မာံသုခ၊ ဂိတုမာ် (၁၀) စွေက် (မာတ်.8.2021)

ကွဳစက်ပလံၚ်မၞိဟ်ယဲ ဂကောံမေတ္တာရာမည ပရဟိတ မၞုံပ္ဍဲဒေသလှာဒကှ် ကွာန်ကံပှ်လှ်ဂှ်ဝွံ တုဲတုဲကၠုၚ်ဏံ မၞိဟ်ယဲတအ်ကော်စိုပ်မ္ဂး ဗ္တံတ္ၚဲဟွံရုဲ ပွိုၚ် (၂၄) နာဍဳ ပလံၚ်ဗ္စိုပ်ကဵုမံၚ်နွံရ။
လၟုဟ်မ္ဂး ဟိုတ်နူအကာဲအရာ ပရေၚ်ဍုၚ်ကွာန်ဟွံပြေပြံၚ် ဒှ်ဓဝိၚ်ကဵု ပရေၚ်ဂီုကၠီု သွက်ညးအာပလံၚ်မၞိဟ်ယဲကီု ရုၚ်ဂဥုဲလေဝ်ကၟာတ်ဂၠိုၚ်ကီုတုဲ ပ္ဍဲအခိၚ်တ္ၚဲဟေၚ် ပလံၚ်ဗစိုပ်ကဵုတုဲ ပ္ဍဲအခိၚ်ဗ္တံဂှ် ဟွံအာပလံၚ်ရ။
“လၟုဟ်ဂှ် ပရေၚ်ဍုၚ်ကွာန်လေဝ် ဍေံဟွံၜိုဟ်သိုဟ်ပုဟ်၊ လ္တူဍုၚ်တေံတှေ် ပိုဲဂှ် (၆) နာဍဳ ပါ်သဝ်တ္ၚဲတုဲတှေ် ညံၚ်ဂွံစဴဟတာပ်၊ တုဲတှေ် (၆) နာဍဳပါ်နူဂယး အေအခိၚ်ဂှ်မှ ဆက်ပလံၚ်မၞိဟ်ယဲဂွံပၠန်တုဲ ဒးဟီုမွဲပၠန် ပ္ဍဲကဵုပိုဲပလံၚ်ယဲဏံဂှ် လ္ပာ်ပိုဲခက်ခုဲ နွံမံၚ်မာဟလိုၚ်ဏး၊ ပိုဲဂွံအာ (ဆေးရုံ) တေံ (ဆေးရုံ) ဏံဂှ် ဒးရုဲအခိၚ် ဒးကေတ်အခိၚ် အခိၚ်တှေ်တုဲလေဝ် ပိုဲအာကဵုဟွံဂွံရပုဟ်၊ ဗီုအခိၚ်ဒးစိုတ်ကော်ပိုဲ ပိုဲအာပလံၚ်ကဵုဏောၚ်၊ လၟုဟ်ဂှ် အခိၚ်ဒးစိုတ်ကော်ပိုဲဟွံဂွံရဏး” သာ်ဏံ နာဲသိုဝ် ညးက္ဍိုက်ပ်ပလံၚ်မၞိဟ်ယဲ ဂကောံမေတ္တာရာမည ပရဟိတ ကွာန်ကံပှ်လှ် ဟီုရ။
လၟုဟ်ညးတအ် အာပလံၚ်မၞိဟ်ယဲမ္ဂး ဒးဆက်ဖုၚ်ပညဳကဵု ရုၚ်ဂဥုဲ (ဆေးခန်း) တုဲမှ ဂွံအာပလံၚ်မၞိဟ်ယဲဂှ်ရ၊ ရုၚ်ဂဥုဲ ပ္ဍဲဍုၚ်လှာဒကှ် ပြေပြံၚ်ကီုလေဝ် ဒးပလံၚ်မၞိဟ်ယဲ ပ္ဍဲမတ်မလီု၊ မုဟ်ဍုၚ်တအ်မ္ဂး ကွဳစက်ပလံၚ်မၞိဟ်ယဲတအ် ပ္ဍဲအခိၚ်တ္ၚဲဟေၚ် ပလံၚ်ဗ္စိုပ်ကဵုဂွံရ။
ပ္ဍဲဒေသလှာဒကှ်ဝွံ လၟုဟ် ရုၚ်ဂဥုဲလွဳယဲ ပွိုၚ်တိုက်ဒဵုထောၚ်နွံကီုလေဝ် ဟိုတ်နူဒှ်မံၚ်ရုၚ်ဂဥုဲတၟိ ဂွံလွဳယဲ နကဵုဗီုပြၚ်စှ်စှေ် ဟွံဒှ်ဏီဂှ်ရ သွက်ညးယဲ မၞုံပ္ဍဲဒေသလှာဒကှ်တအ် လွဳယဲမ္ဂး ဆက်တုဲ ဒးပတှေ်မံၚ် ရုၚ်ဂဥုဲမတ်မလီု၊ မုဟ်ဍုၚ်တအ်ဖိုဟ်ရ။
ဂကောံမေတ္တာရာမည ပရဟိတ ကွာန်ကံပှ်လှ်ဝွံ ကွာန်ပ္ဍဲဒေသလှာဒကှ် ဟွံရုဲကွာန် မၞိဟ်ယဲနွံ ကော်ကၠုၚ်မ္ဂး အာကဵုမံၚ်လၟိုန်တုဲ ဂကောံဏံဝွံ သီုကဵုမံၚ်ဒါန် (အောက်စီဂျၚ်) ကီုရ။
ပ္ဍဲဒေသလှာဒကှ်ဝွံ ကွာန်ပှ်လှ်၊ ကွာန်ကြုၚ်ခယာၚ်၊ ကွာန်ဝေသာလဳဗၟံက်၊ ကွာန်လိုၚ်ကၞုဲ၊ ကွာန်သၞေဟ်သြောံ နကဵုကွဳစက်ပလံၚ်ယဲဂှ် ပလံၚ်ကၠုၚ်မံၚ် မၞိဟ်ယဲတအ်နွံရ။