ဆၜိုတ်ဂကောံရပ်လွဟ် ကောန်ဍုၚ်အရၚ် ထ္ပက်စၟတ်တဲ NCA လိက်ကသုက်တုပ်စိုတ် ဒေံါပန်ပှော် အလုံဍုၚ်တုဲတံဓဝ် ပါလုပ်ကၠုၚ်ပ္ဍဲကောံဓရီုဏံဂှ် သောၚ်ပြသၞာပရေၚ်ဍုၚ်ကွာန် အလုံမွဲဍုၚ်ဏံ မာန်ဟွံသေၚ်ရောၚ် ဥက္ကဌဗော်ကေအေန်ယူ သ္ကိုပ်ပၞာန်ဇၞော် မူတူသေဖဝ် ဟီုပၟိၚ်ဏာ ပ္ဍဲပေါဲပံက်အသေအဟာန် ကောံဓရီုသ္ဘၚ်သဳကၠဳပရေၚ်ၜိုဟ်လလံဍုၚ် ပေန်လုၚ် ၂၁ ဗွဝ်ကၠံ အလန်ဒုတိယ မကၠောန်သ္ပပ္ဍဲ MICC2 နေပျဳဒဝ် ပ္ဍဲဂိတုမေ ၂၄ ရောၚ် ဂွံတီကေတ်ရ။

“သွက်ဂွံပ္တန်ကၟိန်ဍုၚ်ဖေဝ်ဒရေဝ် အနာဂတ်တေံဂှ် ဂအုံဇြဟတ်ကိစ္စဇၞော်ဇၞော် Stake holder ဂကောံရပ်လွဟ်ကောန်ဍုၚ်အရၚ်တၞဟ်ဟ်တံလေဝ် သှေ်ဒၟံၚ်ဏီဏောၚ်ဂှ် မိက်ဂွံကဵုဏာသတိရ။ ဆၜိုတ်ပိုဲရဲဂကောံထ္ပက်စၟတ်တဲ NCA တုဲတံသၟးမ္ဂး ပြသၞာပရေၚ်ဍုၚ်ကွာန် အလုံမွဲဍုၚ်ဏံ ကာလလဵုမွဲ သောၚ်မာန်ဟွံသေၚ်” သာ်ဝွံ သ္ကိုပ်ပၞာန်ဇၞော်မူတူသေဖဝ် ဟီုပၟိၚ်ဏာရ။

ဥက္ကဌ ဗော် KNU သ္ကိုပ်ပၞာန်ဇၞော် သဝ်မူတူသေဖဝ် အဃောဟီုဒၟံၚ်ဂလာန် (မၚ်းရဲစစ်နိုၚ်)

ပ္ဍဲလိက်ကသုက် NCA ဂှ် ဗော်ကောန်ဂကူကရေၚ် KNU ၊ ဒပ်ပၞာန်ကရေၚ် ပ္တုဲဖဵုဒဳမဝ်ကရေဇြဳ DKBA ၊ မုက်ဒပ်ဒဳမဝ်ကရေတ်တေတ် ကွးဘာဂမၠိုၚ် အလုံဍုၚ်ဗၟာ ABSDF ၊ မုက်ဒပ်ကောန်ဂကူချေၚ် CNF ၊ ဂကောံဇၞော် ပရေၚ်ဗၠးၜးကောန်ဂကူပအိုဝ် PNLO ၊ ဗော်ပရေၚ်ဗၠးၜးရးရခေၚ် ALP ၊ ကံၚ်ဇြဳက္လေၚ်ပ္တန် ရးသေံ RCSS ၊ ကံၚ်ဇြဳပရေၚ်ၜိုဟ်လလံ KNU/KNLA-PC တံဟေၚ်ရ ထ္ပက်စၟတ်တဲတုဲအာရောၚ် ဂွံတီကေတ်ရ။

“ပ္ဍဲသၟဝ်က္ဍိုၚ် NCA ဂှ် ဂကောံရပ်လွဟ်ကောန်ဍုၚ်အရၚ် ၈ ဂကောံလုပ်စိုပ်ကၠုၚ်တုဲရ။ ဂကောံတၞဟ်ဟ် ညံၚ်ဂွံလုပ်စိုပ်သၟဝ်က္ဍိုၚ်ဏံပၠန်ဂှ်လေဝ် ပိုဲဂစာန်ဏောၚ်ဂှ် ဟီုလဝ်တုဲမံၚ်ရ” သာ်ဝွံ ဥူဇြဝ်ဌေ သ္ကိုပ်စၞောန်ပ္ညုၚ် နူရုၚ်ညးကဵုကသပ်ဂၞန်ကၟိန်ဍုၚ် ဟီုရ။

သွက်ဂွံထ္ပက်စၟတ်တဲ NCA ဂှ် နူ UNFC အာတ်မိက်လဝ် သွက်ဂွံဒုၚ်တဲတုပ်စိုတ် မူ ၉ တၚ်ကီုလေဝ် ဒဵုလၟုဟ် ပ္ညဳညးသ္ကံ ဟွံဂွံဏီဖိုဟ်တုဲ သွက်ဂွံစိုပ်အဆံၚ် ထ္ပက်စၟတ်တဲ Deed of Commitment-DoC ဂှ် ဂါံတိုန်ဟွံမာန်ဏီရ။

ကမ္မတဳသဳကၠဳပ္ညဳပ္ညပ်ပရေၚ်ဍုၚ်ကွာန်ကၟိန်ဍုၚ် FPNCC ဒက်ပ္တန်လဝ် နကဵုဂကောံရပ်လွဟ် (၇) ဂကောံ မၞုံပဓါန် UWSA က္ဍိုက်ပ်ဂှ်လေဝ် ဟွံဗက်ဂၠံၚ် NCA တုဲ ဂစာန်အာ နပွချူဗဒှ်လိက်ကသုက်တၟိ အတိုၚ်သ္ဂုတ်သွာတ်ပါန်ခါမ်ဂှ်ဏောၚ် လလောၚ်ကၠုၚ်လဝ်တုဲရ။

ပ္ဍဲကမ္မတဳသဳကၠဳပ္ညဳပ္ညပ်ပရေၚ်ဍုၚ်ကွာန်ကၟိန်ဍုၚ် FPNCC ဂှ်ဝွံ ဒပ်ပၞာန်ရခေၚ် (ULA/AA )၊ ဒပ်ပၞာန် ကချေၚ် (KIO/KIA)၊ ဒပ်မဟာမိတ်ဒဳမဝ်ကရေဇြဳကောန်ဂကူဍုၚ်ဗၟာ (MNTJP/MNDA)၊ ဒပ်ဗၠးၜးကောန်ဂကူတအာၚ် (PSLF/TNLA)၊ ဒပ်ပၞာန်ရးသေံ (SSPP/SSA)၊ ဒပ်မဟာမိတ် ဒဳမဝ်ကရေဇြဳကောန်ဂကူ တွဵုရးသေံ သ္ကုတ်ဗၟံက် (PSC/NDAA)၊ ဒပ်ပၞာန်ပရေၚ်ညဳသၟဟ်ရးဝ (UWSP/UWSA) တံ ပါလုပ်မံၚ်ကီု ဂွံတီကေတ်ရ။