ကျာ်ဇၞော်အ္စာတၠ ပါလိတမဟာထေရ်ဂှ် ကောန်ဂကူမန်တံ တီမံၚ် ညးမၞိဟ်ဆာန်ဂကူရောၚ်။ ရဲဆာန်လိက်ပတ်တံလေဝ် စွံလဝ်အဆံၚ် သၟိၚ်လိက်ပတ်မန်တုဲ ပ္တိုန်မံၚ်ဂုဏ်စရာဲရ။ ဆေၚ်စပ်ကဵု ပရေၚ်ဂကူမ္ဂး ဟွံရုဲဒၞာဲ အာစိုပ် ကၠောန်ၜိုတ်မံၚ်လၟိုန်ရ။
အခိၚ်လၟုဟ်ဂှ် သၞံၚ်ကောန်ဂကူမွဲဍောၚ် ပြဟ်ဒတုံစှေ်အာတုဲ လျးကောန်ဂကူမန် ပယျးဇြစှေ်အာရ။ သၟိၚ်လိက်ပတ်မန် ဟွံမွဲတုဲ ဓဝိၚ်လိက်ပတ်မန် ဒးလုပ်ကၠုၚ်ရ။ ညးချူခၞံကၠုၚ်လိက်ပတ် လၟိဟ်ကဵုကၠံအုပ်ပြၚ်ၚ်တုဲ အ္စာကဝိမန်တံ ပ္တိုန်စလဝ်ညး ဒုတိယကျာ်ဇၞော်အစွောံ အ္စာခၞံပြကိုဟ်လိက်မန်ရ။
လိက်ပရိုၚ်ပၠတရဴသၞံၚ်တိုၚ်ပိုဲလေဝ် တမ်လိက်ကျာ်ဇၞော်အ္စာတၠ ပလံၚ်ဗစိုပ်နၚ်မ္ဂး စုတ်ကဵုမံၚ်လၟေၚ်ဍာံရ။ ပ္ဍဲကဵုတမ်လိက်ညးလေဝ် ထ္ၜးမံၚ်စိုတ်ဓာတ်ဆာန်ဂကူလၟိုန်တုဲ ဝေါဟာလိက်ညးချူဂှ်လေဝ် စိုပ်ဂြိုဟ် သမ္တီလောဲ ဂွံနဲ ညးဆာန်ဂကူကီုရ။
စပ်ကဵုရေၚ်တၠုၚ် ပရေၚ်ဂကူမန်မ္ဂး ရိုဟ်ရေၚ်ဟွံအိုတ်ရ။ ဗွဲတၟေၚ်တုန် ဂွံဓမံက်ပ္တိုန် တ္ၚဲကောန်ဂကူမန်လေဝ် ကျာ်ဇၞော်အ္စာတၠ ပါလုပ်မံၚ်ရ။ ပတိတ်လိက်ကၞပ်ပူဂဵုသၟးဟွံက လိက်ကၞပ်ဂကောံတံလေဝ် ကေၚ်ပ္တိတ်မံၚ်ရ။ လိက်ကၞပ်ကျာ်ဇၞော်အ္စာတၠတံ ပတိတ်လဝ် “ဍုၚ်မန်ကှ်ကှ် ရှ်ဟွံမွဲ”ဂှ် ပြာကတ်ကွေံရ။ ဟိုတ်နူကဵုလိက်ဏံဟေၚ် အလဵုအသဳတံ ဟနမတ် ရပ်ပၠောပ်သ္ၚိစာတ် နွံရ။
စပ်ကဵုဗော်ဍုၚ်မန်တၟိလေဝ် အခိၚ်ညးတၞဟ် ဟွံဂံၚ်အာကၠုၚ်ဆက်ဆောံတေံဂှ် ပိုဲဂွံဆဵုကေတ် ရုပ်ညး ပ္ဍဲကဵုကြက္ကဒိန်ဗော်ဍုၚ်မန်တၟိ၊ ဂျာနေဝ်ဍုၚ်မန်တၟိ ပ္ဍဲကဵုစၚ်ဗော်ဍုၚ်မန်တၟိတံရ။
စပ်ကဵုဂကောံလိက်ပတ်တံလေဝ် ကျာ်ဇၞော်အ္စာတၠဂှ် အဆံၚ်ကွာန်၊ အဆံၚ်ပွိုၚ်ဍုၚ်၊ အဆံၚ်အလုံဒေသရးမန် ကေတ်ကၠုၚ်လဝ် တာလျိုၚ်ရ။ မိၚ်ယၟုတီဂကူ ညာတ်ကယျိုၚ်တီဂကူတံဂှ် ဗွဟ်တိတ်ကဵု ကျာ်ဇၞော်အ္စာဏံရ။
သွာၚ်သာသနာလေဝ် ဟွံပါ်ဂိုဏ် ယိုက်ဂၠေၚ်ရေၚ်တၠုၚ် ပရေၚ်သာသနာ၊ ပရေၚ်ကောန်ဂကူ မွဲစွံကဵုသၚ်မန် ဂိုဏ်နာနာမာန်ရောၚ်။ မၞိဟ်ကၠောန်ပရေၚ်ဂကူမန်မ္ဂး ကျာ်ဇၞော်အ္စာသ္ဍိုက်မၠိုက်လောဲတုဲ စိုပ်ဒၞါဲညးမ္ဂး ဒုၚ်တၠုၚ် ဗွဲမအိုဟ်တၟိုဟ်လၟိုန်ရ။
လ္တူကျာ်ဇၞော်အ္စာတၠ ပါလိတမဟာထေရ် ကလိလောန်စဴအာသွဝ်ဂှ် အလဵုပူဂဵု၊ အလဵုဂကောံ၊ အလဵုဗော်၊ အလုံကောန်ဂကူမန် ဒးဂိုဟ်ကဟောံမံၚ်အိုတ်ရ။ ဗှ်ဗၞုဟ်ဂုဏ်ဟွံအိုတ် ဂုဏ်ဇၞော်လောန်ရ မိက်ဂွံဓမံက်ထ္ၜးဏာရ။
ကျာ်ဇၞော်အ္စာတၠ ပါလိတ က္ညစဴအာသွဝ်ဂှ် အောန်စိုတ်သက်ပတောံၜတ် ဟွံမွဲရ။ မၞိဟ်ဆာန်ဂကူဗီုညး၊ ချူလိက်ကၞပ် ခၞံပြကိုဟ်ဗီုညးမာန် ပ္ဍဲကဵုဂကူမန် ကဵုဂွံမံက်ဂတဝ် ဂၠိုၚ်ၚ်မာန်တုဲ ကျာ်ဇၞော်အ္စာတၠပါလိတ ကဵုဂွံက္ညစိုပ် ဌာန်ခိုဟ်ဘုံပြဲညိဂှ် ရာဏာဒၞာရ။
