နူကဵုဒပ်ပၞာန်ဗၠးၜးကောန်ဂကူမန် ဗော်ဍုၚ်မန်တၟိ ပံက်လဝ်ဘာအလံၚ်ဗိုလ် အလန်ပထမကိုပ်ကၠာအိုတ်ဂှ် ကၠောန်ဏာအသေအဟာန်ဖျေံဘာ ပ္ဍဲကဵုဂိတုဖေဖဝ်ဝါရဳ ၃ ဂှ်တုဲ တက္ကသဵုပၞာန်ဂှ် နွံပ္ဍဲမုက်ပၞာန်ရဏောၚ် သာ်ဏံ ဗီုဂလာန်ဥက္ကဌကမ္မတဳပၞာန် နာဲထဝ်မန် ဟီုလဝ်ပ္ဍဲအသေအဟာန်ဖျေံဘာဂှ် ကွးဘာစှေ်နူ အလံၚ် ဗိုလ်မွဲတၠ ကလေၚ်ဟီုလဴထ်ၜးကဵုရ။

ဥက္ကဌကမ္မတဳပၞာန် နာဲထဝ်မန်ဂှ် ‘ မွဲဒမြိပ် ပၠန်ဂတးဏံဂှ်တှေ် ပ္ဍဲဒပ်ပၞာန်ဗၠးၜးကောန်ဂကူမန်ဂှ်တှေ် ပံက် လဝ်အလန်ကၠာအိုတ်၊ ကွးဘာအလံၚ်ဗိုလ်တအ်စှေ်နူဏံတုဲတှေ် သွက်ဂွံအာက္ဍိုပ်ညးတၞဟ်ဏောၚ်၊ ဒှ် ပၞာန်ဓမ္မတာဟွံသေၚ်ဏောၚ်၊ ဥက္ကဌကမ္မတဳပၞာန် နာဲထဝ်မန် ဟီုဗ္ကန်ကဵု ကွးဘာအလံၚ်ဗိုလ်ပိုဲတအ်နွံ၊ အလံၚ်ဗိုလ်ပိုဲတအ်ဂှ် ဇူမွဲလစုတ်တုဲတှေ် ကမ္မတဳပၞာန်တအ်သွက်ဂွံကဵုအာတာလျိုၚ်နွံဏောၚ်’ သာ်ဏံ ကွးဘာစှေ်နူအလံၚ်ဗိုလ် မၞုံယၟု နာဲအံက်မိဆာန် ဟီုလဴထ်ၜးကဵု ဂလာန်ဥက္ကဌကမ္မတဳပၞာန် နာဲထဝ်မန် မဟီု ထ်ၜးလဝ်လ္တူစၚ်ဂှ်ရ။

ပ္ဍဲကဵုဘာအလံၚ်ဗိုလ်ဂှ်ဝွံ ဘာကွတ်ပၞာန်သ္ဇိုၚ်ဂှ် ပွိုၚ် ၂ ဂိတု၊ ကွတ်ဗ္တောန်ပၞာန် အကြာပ်ဂှ် ပွိုၚ် ၂ ဂိတု၊ ကွတ်ဗ္တောန်သ္ကိုပ်ဒပ်ဍောတ်ဂှ် ပွိုၚ် ၂ ဂိတု ကာလပွိုၚ် ရ ဂိတုပြၚ်ၚ် ပံက်ကၠုၚ် လဝ်ရ၊ ပ္ဍဲကဵုတန်ဗ္တောန် ကွတ်ပၞာန်လၟေၚ်ၚ်တအ်ဂှ် ကွတ်ဗ္တောန်ပန်လွဟ်၊ ကွတ်ဗ္တောန်ပန်လွဟ်ဇၞော်-ခန်ဗ္တောန်လွဟ်ဇၞော်၊ နဲဖံက် ဟတိုဟ်မာၚ်၊ တန်ဗ္တောန်က္ဍိုက်ပ်ပၞာန်၊ နဲချူလိက်ရုၚ်၊ နဲကောပ်ကာဲသ္ဂံၚ်ပၞာန်ကဆံၚ်သၟဝ်တအ် ပါလုပ် ဗ္တောန်လဝ်ကဵုရ။

‘ပ္ဍဲကဵုဘာအလံၚ်ဗိုလ်ဏံဂှ်တှေ် နူဒပ်ပၞာန်ရရဂှ် နွံ ၈ တၠ၊ သှေ် ၂၉ တၠဂှ်တှေ် ကၠုၚ်နူကဵုညးကွာန်တအ်ရ၊ တာလျိုၚ်ချိုတ်ပၠိုတ်ဂှ်ညးဟွံကဵုဏီ၊ ဆဂးတှေ် ကၠုၚ်နူညးကွာန်တှေ် ညးကဵုၜိုတ်ဒုအရန်ဗိုလ်၊ ကၠုၚ်နူဒပ် ပၞာန်ရရတှေ် ဒုဗိုလ်မွဲဍောၚ် ဟီုလဝ်ဗီုဂှ်နွံ ဆဂး ဟွံဂွံသ္ပဒတန်ဏီ’ သာ်ဏံ ကွးဘာအလံၚ်ဗိုလ်ဂှ် ဆက် လဴထ်ၜးရ။

ကွးဘာတိုန်ဘာအလံၚ်ဗိုလ်အလန်ပထမဏံဂှ် သၟတ်အာယုက် ၁၈ သၞာံလ္ပာ်လ္တူ ကဵု အကြာ ၃၀ သၞာံ နွံတုဲ၊ ဘာအလံၚ်ဗိုလ်ဂှ်တုဲ ယဝ်ကၠုၚ်နူဒပ်ပၞာန်မ္ဂး ဒးကေတ်တာလျိုၚ်ပ္ဍဲဒပ်ပၞာန်ဗၠးၜးကောန်ဂကူမန် ပွိုၚ် ၅ သၞာံတုဲ ယဝ်ကၠုၚ်နူညးဍုၚ်ကွာန်မ္ဂး ဒးကေတ်တာလျိုၚ် ပွိုၚ် ၃ သၞာံရ၊ ဂတဂှ် ယဝ်ဆန္ဒမိက်ဂွံဆက် ကေတ်အာတာလျိုၚ်ပၠန်မ္ဂးလေဝ် ပၟိက်ဆန္ဒညးကဵုညးဆက်ကေတ်အာတာလျိုၚ်ရ။

‘ကွးဘာအလံၚ်ဗိုလ်တအ်ဂှ်တှေ် စှေ်အာနူဏံတုဲ ဒးဗ္ဂပ်သွာၚ်ညးကဵုညး၊ ဒးကဵုတာလျိုၚ်ကဵုဍေံတအ်တွဵုရ ဆဂးတှေ် ကမ္မတဳပၞာန်ဂ္ဇအ်တုဲမှ ဍေံတအ်ဒးဒၞာဲလဵု ကဆံၚ်လဵုဂှ်တှေ် ဆက်ဖျေံကဵုအာတာလျိုၚ်ရောၚ်’ သာ်ဏံ ညးလျိုၚ်စန္ဒက်အပ္ဍဲဍုၚ် နာဲဃံၚ်ထဝ်ဇေတ် ဟီုရ။

ပ္ဍဲကဵုအသေအဟာန်ဖျေံဘာအလံၚ်ဗိုလ်ဂှ် ကောလွဳအံၚ် နူဇြပ်ဗုဂှ် ဂွံပထမ၊ သိုက်ရတ် နူကအ်ဍောတ်ဂှ် ဂွံဒုတိယ၊ တတိယဂှ် အံၚ်ထဝ်မန် နူကွာန်ခအံၚ်ကြေဟ်၊ လာပ်စာရိတ္တဂှ် သိုက်ထဝ် နူကျာ်ပိ မပ္တံသာ်ဝွံ ကွးဘာတန်ဗ္တောန်အလံၚ်ဗိုလ်တံ က္လိဂွံဏာ လၟေၚ်ၚ်ရ။

ကွးဘာအလံၚ်ဗိုလ်တအ်ဂှ် နူကဵုစပံက် ဒဵုကဵုစှေ်ဂှ် ပွိုၚ်ကာလဗၞတ်(၈)ဂိတုဒှ်တုဲ တိုန်လဝ်ဖအိုတ်(၃၇)တၠ တိုန်လဝ်ရ၊ ပ္ဍဲဂှ် နူကဵုဒပ်ပၞာန်ဗၠးၜးကောန်ဂကူမန်(ဗော်ဍုၚ် မန်တၟိ)ရဂှ် ပါမံၚ်(၉)တၠတုဲ ကွးဘာနူညး ဍုၚ်ကွာန်ဂှ် ပါလုပ်(၂၈)တၠရ။

ဘာအလံၚ်ဗိုလ်ဂှ်စှေ်တုဲဂှ် ဟွံလအ်မ္ဂး နူကဵုကမ္မတဳပၞာန် ဒပ်ပၞာန်ဗၠးၜးကောန်ဂကူမန်ဂှ် သွက်ဂွံသ္ပ ကောံ ဓရီုတုဲ သွက်ဂွံကဵုတာလျိုၚ်ပ္ဍဲကဵု ဒပ်ပၞာန်-ဋ္ဌာန တအ်နွံရ။