သဒ္ဓါ၊ ပိုၚ်ပြဳ၊ ဗြာန်သိုၚ်၊ အံက်တဝ်ဗာ(၁၀)၊က္ထိုန်(၁၄)မံက်
ရာမညရဋ္ဌဗုဒ္ဓတက္ကသဵု (ဍုၚ်မတ်မလီု) ကဵု တက္ကသဵုဍုၚ်သေံ မဟာစူဠာလံၚ်ကန် တက္ကသဵုၜါလ္ပာ် ဂွံတၚ်ကၠိုဟ်စိုတ် ထ္ပက်လဝ်စၟတ်တဲ MOU (Memorandum of Understanding) ရောၚ် ဂွံတီလဝ်ရ။
ရန်တၟအ်ကဵု ဗုဒ္ဓတက္ကသဵုမန်ပိုဲ ဂွံပါလုပ် အကြာဂကောံတက္ကသဵုဗုဒ္ဓဘာသာဂၠးကဝ်မာန် သာသနာမန် ဂွံဆက်စပ်ကဵု ဗုဒ္ဓဘာသာဂၠးကဝ်မာန်တုဲ ကၠောန်ခန်ကၞာလိက်ကသုက် MOU ဂှ်ရောၚ် ဥက္ကဌဂကောံကွးဘာ IBSC တၠဂုဏ်အ္စာပုပ္ဖဟံသာ ဟီုမြော်ရ။
တၠဂုဏ်အ္စာပုပ္ဖဟံဟာဂှ် “ယဝ်ရကွးဘာပိုဲ တိုန်ဘာပ္ဍဲ IBSC ဂှ်တှေ် စှ်ဇကုမ္ဂး ဂွံ scholarship (လာဘ်အခေါၚ်တိုန် ဘာ) ၜိုတ် (၂) ဇကု တုဲတှေ် နကဵုကွးဘာပိုဲ မိက်ဂွံတိုန်တက္ကသဵုညးတအ် နွံ (၅) ဇကုပေၚ်တှေ် ညးတအ်ကၠုၚ်သွကဵု ပေဲါသွဟ်လုပ်တက္ကသဵု အပ္ဍဲဘာရာမညရဋ္ဌဏအ်ဏောၚ်” သာ်ဝွံ ညးဟီုမြော်ရ။
ဂကောံသၚ်မန်စိုပ်မံၚ် IBSC (International Buddhist Study College) မဟာစူဠာလံၚ်ကံၚ်ကဵု ဂကောံသၚ်ရာမညရဋ္ဌတအ် သ္ပကာချပ်စတုဲ သ္ကိုပ်လျိုၚ်ဌာနပရေၚ်ပညာ ဘဒ္ဒန္တနေပုည ရာမညရဋ္ဌဗုဒ္ဓတက္ကသဵု ကေုာံ သ္ကိုပ်လျိုၚ်ဌာန IBSC ဖရမဟာဟံသာဓမ္မဟသဝ် တက္ကသဵုမဟာစူဠာလံၚ်ကန်တအ် ထပက်လဝ်ကဵုစၟတ်တဲ လိက်ကသုက်ဂှ်ရ။
“ပ္ဍဲပိုဲိဲထ္ပက်စၟတ်တဲဏံဂှ် ပါမံၚ် တုပ်လဝ်စိုတ် အဓိကဂှ်တှေ် သွက်ဂွံသၠာဲဂတးကွးဘာ နူကဵုပိုဲဏံကီု နူကဵုညးတအ်ကီု အ္စာနူညးတအ်ကီု အ္စာနူပိုဲဏံကီု တုဲတှေ် ဠပိုဲဒးဂၠာဲ ဆေၚ်စပ်ကဵုသုသေသန ပိုဲဂွံကၠောန်အာကမၠောန်မွဲစွံ၊ ပရိုၚ်ပရူပရာမွဲမွဲ စပ်ကဵုကိစ္စဗုဒ္ဓဘာသာတှေ် ညံၚ်ဂွံကၠောံဍညးသ္ကအ်၊ စပ်ကဵု library (တိုက်ရံၚ်လိက်) တၚ်ဍိုန်လျဍေံနွံ ဟွံဍိုက်ပေၚ်တှေ် အရၚ်ညးဂွံဗပေၚ်ကဵုကီု” သာ်ဝွံ နူကဵုဘာရာမညရဋ္ဌ တၠဂုဏ်အ္စာခေမာသာရ ဟီုရ။
ပ္ဍဲစၟတ်တ္ၚဲ (၁၁) ဂိတုနဝ်ဝေမ်ဗာ၊ ဂိတုက္ထိုန် (၁၃) မံက်ဂှ် ကၠောန်ဗဒှ် အခန်ကၞာထ္ပက်စၟတ်တဲ (MOU) ဂှ် ပ္ဍဲဇြပ်သ္ဘၚ်ဓရ် ဘာရာမညရဋ္ဌ ဍုၚ်မတ်မလီုတုဲ လၟိုဟ်မၞိဟ်တိုန်စိုပ် နူဂကောံဗော်ပရေၚ်ဍုၚ်ကွာန် ဂကောံနာနာ ညးမှာဇန်နာနာတအ် သီုဖအိုတ် အကြာဗၞတ် (၂၀၀) တၠရ။
နူသၞာံ (၂၀၁၇) တေံ သၚ်နာယက နူကဵုရာမညဓမ္မာစရိယတအ် ဆက်စၠောံမံၚ်ကဵု ဂကောံတက္ကသဵုဍုၚ်သေံ မပ္တံကဵု မဟာစူဠာလံၚ်ကန်တံ နွံမံၚ်တုဲတုဲရဂှ် ဂွံတီကေတ်ရ။