သ္ကိုပ်ပၞာန်ဝန်ဇၞော် နူကဵုဂကောံလိက်ကသုက်ပၞာန် အတ္တလာန်သၟဝ်ကျာ ဒပ်ပၞာန်”NATO” (North Atlantic Treaty Organization)ဂှ် ၆တၠ ဖျေံထောံလွဟ်တုဲ ဒးဒုၚ်ရပ်ထောံပ္ဍဲရုၚ်စက်သတဳ(စတီးစက်ရုံး)ဍုၚ်ရုယှာတအ်ဂှ်ဂးတုဲ ပရိုၚ်ပတောံမွဲပိုဒ် မံက်ပြးတိတ်ကၠုၚ်မံၚ် အကြာညးသုၚ်စောဲsocial mediaတအ် မွဲအလန်ပၠန်ရ။

ဗီုပြၚ်ချူပတိုန်လဝ်ဂှ်တှေ် “ဝန်ဇၞော်နေတိုး၆တၠ ဒးဒုၚ်ရပ်ထောံကဵုရုယှာတအ် ပ္ဍဲရုၚ်စက်သတဳ(စတီး) ဍုၚ်ရူခရိန်ဂှ်ယျ၊ ရုယှာတအ်ဂှ် ဟိုတ်နူကဵုဍေံတအ်မိက်ဂွံဂွံဂျိုၚ်ၚ်ဂှ်ရ ဍေံတအ်ဟွံဗတိုဟ်နကဵုမခတိုဟ်(ဗုံး)ဂှ်တုဲ ဍေံတအ် ရပ်ကေတ်ဏာဂျိုၚ်ၚ်ရ ” သာ်ဂွံ ဗီုပြၚ်ဗွဲမဂၠိုၚ် နူကဵုအကံက် “Kyaw Naing”ဂှ်မွဲကဆံၚ် ပတိုန်လဝ်ပရိုၚ်ဂှ်ရ။ တုဲပၠန် ညးမပါမံၚ် ပ္ဍဲဗီုဂှ်တှေ်ဒှ်မံၚ်သ္ကိုပ်ဝန်ဇၞော်“Eric Olson”ဂှ်တုဲ ညံၚ်ကဵုညးဒးဒုၚ်ရပ်လဝ်ကဵုပၞာန်ရုယှာတအ်ဂှ်ကီု ပတောံပတိုန်လဝ်ပရိုၚ်ဂှ် ဂွံဆဵုကေတ်ရ။ ပရိုၚ်ဂှ်တိုန်အာတုဲ မၞိဟ်ကလေၚ်ပါ်ပရအ်(share)လဝ် ၜိုတ်(၂၀)နွံကၠုၚ်ရ။ တုဲပၠန်နူကဵုPageတၞဟ်တအ်လေဝ် ကလေၚ်ပါ်ပရအ်မံၚ်ညးသ္ကအ်ဂှ် ဂွံဆဵုကေတ်မာန်ရ။

တၚ်စၟဳစၟတ်>>>>

ပရိုၚ်ဏံဂှ် နူကဵုဌာနစၟဳစၟတ်ပရိုၚ် ဒး၊ ဟွံဒး၊ ဒးချပ်ပိုဲတအ် ကလေၚ်စၟဳစၟတ်ရံၚ်တုဲ ပရိုၚ်ပတိုန်လဝ်ဏံဂှ် ဒှ်မံၚ်ပရိုၚ်ပတောံမွဲဂှ် ပိုဲစၟတ်သ္တီလဝ်ရ။ မုဟိုတ်ဂွံစၟတ်သ္တီလဝ် ပရိုၚ်ပတောံမွဲဂှ်တှေ် ပရိုၚ်ဒဒှ်ရ သ္ကိုပ်ဝန်ဇၞော်၆တၠဂှ် ဒးဒုၚ်ရပ်ထောံကဵဵုဒပ်ပၞာန်ရုယှာတအ်ဂှ် ပရိုၚ်ဖျေံလဝ်သ္ဂုတ်သွာတ်ချိုတ်တ်ဗၠိုတ်တ်ဏောၚ်ဟီုဂှ် နူဌာနပရိုၚ်လုပ်ကဵုသၞောဝ်မွဲလဵဵဵုလေဝ် ဟွံဂွံပတိုန်ထ္ၜးလဝ်ဏီရ။ တုဲပၠန် အတိုၚ်ညးဟီုမံၚ်ဂလာန်ပ္ဍဲဗီုဂှ်တှေ် ဒှ်မံၚ်ဗီုရုပ်သ္ကိုပ်ဝန်ဇၞော်ပၞာန်ဍာ် နူကဵုဍုၚ်အာမေရိကာန်တေံတုဲ “Eric Olson”ဂှ်တှေ် နူကဵုသၞာံ၂၀၁၁တေံရ ညးဒေါံဇူထောံလဝ် နူကဵုတာလျိုၚ်ညးဂှ်ရဏောၚ်ဂှ်လေဝ် ဂွံတီကေတ်ရ။ ပရိုၚ်ပတိုန်လဝ်တအ်ဂှ် တၚ်နၚ်ခိုၚ်ခိုၚ်ဂၠိုက်က်လေဝ် ဟွံမွဲမွဲသာ်တုဲ ညံၚ်မၞိဟ်ဗှ်လိက်ပရိုၚ်တအ် စိုတ်ဂွံလုပ်စမာန်ဂှ် တံၚ်ဂြဲလဝ်စိုတ် ညးသုၚ်စောဲsocial mediaတအ်မွဲဏောၚ်ဂှ်ရ ပရိုၚ်ဏံဂှ် ဒှ်မံၚ်ပရိုၚ်ဗၠေတ်တ်၊ ပရိုၚ်ကောလဟာလမွဲဂှ် ပိုဲစၟတ်သ္တီလဝ်ရ။

တၚ်သ္ရဳဂၠိပ်>>>>

ရံၚ်ကဵုဗွဲလ္တူဏံတုဲ  ပရိုၚ်ကောလဟာလ၊ ပရိုၚ်ဗၠေတ်တ်ဗီုဗီုတံဏံဂှ် ပရိုၚ်ဍုၚ်ပိုဲသၟးဟွံက၊ ပရိုၚ်နူဍုၚ်သ္အာၚ်တအ်လေဝ် မံက်ပြးတိတ်ကၠုၚ်မံၚ် အကြာဍုၚ်ပိုဲတအ် ကြပ်အရိုဟ်တ္ရဲဂှ်ရ စပ်ကဵုပရိုၚ်ပတောံတအ်တုဲ ပိုဲတအ်ထေက်ကဵုဒးစွံသတိရောၚ်။

ပရိုၚ်ပတောံအာလ္ပာ်ပရေံမွဲမွဲ ယဝ်ခါရပိုဲတအ် ဟွံတီကၠိုဟ်လ္တူပရိုၚ်ဂှ် ချိုတ်ဗၠိုတ်မွဲသာ်ဏီ ပိုဲပတှေ်ဒးအာမ္ဂး ဒှ်ကၠုၚ်ကဵုအန္တရာယ်ကဵုညးဍုၚ်ကွာန်ပိုဲတအ်ကီု၊ သီုကဵုသွက်ဘဝပိုဲတအ်မာန်ရ။ ဟိုတ်ဒှ်သာ်ဂှ်ရ ဆဵုတမ်ရိုဟ်ပရိုၚ်မွဲမွဲမ္ဂး ကၠာပိုဲတအ်ဟွံဂွံပါ်ပရအ်ဏီဂှ် ဂၠိုက်ဂၠာဲစၟဳစၟတ်ရံၚ် နူကဵုဌာနပရိုၚ်လုပ်ကဵုသၞောဝ်တအ် ချိုတ်တ်ဗၠိုတ်တ်ကၠာတုဲမှ ပတှေ်စှေ်စိုတ်ပါ်ပရအ်ညးဂှ် မိက်ဂွံဗတိုက်ဖ္အောဝ်ဏာကဵုကီုရ။