ဟံၚ်နန် (ပါၚ်ကၟာ)
ပေါဲအံၚ်ဇၞးဟီုဂှ် တိုၚ်ပ္ကဴဟွံသေၚ် ဒှ်တရဴသွက်ပိုဲမၞိဟ်တံ ဒးကွာ်မွဲဟေၚ်ရ၊ ပေါဲအံၚ်ဇၞး ညးမွဲ ကေုာံ ညးမွဲဂှ် ဟွံတုပ်ညးသ္ကံရ၊ ညးမွဲ ကေုာံ ညးမွဲ ဂိုၚ်စၟတ်သမ္တီလဝ် လ္တူပေါဲအံၚ်ဇၞးဂှ် ဟွံတုပ်ညးသ္ကံရ၊ ညးမွဲ ကဵု ညးမွဲ ပံက်အဓိပ္ပါယ် ပေါဲအံၚ်ဇၞးဂှ်လေဝ် ဟွံတုပ်ညးသ္ကံရ၊ ပေါဲအံၚ်ဇၞးနွံမ္ဂး ပွမဒးကျဂှ်လေဝ် နွံအာဒၟံၚ်ဟဂှ်ကီုရ၊ ဒှ်ဂၠံၚ်တရဴ လောကဓရ်မွဲ ဇၟာပ်ညးအဲ ကြက်ဒးဆဵုအာ ပ္ဍဲကဵုဘဝရ၊ ပွမအံၚ်ဇၞးဂှ် ညံၚ်အိုတ်အာဟွံမွဲကီု ပွမဒးကျဂှ်လေဝ် လက်ကရဴအိုတ်မွဲ ဟွံသေၚ်ရ၊ ကျအာ ဇၞးအာ၊ ဇၞးအာ ကျအာရ၊ ဇၞးမံၚ်တွဵုဂှ် ညံၚ်ဟွံမွဲကီု ကျဒၟံၚ်တွဵုလေဝ် ဟွံသေၚ်ရ။
ဂုဏ်စရာဲကျာ်သြဳမၞိဟ်ဂှ် နွံဒၟံၚ်ပ္ဍဲကဵု ဟွံကေၚ်ကျမွဲလှေ်၊ ဟွံကေၚ်လောတ်လ္ၚာမွဲလှေ်တံ ဟွံသေၚ်ရ၊ ဂုဏ်စရာဲကျာ်သြဳမၞိဟ်ဟီုဂှ် နွံဒၟံၚ်ပ္ဍဲကဵုကျအာတုဲ ဂွံအံၚ်ဇၞး မွဲဝါမာန်ပၠန်ဂှ် ပ္တိတ်ဇြဟတ်လွဳပရာမာန်၊ လောတ်လ္ၚာအာတုဲ ညံၚ်ဂွံကလေၚ်ဓလိုက်က္တဵုမွဲဝါ မာန်ပၠန်ဂှ် ပွမပ္တိတ်ဇြဟတ်မာန်တံရ၊ ဂုဏ်စရာဲ ကျာ်သြဳမၞိဟ်ဂှ် နွံဒၟံၚ်ပ္ဍဲဒၞါဲဏံရ၊ မၞိဟ်ဏံ မွဲလှေ်လေဝ် ဟွံကေၚ်ကျ၊ မၞိဟ်ဏံ မွဲလှေ်လေဝ် ဟွံကေၚ် လောတ်လ္ၚာ၊ မၞိဟ်ဏံ မာန်ဒၟံၚ်တွဵု၊ ညးတၞဟ်ဟီုစဗီုဏံဂှ် ဒှ်ဂုဏ်စရာဲ ကျာ်သြဳမၞိဟ်ရဟွံသေၚ်၊ မၞိဟ်ဏံ ၜိုန်ရ ဒးကျကီုလေဝ် ဍေံဟွံယှအ်ဇဲ၊ ၜိုန်လောတ်လ္ၚာအာကီုလေဝ် ဍေံဓလိုက်က္တဵုတုဲ ဍေံဂစာန်မွဲဝါ မာန်မံၚ်ဏီ၊ ညးတၞဟ် ဟီုစဗီုဗီုဏံဂှ် ဒှ်ဂုဏ်စရာဲကျာ်သြဳမၞိဟ်တံရ၊ ဇၟာပ်ပ်အခိၚ် ဇကုဒးလောတ်လ္ၚာဂှ်
ညံၚ်ဂွံဓလိုက်က္တဵုမာန်ဂှ်ရ ဒှ်အဓိက၊ လ္ပဂွိၚ်ဖေက်ဒးကျညိ၊ ကျဂၠိုၚ်ခ္ဍၚ်မ္ဂး ကြပ်ကၠုၚ်ကဵု အံၚ်ဇၞးခ္ဍၚ်ရ၊ “Failure is the foundation of success” ပွမကျဂှ် ဒှ်သဇိုၚ်ပေါဲအံၚ်ဇၞးရ။
ပိုဲတံ ဒှ်ကၠုၚ်မၞိဟ်ဂှ် သွက်ဂွံအံၚ်ဇၞးဏောၚ်၊ သွက်ဂွံကျ ဟွံသေၚ်ရ၊ သွက်ဂွံဒုၚ်ပယျလေဝ် ဟွံသေၚ်ရ၊ သွက်ဂွံအံၚ်ဇၞးဂှ် ဇၟာပ်ပ်မၞိဟ် နွံကဵုအစောံသတ္တိ သီုဖအိုတ်ရ၊ ဆ္ဂး ဒးဂစာန်၊ ဟွံဂစာန်မ္ဂး မုလေဝ် ဒှ်ကၠုၚ်ဟွံမာန်ရ၊ စှ်သၞာံဂတဏံ မုအဲဒှ်မုရောသ္ဂောံတီဂှ် ဒးအာသၟာန်မံၚ် အ္စာဗေဒၚ်တံ ဟွံသေၚ်ရ၊ သွက်ဂွံတီကိုန်ဇာတာ အနာဂတ်ဇကုဂှ် ဟွံဒးအာသၟာန် အ္စာဗေဒၚ်တံရ၊ စှ်သၞာံဂတဏံ မုဇကုမိက်ဂွံဒှ်ရော? အရာဇကုမိက်ဂွံဒှ်ဂှ် ပ္တိတ်ဇြဟတ် လွဳပရာအာမ္ဂး ဍေံဒှ်ကၠုၚ်မာန်ဖအိုတ်ရ၊ Steve job ညးမဒှ်က္ဍိုပ်သ္ကိုပ် ညးမဟီုဂးတုဲ ပ္ဍဲကဵုကမ္ပဏီအာပ်ပေဝ်လ် (The CEO of apple company) ဂှ် ညးတေံ ဟီုသာ်ဏံရ၊ “The best way to predict your future is to create it” သွက်ဂွံဟီုတွံ ကိုန်ဇာတာ အနာဂတ်ဇကု နဲကဲခိုဟ်အိုတ်ဂှ် ပွမဒးဒက်ပ္တန် ပွမဒးဖန်ဗဒှ်ဍေံရ၊ အနာဂတ်ဂတတေံ ဇကုဒှ်မုရောဂွံတီဂှ် ပွမဒက်ပ္တန် ကၠောန်ဗဒှ်ပ္တိုန်မွဲဟေၚ်ဂှ် ဒှ်နဲကဲခိုဟ်အိုတ်ရ၊ မုကၠောန်ကၠောန်ရ ညံၚ်ဂွံဒှ်ခိုဟ်အိုတ်ဂှ် ကၠောန်ထ္ၜးကဵုတုဲ လၟုဟ် Steve job ကလိလောန်စဴအာ ဘဝပလိုက်တေံရ၊ ဆ္ဂး ပညာညးဂှ် သှ်ၜေက် ဒှ်မံၚ်ဒတုဲဖဵု ပ္ဍဲဍုၚ်လိုက်ဏံဖိုဟ်ရ၊ ဟီု ဖုၚ်အာပ်ပေဝ် မ္ဂး မၞိဟ်ဟွံဒးစိုတ်ဂှ် ဟွံမွဲ၊ ကမ်ပျူတာအာပ်ပေဝ်မ္ဂး မၞိဟ်ဟွံဒးစိုတ်ဂှ် ဟွံမွဲ၊ မၞိဟ်တှေ်တုဲ ဒးစိုတ်မံၚ်ဖအိုတ်ရ။
ပ္ဍဲကဵုလောကဏံ ညးမကလိဂွံလဝ် ပေါဲအံၚ်ဇၞးဂှ် နွံတဴဗွဲမဂၠိုၚ်ရ၊ ပ္ဍဲအပ္ဍဲညးအံၚ်ဇၞးတံဂှ် ဂုဏ်တၟေၚ်ၚ် နွံဒၟံၚ်မွဲသာ်ရ၊ မုဂုဏ်ရောဟီုမ္ဂး ညးတံ ၜိုန်အံၚ်ဇၞးမံၚ်ကီုလေဝ် ညးတံဂှ် ဒှ်မၞိဟ်အံၚ်ဇၞးမွဲရ သာ်ဏံ ညးတံ ဟွံရပ်လဝ်စိုတ်ဓါတ်၊ ညးတံ ရပ်လဝ်စိုတ်ဓါတ် ညံၚ်မၞိဟ်ဟွံအံၚ်ဇၞးမွဲတုဲ ညးတံ ဂိုတ်ဂစာန်ဒၟံၚ်လၟိုန်ရ၊ ဂိုတ်ဂစာန်ဒၟံၚ်လၟိုန်မ္ဂး ပေါဲအံၚ်ဇၞးဂှ် နွံဒၟံၚ်ပ္ဍဲသ္ကေံတဲ ညးတံလၟိုန်ရ၊ တ္ၚဲဂှ်ယှအ်ထောံစိုတ်ဓါတ် တ္ၚဲဂှ် ယှအ်ထောံဝဳရိယမ္ဂး တ္ၚဲဂှ်ပေါဲအံၚ်ဇၞးတံ ဂြိပ်ဒဴတိတ်အာ နူကဵုဇကုရ၊ ပေါဲအံၚ်ဇၞးဂှ် ရုဲမံၚ်မုက်မတ်မၞိဟ်တံ ညိရ၊ ပ္ဍဲမၞိဟ်နွံကဵုဇဲဝဳရိယဂှ်ဟေၚ် ပေါဲအံၚ်ဇၞးတံ ကၠုၚ်သ္ပသ္ကံရဲလေပ်ရ၊ ပ္ဍဲမၞိဟ်လၞုဟ်ဟ်တံဟီုမ္ဂး ပေါဲအံၚ်ဇၞးတံ ဟွံကၠုၚ်ရ၊ ပေါဲအံၚ်ဇၞးဂှ် ဍေံဟွံမိက်ဆဵု ဟွံမိက်ဗဵု မုက်မတ်မၞိဟ်လၞုဟ်ဟ်တံရ။
ဂိုတ်ဂစာန်လွဳပရာဂှ် ပၠောပ်မံၚ်လမျီုကဵု ပေါဲအံၚ်ဇၞးတံရ၊ ဝေါဟာရ အေၚ်္ဂလိက်တံ နွံမံၚ်မွဲမဂှ် Triumph အဓိပ္ပါယ်ဍေံဂှ် ပေါဲအံၚ်ဇၞးရ၊ ဝေါဟာမ္ဂး Triumph ကၠုၚ်နူကဵုဝေါဟာမ္ဂး Try ပ္ဍံဂစာန်ရ၊ Try နွံမှ Triumph ဂှ် ဍေံဒှ်ကၠုၚ်ရ၊ မုလေဝ်ဟွံဂစာန်မ္ဂး မုလေဝ် ဟွံကလိဂွံရ၊ ကံဇာတာဂှ် ဍေံကၠေၚ်ဒက်လဝ်ပိုဲ ဟွံသေၚ်ရ၊ တုဲတဴကဵုဆန္ဒ ဝဳရိယစိုတ်ဓါတ်ဇကုရ၊ လွဳပရာမ္ဂး အရာဇကုမိက်ဂွံဒှ်ဂှ် ဍေံဒှ်ကၠုၚ်မာန် ဖအိုတ်ရ၊ လ္ပဒုၚ်ဒၟံၚ်ထံၚ်ကဵု ကံဇာတာဇကုညိ၊ ရုန်ုဂစာန်ညိ၊ ပါၚ်တြၚ်မွဲလ္ပာ်ဂှ် ကၟာတ်လဒဵုလဝ်မ္ဂး ပါၚ်တြၚ်မွဲလ္ပာ်ပၠန်ဂှ် ပံက်လဟာ်လဝ်လေပ်မံၚ် ဂၠာဲပၞော် ဒဵုကဵုဆဵုညိ။
အဓိကဍေံဂှ် ရန်တၟံတိုၚ်ပ္ကဴဇကုဂှ် လ္ပကဵုဗၠးတိတ်အာ နူကဵုတဲဇကုညိ၊ ရပ်ကေမ်လဝ် ကၟောန်န်ညိ၊ စိုပ်မွဲတ္ၚဲမ္ဂး ပေါဲအံၚ်ဇၞးဂှ် ဟွံဗလးနူကဵုဇကုရ၊ တဵုမာတ်(ဇြ)အေဝ်ဒဳဇြေန် ညးမကၠောန်ဗဒှ်လဝ် ပၟတ်ဓါတ်လလဳဂှ် နူကၠာညးတေံ ဟွံအံၚ်ဇၞးဏီဂှ် ညးတေံ ဒးကျကၠုၚ်လဝ် ဂၠိုၚ်ၚ်ကဵုဝါရ၊ လၟိဟ်ဒးကျကၠုၚ် နွံၜိုတ်ဒ္စိတ်ကၠံဒ္စိတ်စှော်ဒ္စိတ်ဝါရ၊ ညးတၞဟ်ကၠုၚ်သၟာန်၊ ညးလ္ၚဵုလ္ၚဵုဂှ် ကၠုၚ်သ္ပစပရေံဂှ်လေဝ်နွံ၊ ဗီုလဵုရော တဵုမာတ်(ဇြ)အေဝ်ဒဳဇြေန် ကမၠောန်ဇကုဂှ် ဒှ်မာန်မံၚ်ဏီဟာ၊ ဗီုဗီုဏံ ညးတၞဟ်တံ ဒှ်ကၠုၚ်သၠေဟ်ပၟာ လ္တူညးတေံရ၊ ဗီုလဵုညးတေံသွဟ် ကုညးကၠုၚ်သၟာန်ညးတေံရောဟီုမ္ဂး “ဍေံဟွံဒှ်ဏီ စိုပ်မွဲတ္ၚဲမ္ဂး ဍေံဒှ်ကၠုၚ်ပၠန်” ဗီုဏံ ညးတေံဟီုကဵုရ၊ ဂလာန်မ္ဂး ဒှ်ဟွံမာန်ဂှ် ဆလအ်ညးတေံ ဟွံသုၚ်စောဲရ။
ကာလဗောဓိသတ်ပိုဲ ဒ္ဂေတ်ဒုက္ကရစရိယ တြဴသၞာံဂှ်လေဝ် အေၚ်စၞပွိုၚ်တြဴသၞာံတုဲ ဂၠာဲဓရ်ရ၊ ဆ္ဂး ဟိုတ်နူဟွံသေၚ်ကဵုဂၠံၚ်တုဲ ကလေၚ်စတိုန် အာဟာရဂှ် ပဥ္စဝဂ္ဂဳမသုန် ဒှ်အာသၠေဟ်ပၟာ လ္တူဗောဓိသတ်တုဲ သာဲတိတ်အာအိုတ်ရ၊ ဆ္ဂး ဗောဓိသတ်ဂှ် ကာလလဵုလေဝ် ညးဟွံဒှ်သၠေဟ်ပၟာ လ္တူဇကုညးရ၊ စိုပ်မွဲတ္ၚဲမ္ဂး ဒးဆဵုဓရ် ဒးဒှ်ကျာ်တွဵုရောၚ်၊ နကဵုဓရ်ပတှေ်ဏံ ဗော်ဓိသတ် ဆက်ဒ္ဂေတ်အာတုဲ အာစိုပ်ဘဝကျာ်မပြဲ ဟွံမွဲကဵုပတောံၜတ်ရ၊ ၜိုန်ညးတၞဟ် ဒှ်သၠေဟ်ပၟာ လ္တူဇကုကီုလေဝ် ဇကုညံၚ်ဟွံဂွံဒှ်သၠေဟ်ပၟာ လ္တူဇကုဂှ်ရ ဒှ်အရာကိစ္စဇၞော်အိုတ်၊ ဗောဓိသတ်ပိုဲလေဝ် ဟိုတ်နူကဵု ညးဟွံထောံဇဲလွဳညးဂှ်ရ ညးဂွံအာစိုပ် ဒဒှ်ကျာ်ရ။
စိုတ်ဓါတ်ညး ဂွံစှေ်အာဂှ် ဟွံမွဲရ ဇကုကျမွဲဝါမ္ဂး ညံၚ်ဂွံဂစာန်ကၠောန်တိုန် ၜါဆမာန်၊ ဇကုဒးလောတ်လ္ၚာ မွဲဝါမ္ဂး ညံၚ်ဂွံဓလိုက်က္တဵု ၜါဝါမာန်ဂှ် ဒှ်အဓိကဍေံရ၊ တဵုမာတ်(ဇြ)အေဝ်ဒဳဇြေန်ဂှ် ဒၟါနူညးတေံ ဟွံယှအ်ဇဲလွဳဂှ်ရ ညးတေံကလိဂွံ ပေါဲအံၚ်ဇၞး ပ္ဍဲကဵုကမၠောန် ကၠောန်ဗဒှ် ပၟတ်ဓါတ်လလဳ ပၟတ်ဗာတ် (Light bulb) တံရ။
ဂဥုဲဗဇမ် သွက်ဂွံအံၚ်ဇၞး, ဓရ်သဇိုၚ် သွက်ဂွံအံၚ်ဇၞးဂှ် ဒှ်ဣဒ္ဓိပါဒ် (၄) သာ်ရ၊ ဆန္ဒဣဒ္ဓိပါဒ်, ဝဳရယဣဒ္ဓိပါဒ်, စိတ္တဣဒ္ဓိပါဒ်, ဝဳမံသဣဒ္ဓိပါဒ် ဣဒ္ဓိပါဒ် (၄) သာ်ဏံနွံမ္ဂး မုကၠောန်ကၠောန်ရ၊ ဒးအံၚ်ဇၞးဟေၚ်ရောၚ်၊ ဆန္ဒ-ပၟိက်ဒးဇၞော် လ္တူကမၠောန်၊ ဝဳရိယ-လွဳပရာ ဒးဇၞော် လ္တူကမၠောန်၊ စိတ္တ- စိုတ်ဒးဇၞော် လ္တူကမၠောန်၊ ဝဳမံသ- ညာဏ်ဒးဇၞော် လ္တူကမၠောန်ရ၊ အဵုဣဏံဂှ် ဒှ်ဗဇမ် သွက်ပေါဲအံၚ်ဇၞးရ၊ ကမ္ဂးဂှ် ၜိၚ်မံၚ်မှ မံၚ်ပ္ဍဲဍာ်ဂွံ၊ ဂစေံတံပၠန်လေဝ် ပဝ်ဒၟံၚ်မှ မံၚ်လ္တူကျာဂွံ၊ မၞိဟ်တံလေဝ် ပ္တိတ်ဇြဟတ် ရုန်ဂစာန်ဒၟံၚ်လၟိုန်မှ မံၚ်ပ္ဍဲလိုက်ဏံဂွံရ။
ကာလလဆောဝ်မ္ဂး ပိုဲတံ ဒှ်ဓဝိၚ်ကဵု ပရေၚ်တုဲတုဲကၠုၚ်တေံ၊ ဂိုဟ်ကဟောံဒၟံၚ်ကဵု ပရေၚ်တုဲတုဲ အရာကလေၚ်ကေတ် ဟွံဂွံတေံရ၊ ဒှ်ဒၟံၚ်သာ်ဏံမ္ဂး အခိၚ်ဇကုရအိုတ်၊ မုလေဝ် ဂုဏ်ဖဵုဍေံဟွံမွဲရ၊ တုပ်တဴကဵု ကောန်ၚာ် မလရိုအ်ဒၟံၚ်ကဵုဍာ်တှ် မထၞဳအာဂှ်ကီုရ၊ ပွမဒက်ပ္တန် သွက်တ္ၚဲယးဂတတေံဂှ် ၚုဟ်မးဍေံဇၞော် ဂုဏ်ဖဵုဍေံဇၞော် လ္တူနူကဵုဂွိၚ်ဒၟံၚ် ပရေၚ်အတိက် နူကဏေံတေံဏီရ၊ စိုတ်ပိုဲ ပူဂဵုပုထုဇန်ဂှ် ဂွိၚ်လေပ်၊ စံၚ်တူလေပ်၊ ဂိုဟ်ကဟောံလေပ် သီုဖအိုတ်ရ၊ ဟွံခိုဟ်ဂှ် တီမံၚ်ဖိုဟ်ရ ဆ္ဂး ဒှ်ဒၟံၚ်ဖိုဟ်ဂှ် ဒှ်သဘာဝစိုတ် ပိုဲပုထုဇန်တံရ၊ စၞးဒးဖအိုတ်ဒၟံၚ်အခိၚ်ကဵု ပရေၚ်ကေတ်ဟွံဂွံတေံဂှ် ဒက်ပ္တန်အနာဂတ် အရာကေတ်ဂွံတေံမ္ဂး ခိုဟ်ဂၠိုၚ်ရ။
သွက်ဂွံဒှ်ဇြဟတ်စိုတ်ကဵု ရဲတဝ်စၞေဟ်မံၚ်ကဵု ဘဝတံကီု သီုကဵုရဲလုပ်သွဟ်ဒၟံၚ် လိက်ဘာတန် တံကီုတုဲ မိက်ဂွံလဴကဵု ပရေၚ်ဘဝ လဇုဇၞော် ကောန်ဍုၚ်အမေရိကာန်မွဲရ၊ ယၟုညးဂှ် ဖရက်ဘတ္တလာ ညးတန်တဴဒၟံၚ် ပ္ဍဲတွဵုရးမက်ဆေက်ချူဇြေတ်ရ၊ ညးဂှ် ဒှ်မၞိဟ် ဟွံထောံကၠေံ ရန်တၟံ တိုၚ်ပ္ကဴရ၊ ဗီုလဵုဒှ်ဒှ် ညးဟွံသၠးကၠေံ ရန်တၟံညးရ၊ ညးဂှ် နူကဵုဍောတ်တ်တေံ လုပ်သွဟ်ဘာတန် ဒ္စိတ်တန် 9 th grade တုဲ ညးဒးဇူထောံဘာရ၊ ဟိုတ်နူကဵုကမၠောန် ပ္ဍဲကဵုသ္ၚိတေံ ယှုက်ထုဲကၠုၚ်တုဲ ဒးလုပ်ကၠောန်ကမၠောန် ပ္ဍဲသ္ၚိရ၊ အခေါၚ်ဂွံသွဟ်စှ်တန် 10 th grade ဂှ်ဟၟဲရ၊ ဆ္ဂး ပ္ဍဲကဵုရန်တၟံညးတေံဂှ် ပ္ဍဲကဵုဘဝဏံ ဒးအံၚ်ဇၞး စှ်တန်ဏောၚ် ဒးကလိဂွံ ဒဳပလောမာ တဆိပ်စၟတ်တဲ အံၚ်ဇၞးစှ်တန်ဏောၚ် ဗီုဏံညးတေံ ရန်တၟံလဝ်ရ၊ လက်ကရဴဏံ ပံၚ်ဖက်ကဵုသမ္ဘာညးတေံ ၜိုတ် (၆၅) သၞာံတုဲ သမ္ဘာညးတေံ ဒးစုတိအာရ၊ ညးတေံ ကလိဂွံလဝ် ကောန်ဇာတ် မသုန်ရ။
သွက်ဂွံရနုက်ဗပေၚ်ကဵု ဆန္ဒသမ္ဘာညးတေံကီု ကေုာံ ကောန်ဇာတ် ကောန်စဴတံဂှ်ကီုတုဲ အတိုၚ်ရန်တၟံလဝ် ညးတေံလုပ်သှ်စှ်တန် တန်ဒသမရ၊ ညးတေံ အံၚ်ဇၞးအာတုဲ ကလိဂွံ တဆိပ် ဒဳပလောမာ ဘာအဆံၚ်သၠုၚ်ရ၊ ညးတေံ ကလိဂွံအာယုက် (၁၀၆) သၞာံတုဲမှ ဂွံအံၚ်ဇၞးအာ ဘာတန် စှ်တန်ရ၊ ဟွံသၠးကၠေံ ရန်တၟံဇကုမ္ဂး စိုပ်မွဲတ္ၚဲ ဂွံအံၚ်ဇၞးရ၊ ရံၚ်ကေတ်သာဓက အပါနော်ဗျု ကောန်ဍုၚ် အမေရိကာန်ဏံညိ၊ ကောန်ကွးဘာလ္ၚဵုလ္ၚဵုဂှ် စှေ်အာ ဒ္စိတ်တန် စှ်တန် မွဲသၞာံဓဝ်ဂှ် ဟွံမိက်ဆက်တိုန်ဘာ၊ ဒေံါထောံနူဘာရ၊ ကောန်ထ္ပိုဲ ကောန်နာဲလ္ၚဵုလ္ၚဵုဂှ် ကျအာတန်ဇၞော် မွဲသၞာံၜါသၞာံဓဝ်ဂှ် မိက်ဂွံရာံတိတ် သ္ပခရှ်ရ၊ သွက်ရဲစိုတ်ဓါတ်စှေ်လောဲတံဂှ် ဂွံတီကေတ် ပရူပရာ အပါနော် ဖရက်ဘတ္တလာဏံတုဲ စိုတ်ဓါတ် ကဵုဂွံကြံၚ်တိုန်ညိ၊ အာမ္ဂး ဒဵုကဵုစိုပ်တိုၚ်ပ္ကဴဂှ် ဒးအာရောၚ်၊ ကွာ်ဂွံဘာ်တရဴတုဲမှ ကလေၚ်ဂတး စဴထောံ ဗီုဗီုဏံ လ္ပဒုၚ်ယၟုညိ။
ပေါဲအံၚ်ဇၞးကဵု တိုၚ်ပ္ကဴဂှ် ဟွံတုပ်ညးသ္ကံရ၊ ပေါဲအံၚ်ဇၞးဟီုဂှ် မွဲတုဲမွဲ ဍေံကၠုၚ်မာန်ဒၟံၚ် (ဟဂှ်) ရ၊ ဍေံကၠုၚ်တုဲလေဝ် ဍေံကလေအ်တိတ်အာလေပ်ရ၊ တိုၚ်ပ္ကဴဟီုဂှ် စိုပ်အာတုဲတှေ် ဍေံဟွံကလေၚ်တိတ်ရ၊ စိုပ်အာတိုၚ်ပ္ကဴဣရမ္ဂး သွက်ဂွံဆက်အာဂှ် ဟွံမွဲရ၊ ဂၠံၚ်အိုတ်ဣရ၊ ဥပမာ ပိုဲရဲဗုဒ္ဓဘာသာတံဟီုမ္ဂး တိုၚ်ပ္ကဴပိုဲဂှ် ဍုၚ်ဇၞော်နိဗ္ဗာန်ရ၊ စိုပ်အာနိဗ္ဗာန်တုဲ သွက်ဂွံဆက်အာဂတတေံဂှ် ဟွံမွဲသက်က်ရ၊ နိဗ္ဗာန်ဂှ် ဒှ်တိုၚ်ပ္ကဴ ဗုဒ္ဓဘာသာပိုဲရ၊ ပေါဲအံၚ်ဇၞးဟီုဂှ် ဒှ်ဂၠံၚ်တရဴ ပိုဲကွာ်ကၠုၚ်လဝ်ဂှ်ရ၊ အဵုဂၠံၚ်တရဴဂှ် အိုတ်အာ စိုပ်အာဂှ် ဒှ်တိုၚ်ပ္ကဴရ၊ လလံဂွံစိုပ်တိုၚ်ပ္ကဴပိုဲဂှ် ဒးဆဵုဂဗကဵု ဇၞး ကေုာံ ကျဂှ် ဒှ်ပရေၚ်ဓမ္မတာရ၊ အံၚ်ဇၞးလေဝ် လ္ပသၠောၚ် ကျလေဝ် လ္ပဍောၚ်စိုတ်၊ မာန်မွဲခဏ ကျမွဲအံၚ်ရ၊ မိပ်သၠောၚ်ဒၟံၚ်ကဵု ပေါဲအံၚ်ဇၞးသၟးဂှ်လေဝ် ဟွံဂွံ၊ ဍောၚ်စိုတ်ကဵု အရာဒးကျသၟးဂှ်လေဝ် ဟွံဂွံ၊ နူကၠာတ္ၚဲဟွံပၠိုတ်ဏီဂှ် ညံၚ်ဂွံစိုပ်အာ တိုၚ်ပ္ကဴပိုဲဂှ်ရ ဒှ်အရာကိစ္စဇၞော်အိုတ်ရ။
ဇၞးကၠုၚ် နူကဵုပေါဲပြိုၚ်ပကာန်မွဲမွဲ (ဟွံသေၚ်မ္ဂး) အံၚ်ဇၞးကၠုၚ် နူကဵုကၠောန်ကမၠောန်မွဲမွဲမှ ညးဟီုစ ပေါဲအံၚ်ဇၞးဟွံသေၚ်၊ ဂွံစွံလဝ်စိုတ်ခိုဟ်ဟ် လ္တူညးဂမၠိုၚ်မာန်ဂှ်လေဝ် ပေါဲအံၚ်ဇၞးရ၊ ကျကၠုၚ် နူပေါဲပြိုၚ်ပကာန်မွဲမွဲမှ ဒးကျညး ဟီုစဟွံသေၚ်ရ၊ စွံစိုတ်ခိုဟ်ဟ် လ္တူညးတၞဟ်ဟွံမာန်ဂှ် ဒးကျမံၚ် အရိုဟ်ဟ်တ္ၚဲရ၊ ပေါဲအံၚ်ဇၞးဂှ် ကဵုကေတ်ညံၚ်ပရၚ်တဲ ဟွံဂွံရ၊ ဇကုဂစာန်မှ ဇကုဂွံ၊ နွံကဵုသတ္တိ ဂံၚ်သကာမှ ကလိဂွံပေါဲအံၚ်ဇၞး ဘဝတံမာန်ရ၊ ဖေက်ဒၟံၚ်မ္ဂး ဒးသ္ၚောဲအာနူကဵု ပေါဲအံၚ်ဇၞးဘဝတံဏောၚ်၊ ညးဂံၚ်သကာဒၟံၚ်တံဂှ် ညးတံ ဖေက်ဟွံလေပ် ဟွံသေၚ်၊ ညးတံလေဝ် ဖေက်လေပ်ဒၟံၚ်ကီုရ၊ ဆ္ဂး ညးတံ ကေတ်လဝ်ဇၞး လ္တူစိုတ်ဖေက်ဂှ်တုဲ ညးတံ ဂံၚ်သကာမံၚ်ရ၊ စိုတ်ဖေက်ဇကုမွဲ ဇကုကေတ်ဇၞးမာန်မ္ဂး အရာသှေ်ဒၟံၚ်တံဂှ် ၜိုဟ်ဟ်သြိုဟ်ဟ်ရ။
Success is never ending and failure is never final.
ပေါဲအံၚ်ဇၞးဂှ် ကာလလဵုလေဝ် အိုတ်အာဟွံမွဲ ပွမဒးကျဂှ်လေဝ် ဆလအ်လေဝ် လက်ကရဴအိုတ်မွဲ ဟွံသေၚ်ရ။
