ပ္ဍဲကဵုဂိတုဒဳဇြေမ်ဗာ ၁၆ ဏံဝွံ တရဴက္ၜၚ်ကျာအပ္ဍဲဍုၚ် စဂြိပ်အာဏောၚ် လလောၚ်တြးကၠုၚ်လဝ်ကီုလေဝ် သၞေဟ်က္ၜၚ်ကျာ ဍုၚ်မတ်မလီုဂှ် ဂိတုဒဳဇြေမ်ဗာဖါအိုတ်တေံမှ စဂြိပ်မာန်ရောၚ် မာန်နေဂျာ သၞေဟ်က္ၜၚ်ကျာ ဍုၚ်မတ်မလီု နာဲဂျဝ်လဳတုၚ် ဟီုရ။
“အခိၚ် လဵုစဂှ် ဟွံတီကၠးဏီ။ ဆဂး အခိၚ်ကာလစဂြိပ်တှ်ေ စပ်ကဵုပရေၚ်ထတ်ယုက် ညးဍုၚ်ကွာန်တံညံၚ်ဂွံပြေပြံၚ်ကီု သၞေဟ်က္ၜၚ်ကျာ မတ်မလီုဏံ ဂွံဂေတ်ဂေၚ် အာမာန်ဗီုတြေံမာန်ဂှ် ၝဒးကၠောန်ထေက်ဂှ်တှ်ေ ကၠောန်အာဏောၚ်” သာ်ဝွံ နာဲဂျဝ်လဳတုၚ် ဟီုရ။
ညးမဍိုက်က္ၜၚ်ကျာတံဂှ် လိက်ထံက်ဂလာန်ယဲ ကိုဝ်ဝေတ် ၁၉ ဟွံမွဲ စၟဳစၟတ်လဝ် ပွိုၚ်၃၆ နာဍဳ၊ တၞးစၟတ်တဲက္ၜၚ်ကျာ၊ ကာတ်ကောန်ကၟိန်ဍုၚ်တံဂှ် ဒးထ္ၜးအာရောၚ်။ သွက်ဂွံစၟဳစၟတ်ယဲဂှ် နကဵုဌာနပရေၚ်ထတ်ယုက်တံ စၞောန်ပညုၚ်လဝ် ဒၞာဲစၟဳစၟတ်ယဲဂှ် ဒးအာစၟဳစၟတ်ရောၚ် ဂွံတီကေတ်လဝ်ရ။
“နကဵု ခရိတ်ဇကုကဵု ဇကုဂှ် ဒးစၟဳစၟတ်နၚ်ဏောၚ်၊ ယဲဟွံမွဲတှ်ေ ဍိုက်က္ၜၚ်ကျာဂွံရ၊ တၞးစၟတ်တဲက္ၜၚ်ကျာ ဂှ်တှ်ေ ရာန်အတိုၚ်ဏံဂွံမံၚ်၊ ဆဂးအခိၚ်ဍိုက်က္ၜၚ်ကျာဂှ်တှ်ေ ဒးမံၚ်အာအတိုၚ် စၟတ်ပိုၚ်ခြာလဝ်ပရေၚ်ထတ်ယုက်(SOP)ဂှ် ဏောၚ်” သာ်ဝွံ နာဲဂျဝ်လဳတုၚ် ဟီုကလးရ။
နူကဵုဌာနကောပ်ကာဲ က္ၜၚ်ကျာကဵုကၠုၚ်အခေါၚ် သွက်ဂွံဂြိပ်အာတရဴက္ၜၚ်ကျာ ပ္ဍဲဍုၚ်ဂှ် နကဵုသၞာဲဒဴက္ၜၚ်ကျာ၊ သၞာဲဒဴသၞေဟ်က္ၜၚ်ကျာ၊ ညးမအာတရဴတံ သွက်ဂွံဒ္ဂေတ်ဗေက်အာ အတိုၚ်စၟတ်ပိုၚ်ခြာလဝ် ပရေၚ်ထတ်ယုက်(SOP) ဂှ် လောန်ကၠုၚ် ဒဳဇြေမ်ဗာ (၁၄) ဂှ် လလောၚ်ပတိတ်လဝ်ရ။
“ပိုဲဂှ်တှ်ေ မိက်ဂွံကဵုဒှ်ဗီုတြေံ သွက်ပရေၚ်ပိုန်ဂြပ်ဇကုဂွံချဳဒရာၚ်မာန်၊ တုဲပၠန် လၟုဟ်ဍေံတံကဵု အခေါၚ်ပံက်၊ ဟိုတ်နူကဵုယဲတုဲတှ်ေ ကလေၚ်ကၟာတ်အာပၠန်ဂှ်လေဝ် ဂွိၚ်ဒၟံၚ်ရ” သာ်ဝွံ နူကဵုဆေၚ်သွံစၞးစၟတ်တဲက္ၜၚ်ကျာ ဍုၚ်မတ်မလီု (MON DHANAR) ညးတာလျိုၚ်မွဲတၠ ဟီုရ။
တရဴက္ၜၚ်ကျာ မတ်မလီုဂှ် မွဲသတ္တာဟမ္ဂး တ္ၚဲစန်ကဵု တ္ၚဲဗြဴပတိ ၜါတ္ၚဲ ဂြိပ်ဒၟံၚ်တုဲ နကဵုဂၠံၚ်တရဴမ္ဂး လ္ဂုၚ်-မတ်မလီု- ကအ်သံၚ် ဂြိပ်ဒၟံၚ်ရ။
ဂိတုဒဳဇြေမ်ဗာ ၁၆ဂှ် တရဴက္ၜၚ်ကျာ ပ္ဍဲဍုၚ်စဂြိပ်မာန်ဂှ် နူကဵုဌာနဝန်ဇၞော် ကောပ်ကာဲတရဴက္ၜၚ်ကျာတံ ပ္ဍဲဒဳဇြေမ်ဗာ ၁၂ ဂှ်လလောၚ်ပ္တိတ်လဝ်တုဲ တရဴက္ၜၚ်ကျာ ဍုၚ်သၟာၚ်သွက်ဂွံဂြိပ်အာမာန် ပ္ဍဲကဵုသၞာံ ၂၀၂၁ ဖါမံက်ဏံမာန်ဂှ် ညးတာလျိုၚ်တံ ပ္ညဳပ္ညပ်ဒၟံၚ်ရောၚ် ဂွံတီကေတ်လဝ်ရ။
