ပ္ဍဲစၟတ်တ္ၚဲဒဳဇြေမ်ဗာ ၂၀၊ အခိၚ်ဒေါဝ်တ္ၚဲ ၜိုတ် ၁၂ နာဍဳဂှ် ပ္ဍဲဝါဂြၚ်အေက် ကရပ်ကွာန်ဌာန်ဇၞူ (အလယ်စခန်း) ၊ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳ တေံ ဒပ်ဗော်ဍုၚ်မန်တၟိ ကေုာံ ဒပ်ကရေၚ် KNU တံ ဒှ်ပန်ညးသ္ကအ် မွဲလ္စုတ် ပၠန်ရောၚ် ဂွံတီကေတ်နူညးတာလျိုၚ် ဗော်ဍုၚ်မန်တၟိ ကေုာံ ရဲဒေသတံဂှ်ရ။

“အကာဲအရာ ဒှ်ပန်ညးသ္ကအ်ဂှ် ဟွံတီချိုတ်ပၠိုတ်ဏီ။ ဒၞါဲဒှ်ပန်တေံကဵု ဒၞါဲပိုဲနွံဏံ သ္ၚောဲဒၟံၚ်ဏောၚ်တှေ် အကာဲအ ရာဒဒှ်ပေၚ်ၚ်ဂှ် ပိုဲဟီုဟွံမာန်ဏီ။ ပန်ညးသ္ကအ်ဂှ် ဍာံဍာံရ” သာ်ဝွံ ညးတာလျိုၚ် ပွိုၚ်ဍုၚ်ဍာ်ဗု ဗော်ဍုၚ်မန်တၟိ ဟီု ကဵုဌာန်ပရိုၚ်မန်ရ။

ဒၞဲါဒှ်ပန်ညးသ္ကအ်လၟုဟ်ဝွံ ဒှ်ဗွိုၚ်ဒ္တန်ဒပ် ခရိုၚ်ထဝါဲ ဗော်ဍုၚ်မန်တၟိ နူဒပ်ပၞာန်သ္ပသမ္တီကဵုလဝ် ကြဴနူထ္ပက်စၟတ်တဲဒေါံ ပန်ပှော် အဆံၚ်တွဵုရး/ အဆံၚ်ကၟိန်ဍုၚ် လက်ထက်အလဵုအသဳ သမ္မတတိၚ်သိၚ်တေံတုဲ စုက်ဒၟံၚ်ကဵု ဒၞါဲကၠောန် ဆု ဒပ် KNU တံရ သာ်ဝွံ ညးတာလျိုၚ် (ဗော်ဍုၚ်မန်တၟိ) ဂှ် ဆက်ဟီုရ။

ဗဒဵုဝေန်ခါၚ် ညးတာလျိုၚ် ရုၚ်ဆက်ဆောံ ခရိုၚ်ဗိက်-ထဝါဲ ဗော် KNU သ္ဂးဂှ် “အဲနွံမံၚ်ပ္ဍဲထဝါဲဏောၚ်။ ဒှ်ပန်ညး သ္ကအ် ပ္ဍဲဝါဂြၚ်အေက်ဂှ် အဲဟွံတီဏီ” ဂးရ။

ရဲဒပ် KNU ဟိုတ်နူကၠောန်ဆု ၜက်လုပ်အာ ပ္ဍဲဗွိုၚ်ဂြိုပ်ဆု ဗော်ဍုၚ်မန်တၟိ ကၟာတ်လဝ်ဂှ်ရ ဒှ်ပန်ညးသ္ကအ်ဏောၚ် သ္ကိုပ်ဒပ်မွဲတၠ နူဗော်ဍုၚ်မန်တၟိ ဟီုရ။

ပ္ဍဲအရာဒှ်ပန်ညးသ္ကအ်ဗၞတ်မွဲအံၚ်ဂှ် ဒးဘဲလွဟ်နွံကီုဏောၚ် ရဲဒေသတံ ၜိုန်ဟီုတဴကီုလေဝ် ပရိုၚ်ဂှ် သ္ပဒတန်ဟွံ မာန်ဏီရ။

ပ္ဍဲပွိုၚ်ဍုၚ်ဍာ်ဗု ဒေသဒှ်ဒၟံၚ်ပေါဲဗ္တိုက်တံဂှ်ဝွံ ဒပ်ပွိုၚ်ဍုၚ်ဍာ်ဗု (နူတံဒပ်လၟိဟ်-၂- ခရိုၚ်ထဝါဲ၊ဗော်ဍုၚ်မန်တၟိ) ကေုာံ ဒပ် နူတံဒပ် လၟိဟ် ၁၀ ၊ မဟာဒပ် ၄၊ ဗော် KNU တံ ချဳဒရာၚ်အာကၠုၚ်ဒၟံၚ်ရောၚ် ဂွံတီကေတ်ရ။

ပရေၚ်ပန်ပှော်ညးသ္ကအ် က္တဵုဒှ် အကြာ ဒပ်ဗော်ဍုၚ်မန်တၟိ ကဵု ဒပ် KNU တံဂှ်ဝွံ အဃောဂိတုသေပ်တေမ်ဗာဂှ် မွဲ ဝါ၊ ဂိတုအံက်တဝ်ဗာဂှ် မွဲဝါ ဒှ်ကၠုၚ်လဝ် မွဲမွဲလ္စုတ်ဘာ်အံၚ်တုဲ ပန်ညးသ္ကအ် အလန်ဏံဂှ် ဒှ်မရနုက်ကဵု ၃ ဝါရ။

ပ္ဍဲကဵုဒေါံပန်ပှော်တုဲ ကေုာံအလဵုအသဳဂှ်ဝွံ ဗော်ကရေၚ် KNU ဂှ် ဒှ်ဂကောံထ္ပက်လဝ်စၟတ်တဲ လိက်ကသုက် တုပ်စိုတ်ဒေါံပန်ပှော်အလုံဍုၚ် NCA တုဲ ဗော်ဍုၚ်မန်တၟိဂှ် ဒှ်ဂကောံဟဂွံထ္ပက်စၟတ်တဲ NCA ဏီရ။