပ္ဍဲတွဵုရးမန်ဂှ် ပွိုၚ်ဍုၚ်ၜါသွာၚ် တ္ကအ်ခၟိုၚ် ကဵု ပွိုၚ်ဍုၚ်ရေဝ်တအ်ဂှ်ဟေၚ် ဒှ်ပွိုၚ်ဍုၚ် ဟွံဂွံပၟတ်ဍုၚ် (ပၟတ်ဓါတ်လလဳ) အလဵုအသဳတုဲ ဒးပတှေ်မံၚ် ပၟတ်ဓါတ်လလဳၚ္ၚုဟ်က္ဍၚ်ၚ် နူကမ္မတဳဍေန်ပၟတ်ဍုၚ် မပါ်ပရးမံၚ်ဂှ်ရ။
ပ္ဍဲပွိုၚ်ဍုၚ်ရေဝ်ဝွံ ရုၚ်ကမ္မယှေန်မာဲ အဆံၚ်အရာပ်/ကွာန် နွံ ၄၄ ရုၚ်ကေုာံ လၟိဟ်ရုၚ်မာဲ နွံ ၁၁၀ ရုၚ်တုဲ မၞိဟ်ဂွံအခေါၚ်စုတ်မာဲဂှ် နွံမွဲကိုဋ်ဘာ်ပြၚ်ရ။ ဗော်လုပ်ပြိုၚ် ပ္ဍဲပွိုၚ်ဍုၚ်ရေဝ်ဏံဂှ် ဒှ်ဗော် ပျဳခါၚ်ဖျဵု၊ ဗော် NLD ၊ ဗော်ဒဳမဝ်ကရေဇြဳ အလုံရးမန်၊ ဗော်ကောန်ဂကူမန်၊ ဗော် တစည တအ် မဒှ်အိုတ်ရ။