မာံပိုန်၊ အေဗရဴ ၁၆၊ သၞာံ ၂၀၂၀
ဟိုတ်နူအကာဲအရာ ယဲကပ်ကိုဝ်ရိုဝ်နာ ကၠောံထၞာန်ဂၠိုၚ်ကၠုၚ်မံၚ်ဂှ်တုဲ လၟေၚ်ကမၠောန်သွက်ဂွံဆက်ကၠောန်အာ ကဏ္ဍပရေၚ်ညဳသၟဟ်ကောန်ဂကူမန်ကီု လၟေၚ်ကမၠောန်ပရေၚ်ၜိုဟ်လလမ် သွက်ဂွံကၠောန်အာ သဘၚ်သဳကၠဳ ပေန်လုၚ် (၂၁) ဗွဝ်ကၠံ အလန်စတုတ္ထတအ်ကီုဂှ် ဒးပဆုဲလဝ်အခိၚ်ရောၚ် ဂွံတီကေတ် နူကဵုဗော်ဍုၚ်မန်တၟိရ။
အလုံဂကူမန် သွာၚ်နာနာတအ် သွက်ဂွံကၠောံက္ဍ ဒှ်မွဲဇြဟတ်၊ သွက်ဂွံညဳသာသၟဟ်န် ဒှ်မွဲရမျာၚ်မာန်ရန်တၟံတုဲ နူကဵုဗော်ဍုၚ်မန်တၟိ၊ ဗော်ညဳသၟဟ်မန်၊ ဂကောံမဟာဇန် ကေုာံ ခမဳသၚ်၊ ညးဍုၚ်ကွာန် အလုံသီုဖၟိုတ်ပါလုပ်တုဲ ညံၚ်သ္ဂောံက္လေၚ်စန်ပ္ကောံ ဒက်ပ္တန်အာဗီုပြၚ် ဂကောံပံၚ်ကောံပရေၚ်ဂကူမန် ကော် အာမ်အေယူ (MAU) ကိုပ်ကၠာတေံဂှ် စဳဇန်လဝ်နွံမံၚ်ရ။
ဥက္ကဌဗော်ဍုၚ်မန်တၟိ နာဲဟံသာဂှ် “လၟုဟ်ဂှ် ပိုဲချပ်လဝ်ညးသ္ကံတုဲမံၚ်ရ၊ လညာတ်သ္ဇိုၚ်တအ်ဂှ်လေဝ် ကြပ်မံၚ်ညးသ္ကံတုဲ ကၠောံက္ဍကၠုၚ်မံၚ်ညးသ္ကံဣရ။ ဆဂး ညးတအ် ပြံၚ်သၠာဲလဝ်ယၟုညိလေဝ်။ ဟိုတ်နူယဲကိုဝ်ရိုဝ်နာဏအ် မံက်ကၠုၚ်တုဲ ပရေၚ်ချဳဒရာၚ်တအ်ဂှ် ဒးဒေံါဒေၚ်လဝ် မွဲလစုတ်ကၠာ။ အဓိကဂကောံဏအ်ဟီုတှေ် ဒးချဳနကဵုပရေၚ်ဍုၚ်ကွာန်လေဝ် ညံၚ်ဂွံဒှ်မွဲဇြဟတ်၊ ပရေၚ်ဍုၚ်ကွာန်ချဳဟွံဂွံ ဒးချဳကဵုပရေၚ်ပၞာန်လေဝ် ညံၚ်ဂွံဒှ်မွဲဇြဟတ်မာန် ပိုဲဒးဂ္စာန်ဏောၚ်” သာ်ဝွံ ဟီုရ။
ဗီုပြၚ်သွက်ဂွံပံက်ပ္တိုန် ဂကောံညဳသၟဟ်အလုံဂကူမန်ဏံဂှ် နူကဵုသွာၚ်နာနာ ပါလုပ်ချူဓဇက်လဝ် မူဂမျိုၚ်တုဲဒှ်မံၚ်တုဲ ဂကောံဏအ်မံက်ဒှ်ကၠုၚ်မ္ဂး သွက်ဗော်ပရေၚ်ဍုၚ်ကွာန်မန် ဂွံဇၞးမာဲကီု၊ စပ်ကဵုဗော်ဍုၚ်မန်တၟိ တက်ဒၟံၚ်ကျာ ပရေၚ်ၜိုဟ်လလမ်ဍုၚ်ကီုဂှ် ဒှ်အထံက်အရီု တၟာဂလိုၚ်ဏောၚ် ညးဆက်ဟီုရ။
တုဲပၠန် သဘၚ်သဳကၠဳၜိုဟ်လလမ်ကၟိန်ဍုၚ် (၂၁) ဗွဝ်ကၠံ အလန်စတုတ္ထဂှ် ကိုပ်ကၠာတေံ ရန်လဝ် သွက်ဂွံကၠောန်အာ အပ္ဍဲဂိတုအေဗရဴ၊ မေ၊ သၞာံ (၂၀၂၀) ဏအ်ရောၚ် နူကဵုကမ္မတဳပံၚ်တောဲသဳကၠဳ ပရေၚ်ၜိုဟ်လလမ်ကၟိန်ဍုၚ် (UPDJC) တအ် စဳဇန်လဝ်ရ။
“ဟိုတ်နူယဲကပ်ကိုဝ်ရိုဝ်နာတုဲ လၟေၚ်ကမၠောန်ပရေၚ်ၜိုဟ်လလမ် ဒေံါဇူအာဟွံသေၚ်ပုဟ်။ ဒၟါနူကဵု အကာဲအရာမွဲမွဲသာ်တုဲ ဒးပဆုဲအခိၚ်၊ ဒးပဆုဲလဝ်တ္ၚဲရ။ သွက်ဂွံဆက်ဓမံက်အာ လၟေၚ်ကမၠောန်ပရေၚ်ၜိုဟ်လလမ်ဏအ်ဂှ် ဇၟာပ်ဂကောံ ပၟိက်ဆန္ဒနွံမံၚ်ဖၟိုတ်ရ” သာ်ဝွံ ညးလျိုၚ်ဌာနဇၞော်ပရေၚ်ဍုၚ်ကွာန် ဗော်ဍုၚ်မန်တၟိ ကေၚ်ကာဗဟဵု နာဲအံၚ်မ္ၚဵု ဟီုရ။
ဒှ်သာ်ဂှ်ရ တန်တဴကဵု အကာဲအရာယဲကပ် မက္တဵုဒှ်မံၚ်လၟုဟ်ဂှ်တုဲ လၟေၚ်ကမၠောန်ဆေၚ်ကဵုပရေၚ်ညဳသၟဟ်ဂကူမန်ကီု ပရေၚ်ၜိုဟ်လလမ်ကၟိန်ဍုၚ်တအ်ကီုဂှ် မၚ်ခါတ်အကာဲ ဓမံက်အာရုပ်ရဴပၠန်ဏောၚ် နူကဵုဗော်ဍုၚ်မန်တၟိ ဟီုလဴလဝ်ရ။
သဘၚ်သဳကၠဳၜိုဟ်လလမ်ကၟိန်ဍုၚ် (၂၁) ဗွဝ်ကၠံ အလန်စတုတ္ထဂှ် အပ္ဍဲပွိုၚ်သၞာံဏအ် ယဝ်ဒှ်ကၠောန်မာန် ဏောၚ်ဟီုမ္ဂး တၚ်တုပ်စိုတ် မက္လိဂွံနူသဘၚ်သဳကၠဳတအ်ဂှ် နပရေၚ်ဒုၚ်လျိုၚ်၊ ကေတ်လျိုၚ်နွံနွံ သွက်ဂွံဆက်စၠောံ အပ်ပြာပ်ကုအလဵုအသဳမတိုန်တၟိတေံရောၚ် လ္ပာ်ကောန်ဂကူကောန်ဍုၚ်အရၚ်တအ် စၟဳစလဝ်ရ။
ၜိုန်ဂှ်လေဝ် ကိုပ်ကၠာနူအာယုက်အလဵုအသဳအေန်အေဝ်ဒဳ ဟွံအိုတ်က္ဍၚ်ဏီ ပွမချပ်ဇန်ဂ္စာန်ကၠုၚ် သွက်ဂွံကၠောန်သဘၚ်သဳကၠဳၜိုဟ်လလမ် (၂၁) ဗွဝ်ကၠံ အလန်စတုတ္ထသာ်ဏအ်ဂှ် စၟဳစဟွံဂွံတုဲ ဒှ်လၟေၚ်ကမၠောန် သွက်ဂွံကၠောန်ထ္ၜးစကဵု ညးဍုၚ်ကွာန်တအ်ဟေၚ်ရောၚ် ညးခါတ်အကာဲ ပရေၚ်ဍုၚ်ကွာန်တအ် ဟီုပါ်ပဲါတဴအိုတ်ရ။
