ပ္ဍဲကၠတ်ထဝ် ကလေၚ်ချုပလေဝ် ဥပဒေအပြောံပရေၚ်ဗဂဵုလဟဵု (စည်ပၚ်) ဂှ် ရန်ကဵုသွက်ကမ္မတဳ အဆံၚ်ပွိုၚ်ဍုၚ်တံ ကၠောန်ကမၠောန်သ္ဂောံဂြိပ်တုဲ ကမ္မတဳပရေၚ်ဗဂဵုလဟဵု အဆံၚ်တွဵုရးဂှ် ပလှ်ကၠေံလဝ်ရောၚ် ဂွံတီကေတ် နူကဵုရုၚ်ကၠတ်ထဝ် တွဵုရးဍုၚ်မန်ရ။

ပ္ဍဲဥပဒေ ပရေၚ်ဗဂဵုလဟဵု မစကာဒၟံၚ်လၟုဟ်ဏံ ကမ္မတဳဗဂဵုလဟဵုပွိုၚ်ဍုၚ်၊ ကမ္မတဳဗဂဵုလဟဵုတွဵုရး၊ ဝန်ဇၞော်ဗဂဵုလဟဵု သာ်ဝွံ နွံအဆံၚ်ၚ်တုဲ ပ္ဍဲဥပဒေအပြောံ ကလေၚ်ချူပလေဝ်တၟိလၟုဟ်ဏံ ပလီုထောံ ကမ္မတဳဗဂဵုလဟဵု အဆံၚ်တွဵုရးရ။

“လက်ထက်တုဲကၠုၚ်တေံ နူတွဵုရးရ ဂၠာဲကဵုသြန်ဂအုံ၊ ပြသၞာ ဒှ်တိုန်မွဲမွဲတှေ် တွဵုရးပၠန်ရ အာပသောၚ်ကဵု ဒှ်ကၠုၚ်သာ်ဂှ်ရ၊နကဵုအဆံၚ်ပွိုၚ်ဍုၚ် ဗီုလဵုဓမံက်ရုပ်ရဴ ဗီုလဵုချပ်ဇန်ရောဂှ် ကသပ် လညာတ်ဟွံတိုန်ကၠုၚ်မွဲလှေ်ရ။ ဒၟါနူဂှ်ရ ကမ္မတဳအဆံၚ်တွဵုရးဂှ် စွံထေက်/ ဟွံထေက်ဟာ ဒှ်ကၠုၚ်သာ်ဏံ” ဒံက်တာအံၚ်နာၚ်ဥူ ဒုဥက္ကဌ ကၠတ်ထဝ်တွဵုရးဍုၚ်မန် ဟီုရ။

ကမ္မတဳဗဂဵုလဟဵု အဆံၚ်တွဵုရးလၟုဟ်ဏံ ဗက်ကၠောန်ဒၟံၚ် ကမၠောန်ဍုၚ်မတ်မလီုဏံရောၚ်တှေ် ကဏ္ဍကမ္မတဳဗဂဵုလဟဵု အဆံၚ်ပွိုၚ်ဍုၚ်ဂှ် ကၠေံဒၟံၚ်ရောၚ် ဒံက်တာအံၚ်နာၚ်ဥူဂးရ။

ပ္ဍဲအရာကလေၚ်ချူပလေဝ် ဥပဒေပရေၚ်ဗဂဵုလဟဵုဏံ ညးဍုၚ်ကွာန်တံလေဝ် ညံၚ်ဂွံပါလုပ်ကၠုၚ်ကီု ရန်တၟံသာ်ဂှ်တုဲ သွက်သ္ဂောံဂွံရမျှာၚ်ညးတံ လညာတ်ညာဏ်ညးတံဂှ် လိက်ဥပဒေအပြောံဏံ ပ္တိုန်စွံလဝ် ပ္ဍဲမုက်လိက်အေန်တာနေတ် ကၠတ်ထဝ်တွဵုရးမန်တေံကီုရ ဂွံတီကေတ်။

“ ညးဍုၚ်ကွာန်တံ ညံၚ်ဂွံပါလုပ်ဂၠိုၚ်ၚ်ဂှ် ဖန်ဇန်အာဏောၚ် ဂးလဝ်ပ္ဍဲဥပဒေရ။ ဆ္ဂး ကမ္မတဳဗဂဵုလဟဵု တွဵုရး အဆံၚ်ညးဍုၚ်ကွာန်တံ ပါလုပ်ဂွံဂှ် ပလီုထောံဣရ ဂွံဆဵုကေတ်” သာ်ဝွံ ဥူမိုၚ်ၚ်ဇြဝ်ထောန် ကောန်ဍုၚ်မတ်မလီု ဟီုရ။

ပ္ဍဲဥပဒေအပြောံ ပရေၚ်ဗဂဵုလဟဵု ချူပလေဝ်လဝ်တၟိဝွံ ပ္ဍဲကမ္မတဳဗဂဵုလဟဵု
အဆံၚ်ပွိုၚ်ဍုၚ်ဂှ် နူဍုၚ်ကွာန်ရုဲစှ် (၅) တၠ၊နူဌာနပရေၚ်အုပ်ဓုပ်နာနာပွိုၚ်ဍုၚ်ဂှ် (ဒုညးက္ဍိုက်ပ်) ၁ တၠ၊ နူဌာနက္ဍိုက်ပ်ဒေသကွာန်ရးဂှ် (ဒုညးက္ဍိုက်ပ်) ၁ တၠ တံ ယိုက်ဂၠေၚ်ကေတ်အာတာလျိုၚ်ရောၚ် ဂးလဝ်သာ်ဂှ်ရ။

ဥပဒေပရေၚ်ဗဂဵုလဟဵု တွဵုရးမန်ဝွံ ပ္တိတ်သ္ပလဝ်ဒ္တန် ပ္ဍဲကၠတ်ထဝ်တွဵုရးမန် အလန်ပထမ သၞာံ ၂၀၁၂ တေံတုဲ ပ္ဍဲသၞာံ ၂၀၁၃ ဂှ်ကီု၊ ပ္ဍဲသၞာံ ၂၀၁၅ ဂှ်ကီု ဗၞတ် မွဲမွဲဝါ ဗပေၚ် ပလေဝ်ကၠုၚ်လဝ်တုဲ ဥပဒေအပြောံ ပလေဝ်လဝ်လၟုဟ်ဏံ ဂိတုဒဳဇြေမ်ဗာဏံ အခါကၠောန်ကောံဓရီုကၠတ်ထဝ် တွဵုရးမန်ပၠန်မ္ဂး ပ္တိုန်ထ္ၜး သဳကၠဳ သ္ပဒ္တန်ရောၚ် ဂွံတီကေတ်ရ။