ရာသဳဗြဲအိုတ် စိုပ်ကၠုၚ်အခိၚ်ခွါတ်ထ္ၜိုတ်ကီုရလေဝ် ပ္ဍဲတွဵုရးဍုၚ်မန် ဒေသပွိုၚ်ဍုၚ်ရေဝ်ဂှ် ဂၠာဲကောန်ကလောန်ခွါတ်ထ္ၜိုတ်ဟွံလောဲ ရဲကၠအ်ထ္ၜိုတ်တံ ဟီုရ။
“ရဲခွါတ်ထ္ၜိုတ်တံဂှ် တၞံလေဝ် ဍေံတံရုဲဏောၚ်၊ တၞံအရိုၚ် ဗျုဗျု ထ္ၜိုတ်တိတ်အောန်တှေ် ဍေံတံဟွံမိက်ခွါတ်၊ တၞံဆက်မတ်ဂှ် ခွါတ်လေဝ်လောဲ ထ္ၜိုတ်တိတ်လေဝ်ဂၠိုၚ်တှေ် ဍေံတံရုဲတၞံဗီုဂှ်၊ ကၠအ်ထ္ၜိုတ်ဂှ် ယဝ်နွံလ္တူဒဵု ယဝ်သ္ၚောဲနူဍုၚ်ပၠန်တှေ် ဂၠာဲကောန်ကလောန်ဝါတ်၊ ဍေံတံဂွံခွါတ်ဂှ် ဒးကဵုၚုဟ်ဂၠိုၚ်ၚ်” သာ်ဝွံ နာဲကျဝ်နာၚ် တၠကၠအ်ထ္ၜိုတ် နူအရာပ် (ရန်မျိုးအောၚ်) ဍုၚ်ရေဝ် ဂးရ။
နူထ္ၜိုတ်ဍာ်ဍာ် ဗီုကၠောန်ပ္တိတ် ထ္ၜိုတ်ခေတှ် (MNA)
“လောန်ကၠုၚ် ၜိုတ် ၄ သၞာံတေံ ၚုဟ်ထ္ၜိုတ်စှေ်အာမွဲတဲဂှ် ကောန်ကလောန်တံ စိုပ်အာလ္ပာ်တၞဟ်ဟ်အိုတ်တး၊ ကၠအ်လေဝ် နွံသ္ၚောဲ၊ ဒှ်ဒၟံၚ်အတူဒဵုပၠန်တှေ် အေကၠအ်ဗီုဗီုဇဂှ် ဒးဒေံါဇူလဝ်၊ သၞာံအာဏံ ၚုဟ်ထ္ၜိုတ် က္လေၚ်ခိုဟ်တိုန်ပၠန်တှေ် ညးဂစာန်ကော်ကောန်ကလောန် အဲဂစာန်ကော်ကောန်ကလောန်တုဲ ဒၞါဲကြပ်ကဵုဍုၚ်၊ ကၠတ်ထ္ၜိုတ်တိတ်ခိုဟ်တံတှေ် ဂၠာဲကောန်ကလောန် ဂွံလောဲ၊ ကၠအ်သ္ၚောဲသ္ၚောဲ နွံအတူဒဵုတံ၊ ကၠအ်တၞံဗျုဗျုတံတှေ် ညးမွဲ ဟွံမိက်ကၠောန်” သာ်ဝွံ နာဲအံၚ်မျဵု တၠကၠအ်ထ္ၜိုတ် နူကွာန်ဘာ ဂးရ။
ကောန်ကလောန်ခွါတ်ထ္ၜိုတ် ပ္ဍဲဒေသဇကု ဟွံရုံဂပ်တုဲ ဒးဂၠာဲကော်ကေတ် ကောန်ကလောန် နူရးဨရာဝတဳ၊ ရးဗဂေါတေံဂှ် နွံဂၠိုၚ်ကီု ဂွံတီကေတ်ရ။
“ကလောန်ကၠအ်ထ္ၜိုတ်ဂှ် ယဝ်ဟွံဂွံကောန်ကလောန်တှေ် တန်တဴဟွံမာန်ပုဟ်၊ သွက်ဍေံတံ မုနွံပၟိက်ရော ဖ္ဍိုက်ဗပေၚ်ကဵုတုဲ ဒးတံၚ်ဂြဲမံၚ်ဍေံတံ၊ ဗပေၚ်ကဵုဗီုဏံကီုလေဝ် ယဝ်ကၠအ်တၞဟ်ဟ်တံ ကော်ကဵုၚုဟ်ခိုဟ်မ္ဂး ပါအာလေဝ်နွံမံၚ်တှေ် ကျအာလေဝ် နွံကၠုၚ်ဂှ် ဂွံဆဵု၊ ညးပတှေ်အဲ အဲပတှေ်ညး ဒးကၠောန်ဒၟံၚ်ဗီုဂှ်”သာ်ဝွံ နာဲမျတာန် တၠကၠအ်ထ္ၜိုတ် အရာပ် (ရန်ကြီးအောၚ်) ဍုၚ်ရေဝ် ဂးရ။
ဗွဲမဂၠိုၚ်တှေ် တၠကၠအ်ကဵုရဲခွါတ်တံ ယဝ်ကေတ်အခိုက်ပရအ်စ နကဵုအဘိုအ်မ္ဂး ထ္ၜိုတ်ညံၚ်ဂွံတိတ်ဂၠိုၚ်ဂှ် ဍေံတံခွါတ်ထောံ ဟွံညှာကဵုတၞံတုဲ တၞံထ္ၜိုတ်ဂှ် တန်တဴလအ်အ်ဟွံမာန် တၠကၠအ်ထ္ၜိုတ်တံ ဂးရ။
အတိုၚ်စရၚ်ဌာနက္ဍိုက်ပ်ပရေၚ်တဵုလွဳမ္ဂး ပ္ဍဲတွဵုရးမန်ဏံ တဵုလဝ်ထ္ၜိုတ် နွံ ၄၉၃,၂၉၀ ဨကရ၊အပ္ဍဲဂှ် ပွိုၚ်ဍုၚ်ရေဝ်ဂှ် ဒှ်ပွိုၚ်ဍုၚ် တဵုထ္ၜိုတ်ဂၠိုၚ်အိုတ်ဂးတုဲ လၟိဟ်ဨက နွံ ၁၅၁,၈၂၈ ဨကရောၚ် ဂွံတီကေတ်ရ။
