ဝဏ္ဏမာန်၊ ဒဳဇြေမ်ဗာ ၃၁၊ ၂၀၂၁
တိုက်ဗှ်လိက်မှာထေရ်ပါလိတ ကေုာံ တိုက်ထ္ၜးပျးလိက်ပတ်မန် သိုၚ်ပတန်လဝ် ပ္ဍဲကဵု ဘာဓာတ်ကျာ်၊ ဍုၚ်ကၟာဝက် ရးဇြာဂှ် ဒးထိၚ်ဒဝ်မၚ်မွဲအာ စၞးဂကူမွဲထေက်ရောၚ် ပ္ဍဲကဵုပေဲါသဳကၠဳလိက်ပတ်မန် ကၠောန်ဗဒှ် ဗတံဂိတုမြေက္ကသဵု (၁၂) စွေက်ဂှ် အ္စာသဳကၠဳလိက်ပတ်ဂမၠိုၚ် သဳကၠဳပတိုန်ထ္ၜးရ။
စပ်ကဵုတိုက်ဗှ်လိက်မှာထေရ်ပါလိတ ကေုာံ တိုက်ထ္ၜးပျးလိက်ပတ်မန်ဂှ် ဗွဲကြဴနူကဵု ကျာ်ဇၞော်အ္စာတၠပါလိတ ဟွံမွဲတုဲ ဒးဒက်ပတန် ဂကောံ (ဝါ) ကမ္မတဳမွဲ သၠဲသၠဲလးလးတုဲ နကဵုဂကောံ (ဝါ) ကမ္မတဳဂှ် ဒးထိၚ်ဒဝ်မၚ်မွဲအာထေက်ရောၚ် အ္စာသဳကၠဳ တၠဂုဏ်အ္စာခေမာဝန္တ ဟီုသဳကၠဳဏာ သာ်ဝွံရ။
“စပ်ကဵုဂွံထိၚ်ဒဝ်မၚ်မွဲအာ တိုက်ဗှ်လိက်မှာထေရ်ပါလိတဏံဂှ် နူကဵုဂကောံမန်ဍုၚ်သၟာၚ်တံ ညးတံပတိတ်လဝ် လိက်လစွံစိုတ်ညးတံ နွံမံၚ် (၃) တၚ်၊ တၚ်စပ်ကဵုဂွံထိၚ်ဒဝ်မၚ်မွဲအာ တိုက်ဗှ်လိက်ဏံဂှ် ဒက်ပတန်ထောံ ဂကောံ မွဲမွဲကဵုဒှ် ကမ္မတဳမွဲမွဲကဵုဒှ်တုဲ နကဵုစၞးဂကူမန် ညံၚ်ဂွံထိၚ်ဒဝ်မၚ်မွဲအာ၊ လတူလညာတ်ဏံဂှ် တၠဂုဏ်လေဝ် ဒုၚ်တဲပေၚ် ပေၚ်” သာ်ဝွံ တၠဂုဏ်အ္စာ ခေမာဝန္တ ဟီုမြော်ရ။
တိုက်ဗှ်လိက်မှာထေရ်ပါလိတ ကေုာံ တိုက်ထ္ၜးပျးလိက်ပတ်မန်ဂှ် လၟုဟ်မ္ဂး လိက်ပတ်မန် ကျာ်ဇၞော်အ္စာတၠပါလိတ မချူခၞံလဝ် လၟိဟ်ဗၞတ် (၁၃၀) အုပ်ပြၚ်ပြၚ်ဂှ် စွံထ္ၜးပျးလဝ်တုဲ ပုရိသာဒ်အလုံဂကူမန်တံ ကၠုၚ်ဗဵုလ္ၚတ်မာန်ဂးတုဲ စွံ ပတန်ထ္ၜးပျးလဝ်ရ။
“ပ္ဍဲကဵုတိုက်ဗှ်လိက်ဏံဂှ် နူကဵုကျာ်ဇၞော်အ္စာတၠပါလိတ နွံမံၚ်တေံတေံရ ညးဟီုဗကန်လဝ်ကဵုပိုဲ ဂကောံအ္စာကၞေဟ် တံဂှ်၊ ညးရန်ကဵု အလုံဂကူမန် ညးပတန်လဝ် တိုက်ဗှ်လိက်ဏံဏောၚ်၊ အတိုၚ်ညးဟီုဗကန်လဝ်ဂှ်ရ ပိုဲလေဝ်ဒုၚ်တဲ စၟဳညာတ်ကေတ် တိုက်ဗှ်လိက်ဏံ ဒးဒှ်တိုက်ဗှ်လိက် သ္ပစၞးကဵုဂကူဏောၚ်” ဥက္ကဌဂကောံအ္စာကၞေဟ် နာဲအံၚ်ဇၞး ဟီုရ။
တိုက်ဗှ်လိက်မှာထေရ်ပါလိတ ကေုာံ တိုက်ထ္ၜးပျးလိက်ပတ်မန်ဂှ် စတံနူသၞာံ (၁၃၇၇) သၞာံ၊ ဂိတုမာ် (၃) မံက်ဂှ် စ သိုၚ်ပတန်လဝ်တိုက်ပိထပ်တုဲ ပ္ဍဲကဵုသက္ကရာဇ်ဍုၚ် (၁၃၇၉) သၞာံ၊ ဂိတုမာ် (၃) မံက်၊ ဂိတုဂျာန္နဝါရဳ (၁၉၊ ၂၀၁၈) ဂှ် ကၠောန်သဘၚ်စရိုဟ်ဍာ်တုဲ စပံက်လဝ် တိုက်ဗှ်လိက်မှာထေရ်ပါလိတ ကေုာံ တိုက်ထ္ၜးပျးလိက်ပတ်မန်ဝွံရ။
ပေဲါသဳကၠဳလိက်ပတ်မန် ကေုာံ တိုက်ဗှ်လိက်မှာထေရ်ပါလိဝွံ နူကဵုဂကောံအ္စာကၞေဟ်တံ ရန်တၟံကဵု ပတိုန်ဂုဏ်စရာဲ ကျာ်ဇၞော်အ္စာတၠပါလိတတုဲ တၠဂုဏ်အ္စာခေမာဝန္တ (ဘာဇာဒိသိုၚ်၊ ဍုၚ်ကၟာဝက်)၊ တၠဂုဏ်အ္စာဗာကုလ၊ နာဲမန်ရာဇာ၊ နာဲအံၚ်ဇၞး သဳကၠဳဏာ ပရေၚ်လိက်ပတ်မန် ဆက်စပ်ကဵု တိုက်ဗှ်လိက်မှာထေရ်ပါလိတရ။
