စေတနာ(လှာၜိုပ်)
မဟာဗျူဟာ ညးဂွံလဝ်အဝဵု ပ္ဍဲကၟိန်ဍုၚ်ပိုဲဏံ လးဗဂေတ်မံၚ်ဂၠံၚ်တရဴ ပရေၚ်ကောန်ဂကူကောန်ဍုၚ်အရၚ်ဂမၠိုၚ် ဟွံယဵုလ္ဂူတပ်တး သီုသ္ပမာန် ပ္ဍဵုပ္ဍိုက် နကဵုလွဟ် သီုကဵုဇြဟတ်ပၞာန် ဟွံက္လေၚ်ရံၚ်ဒဒိုက်သၞာ ညးဍုၚ်ကွာန်ဒှ်ဒဒိုက် ဒးဂြိပ်ပဲါဘဲလမျီု သီုဒးအေၚ်ကၠောဝ်နာနာသာ်တံဂှ် ညးဂွံလဝ်အဝဵုတ္ၚဲဏံ ရံၚ်သွက်ဂကူညးမွဲဓဝ်သၟးဟွံက ဝေၚ်မံၚ်နဲဍာ်ပၠာဲ လ္တူကောန်ဂကူကောန်ဍုၚ်အရၚ်တံ ညံၚ်ဂွံဒှ်ဂကူညးတံဖအိုတ်ဂှ် ဂြောပ်ကၟာတ်လဝ်မုက် လ္တူ ကောန်ဍုၚ်အရၚ်တံ ဟုံမံၚ်ဂစေအ်လ္ပာ်စး လှေ်မံၚ်မွဲဗီုတုဲမွဲဗီု လှေ်မံၚ်ဗီုပရေၚ်ညဳသၟဟ်အောန်လောန်တုဲ လှေ် မံၚ်ကဵုမကံလွဟ် ဝေၚ်ပြယာဲလီဗ္ဂေတ်မံၚ် ကောန်ဂကူကောန်ဍုၚ်အရၚ်တံ စိုတ်ဂွံအိုတ်ကဵု ပရေၚ်ဂကူညးတံ ဝါဒခေတ်တၠအဝဵုပၞာန် ကြံၚ်မ္ၚိုဟ်လ္တူပၠန်ဂတးရပ်လွဟ် ကောန်ဂကူကောန်ဍုၚ်အရၚ်တံဂှ် ဒှ်သၞောဝ်ပဠက်ဂကူ ဏောၚ် အ္စာကၞေဟ်ချူလိက်ဂၠးကဝ်ဒယှ် (ဟာဗေ) ချူလဝ် ကြက်ဂလာန်ဒဿနနွံရ။
ပၠန်ဂတးမွဲမွဲ ကောန်ဂကူမွဲမွဲ၊ ဟွံမွဲပၟိက်ကဵု ပွမပ္ဍဵုပ္ဍိုက်ပန်ဂစိုတ် နကဵုလွဟ် ဒဒိုက်ကောန်ဂကူဇၞော်ဇၞော် ညံၚ်ဂွံပြေဟဲအာအိုတ်ဂှ် ကောန်ဂကူညးကဵုညး ဂၠာဲဂၠံၚ်ပရေၚ်ဓဝ်ဍာံ ပရေၚ်ၜိုဟ်လလမ် ကောံဂံါဇက်တိုန်ညဳညဳမှ တိုၚ်ပ္ကဴကောန်ဍုၚ်အရၚ်ကဵု အခေါၚ်အရာကောန်ဂကူညး ညးဂွံဖန်ဖက်ကေတ်မာန်ဂှ် လက္ချန်အဓိက ပ္ဍဲဂှ် ပၟိက်ဇၞော်ရောၚ်။
စိုတ်စေတနာ အလဵုအသဳပၞာန်တ္ၚဲဏံ ၚံက်စၞာဲလ္တူကောန်ဂကူကောန်ဍုၚ်အရၚ် ပရေၚ်ဖဵုဂကူညးကဵုညး ဟွံချပ်ကူတုဲ တက်ပရဲကေတ်ဇၞး လ္တူပၠန်ဂတးကောန်ဍုၚ်အရၚ်တံ သီုမပြိုၚ်ပ္ကာန်ပေဲါဗ္တိုက် ထ္ၜးစလွဟ်လၞက် ဇြဟတ်ဒပ်ပၞာန်ကီုဂှ် ဒှ်အရာညးဟီု (အပါက္လေၚ်ပ္ဍဵုပ္ဍိုက်ကောန်) ဒးဟီုရ။
အကာဲအရာ ပရေၚ်ၜိုဟ်လလမ်တ္ၚဲဏံဂှ် ညးဂှ်တာလျိုၚ်ဇၞော်အိုတ်ရော? ဗော် NLD ဟာ တၠအဝဵုပၞာန်ဟာ? ကၠးကၠး မးမးဂှ် ဟွံဂံၚ်ကဵုသ္ဂုတ်သွာတ်ပြဟ်ဟ် ၜိုန်ကော်တက်ကျာ ဒေံါပန်ပှော်အလုံဍုၚ်ဂှ် ဗျဟ်ရှ်ဟွံမွဲ ဒှ်မံၚ်ဂၠံၚ်တရဴဏံတုဲ ပၞော်ယီုကောန်ဂကူကောန်ဍုၚ်အရၚ်တံ ယဝ်ဒးကၠောန်သ္ပ ပရေၚ်ၜိုဟ်လလမ်ဍုၚ်ဍာံဇေတ်မ္ဂး သီုဒးကော်ဘိက် ဂကောံကုလသမဂ္ဂ သၟာပရေၚ်ဍုၚ်ကွာန်ဂၠးကဝ် သ္ပသက်သဳလ္ဒောဝ်ဝိုၚ်မှ ပရေၚ်ၜိုဟ်လလမ် ကောန်ဂကူ ကောန်ဍုၚ်အရၚ်တံ ဂွံအာဍာ်ဇမၠိၚ်ဂွံ ဆဂှ်သၟးဟွံက သီုဒးချူလိက်ဓဇက်သၞောဝ်ဒ္ဂေတ်ဗက်၊ လ္တူသၞောဝ် လိက်ဒ္ဂေတ်ဗက်ဝွံ ကုပူဂဵုဂကောံဖံက်သၞောဝ်တံဂှ် အခေါၚ်အရာဂကူဂှ် ကၟာတ်လဒဵုထောံ မွဲမပိုတ်သ္ကုတ်မ္ဂး စိုပ်တရဴ ဂၠိုၚ်ရောၚ်။
ပရေၚ်ၜိုဟ်လလမ်ဂှ် ဒှ်ကြက်ရှ်သာဂကူဂမၠိုၚ် ဂွံဂၠာဲအာသွဟ် အခေါၚ်အရာဂကူဂှ် ပၟိက်ဇၞော်မံၚ်ရောၚ်။ ဓဝ်ပတှေ် ကောန်ဂကူကောန်ဍုၚ်အရၚ် ပ္ဍဲလိက်ကသုက်ဏံ ညံၚ်ဂွံဂဵုတၟးမံၚ် လၟိုန်န်ဂှ် ဒှ်တၚ်အဓိကရောၚ်။
ဂကူပိုဲမန် ပရေၚ်ၜိုဟ်လလမ်ဂှ် ဂွံတန်တဴအာ ဗွဲမဂၠိၚ်သ္ၚောဲမာန်ဂှ် အဓိက တန်တဴကဵု က္ဍိုပ်သ္ကိုပ်သၟာပရေၚ်ဍုၚ်ကွာန်ရောၚ် မိက်ဂွံသ္ဂးရ။ ဂကူပိုဲဂှ် ဟိုတ်နူတမ်ရိုဟ်ဂုဏ်ဖဵုဂကူဇၞော်ဇၞော် ဂွံတန်တဴ ဂွံအာဍာ်ဇမၠိၚ်ဂွံဂှ်လေဝ် ဂၠာဲသ္ၚဳမံၚ် ဒိုဟ်ပန်ဒ္စာံကဠၚ်ဇဳသာ် –
(က) ပရေၚ်ဆက်ဆောံ ဂကူမွဲကဵုမွဲ ညံၚ်ဂွံခိုၚ်ဗိုန်
(ခ) သတိဂွန်ဂကူ ညံၚ်ဟွံဝိုတ် ဒးဆဝ်မ္ၚုဟ်မံၚ်လၟိုန်
(ဂ) ဇြဟတ်ဂကူကဵု ပရေၚ်တမ်ရိုဟ် ညံၚ်ဂွံဍိုက်ပေၚ်
(ဃ) ဂွိၚ်ကဵုဂကူတုဲ အဓိက အရေဝ်လိက်ပတ် ဘာသာဂကူ ညံၚ်ဂွံတဴတက်
(ၚ) အဝဵုကောန်ဂကူကဵု အခေါၚ်အရာကောန်ဂကူ ဇၟာပ်ညးအဲ ညံၚ်ဂွံချပ်မံၚ်လၟိုန်
(စ) ပ္ၚံက်ပရေၚ်ဍုၚ်ကွာန် ပြံၚ်လှာဲဏံ ကွတ်ပရေၚ်ပညာပၞာန် အဆံၚ်သၠုၚ် ညံၚ်ဂွံဗၟံက်ရုပ်ရဴမာန်
(ဆ) ပရေၚ်ဍုၚ်ကွာန် နဲၜတ်တ်ဟွံဂွံမ္ဂး နဲကြံၚ်ၚ် ဒက်ပ္တန်ပ္ဍဲဂကူ
(ဇ) အဝဵုပရေၚ်ဍုၚ်ကွာန် အဝဵုပရေၚ်ပၞာန် ညံၚ်ဂွံကၟောန်ပခိုၚ်
(ဇျှ) ဇကုကဵုဇကု ပွမယဵုဒုၚ်ကေတ်ပၟိၚ် ဗွဲမပိုတ်သ္ကုတ်ဒးနွံ
အဓိက ပၟိက်ဇၞော်တာလျိုၚ်နွံမံၚ် ပ္ဍဲက္ဍိုပ်သ္ကိုပ်တံ သၟးဟွံသေၚ် ပ္ဍဲညးဍုၚ်ကွာန်မန် သၟတ်တ္ၚဲဏံလေဝ် တာလျိုၚ်ဂှ် ပၟိက်ဇၞော်မံၚ်ရောၚ် အဲညးချူလိက်ဏံ ပတှေ်စှေ်စိုတ်ရ။
သၟတ်တ္ၚဲဏံ လးလဝ်ဂၠံၚ်တရဴ ဂွန်ဗျူဟာ ပ္ဍဲဂတိုပ်လိက်အုပ်ဂှ် “သၟတ်မ္ဂးဂှ် သွက်ဂွံဒှ်က္ဍိုပ်သ္ကိုပ်အနာဂတ်” ခိုၚ်ဗိုန်ဗွဲမလောန်ရ။ နတဲဇြဟတ်စိုတ်ဓါတ်ကာယဂှ် အောန်တဴဗွဲမလောန်ရ။ က္ဍိုပ်သ္ကိုပ်ပိုဲမန် တ္ၚဲဏံဂှ် ၜိုန်ဂစာန်ဂၠာဲ မံၚ်သွဟ် အခေါၚ်အရာဂကူဂှ် အဓိက ဇြဟတ်ဇကု ဂၠိုၚ် (ဇၞော်) တှေ် ဟီုအရေဝ်ပိုၚ် ဓဝ်ပတှေ်ဂကူဂမၠိုၚ် မံက်ဂတဝ်ပြဟ်။
ယွံသၟတ်တ္ၚဲဏံ အခေါၚ်အရာဂကူဇကု ဂွံစိုပ်သကေံတဲဇကုမာန်ဂှ် ဇြဟတ်ဟွံမွဲမ္ဂး ပရေၚ်ဍုၚ်ကွာန်မန်ပိုဲလေဝ် ဍေံဂၠိၚ်သ္ၚောဲ က္လေၚ်ရံၚ်အာဝၚ်ဂကူပိုဲ အဆက်ဆက်တေံမ္ဂး ဂကူမန်၊ ဂကူထဝ်၊ ဂကူမန် ဂကူပရဲ နွံကၠုၚ်ကဵုၚုဟ်မး ညးဂၠးကဝ်တံ ဒးဂိုၚ်စၟတ်သမ္တီလဝ် ဒဵုကဵုတ္ၚဲဏံ ဝၚ်ပြာကတ်ဒၟံၚ်ရောၚ်။
တၠပညာတံ ဟီုချူလဝ် မိက်ဂွံတီဝၚ်မ္ဂး လ္ၚတ်ဝၚ်ဂၠိုၚ်ၚ်ညိ မိက်ဂွံကဵုဂကူဇကု ဂွံဂွံအခေါၚ်အရာပြဟ်ဟ်မ္ဂး ကၠေၚ်က္ဍဟ်ဆီကၠိကၠိ ဂၠံက်ပ္တိတ်ကၠဟ်ထောံတုဲ မၞး/အဲ လုပ်ယိုက်ဂၠေၚ် ပရေၚ်ပၞာန်၊ ပရေၚ်ဂကူအိုတ်စိုအ် မိက်ဂွံ ဆဝ်မ္ၚုဟ်ဏာထပ်ပ်ရ။
ယွံမိမညးဍုၚ်ကွာန် သၟတ်တ္ၚဲဏံ ဂကူပိုဲဒးဒုၚ်ၚိတ်ကဠက် ပ္ဍဲဝဲဘဝဍိက်တုဲ ကဵုဝဲဏံ ဆက်ဂျိုၚ်အာ မွဲအာယုက်ကဝ် တန်ဏီဟာ? သၟတ်တံ မိမညးဍုၚ်ကွာန်တံ အန္တရာယ်ဂကူပိုဲဇၞော်ဇၞော် ဒးဒုၚ်မံၚ်ဂှ် ဘဝဍိက်ရ။ လုပ်ပူဗိုၚ် ပ္ဍဲဇြဟတ် ပရေၚ်ဍုၚ်ကွာန် ပရေၚ်ပၞာန် ကရောံဗော်ဍုၚ်မန်တၟိစိုအ်၊ စိုတ်ဓါတ်ဆာန်ဂကူညဳညဳနွံမ္ဂး ဘဝဍိက်ဂၠုဲဂှ် ဗါ်ထပိုတ်ထောံတုဲ ယဵုပ္တိုန်စွံလဝ် ဘဝတၠနာဲ ပ္ဍဲဂကူပိုဲညိ မိက်ဂွံကသေအ်ကၟဝ်ဏာရ။
ပ္ၚံက်ပရေၚ်ဍုၚ်ကွာန်လေဝ် ပြံၚ်လှာဲမံၚ် က္ဍိုပ်သ္ကိုပ်ဗော်ဍုၚ်မန်တၟိလေဝ် ပြံၚ်လှာဲကၠုၚ်တုဲယျ၊ ယဝ်ဂကူပိုဲ ချပ်ကူလ္ဇုဲမ္ဂး ဘဝဂကူပိုဲက္လေၚ်ဒှ်ဍိက် ဇၞော်နူဏံဏီ၊ က္ဍိုပ်သ္ကိုပ်တံ စၞးဒးချပ်မံၚ်ဇြဟတ်ဂကူဂှ် ကောန်ဂကူပိုဲတံ လုပ်ကေတ်တာလျိုၚ် ပ္ဍဲဗော်ပရေၚ်ဍုၚ်ကွာန် ပ္ဍဲဗော်ရပ်လွဟ်ဂကူမန်ပိုဲအိုတ်ညိဂှ် ဇြဟတ်ဇကုနွံဂၠိုၚ် ဟီုအရေဝ် လေဝ်ပိုၚ် တိုၚ်ပ္ကဴပရေၚ်ၜိုဟ်လလမ်ဂှ် ဒးဂၠာဲအာသွဟ် အခေါၚ်အရာဂကူပိုဲဂှ် မံက်ဂတဝ်ပြဟ်မာန်ရောၚ် ပ္တိုန်ထ္ၜးဏာရ။
