အံက်သာ၊ ဂိတုဂျောန် ၁၃၊ ၂၀၂၂

ပၟတ်စက်ဍေန်ဒၟံၚ် ပ္ဍဲကွာန်ဟၚ်ဂါံ ပွိုၚ်ဍုၚ်ရေဝ်သၠုၚ်ကျာဂှ် ၚုဟ်ကၠေၚ်စက်က္ဍၚ်လောန်အာဂှ်ရ တၠစက်တံ ဍေန်ဟွံကိတ်ဂးတုဲ နူကဵုဂိတုဂျောန် (၃) ဂှ် ဒေါံဍေန်အာရ၊ ရဲကွာန်တံဂှ် မံၚ်ကၠုၚ်ကဵုပၟတ်စက်တၟးတၟးလအ် ကၠုၚ်လဝ်တုဲ ပၟတ်စက်ဟၟဲဂှ် ဒှ်ဒဒိုက်အိုတ်ရ၊ ရဲကွာန်ဂမၠိုၚ် က္လေၚ်အာတ်မိက်တုဲ ဂိတုဂျောန် (၉) ဂှ် က္လေၚ်ဍေန်ကဵုရ။
“ပၟတ်ဂှ် ၚုဟ်မးက္ဍၚ်ဟဍေံ ပိုဲကဵုမာန်မံၚ်ရ၊ မံၚ်လဝ်ကဵုပၟတ်တၟးတၟးတုဲ ပၟတ်ဟၟဲဂှ် ဒဒိုက်ဟွံဍောတ်ပုဟ်၊ အဓိကဇၞော်အိုတ်ဂှ်ဖုၚ် ဖုၚ်ဂှ်ဒးသုၚ်စောဲမံၚ်ဇၟာပ်မၞိဟ်၊ ပၟတ်ဟၟဲတှေ် ဗီုလဵုဂွံပၠောပ်ဇြဟတ်ဍေံ၊ ရဲညးလိၚ်ပၠောပ်စဂှ် ဍေံကေတ်ၚုဟ်လိၚ် ပၠောပ်ဇြဟတ်ဖုၚ်မွဲမ (၁၀၀၀) ဒ္ကေဝ်၊ (၅၀၀) ဒ္ကေဝ်၊ (၁၅၀၀) ဒ္ကေဝ်လေဝ်နွံ၊ ဒးပၠောပ် မံၚ်အရိုဟ်တ္ၚဲတှေ် အလဵုအာကေတ်သြန်ရော၊ ခေတ်လၟုဟ်ဂှ် ဒးကၠောန်ကေမၠာန်ကဵုဖုၚ်သၟးရဂၠိုၚ်၊ အေဂှ်ရ ဒဒိုက်ပၟတ်ဟၟဲဏံ ဟွံသာလးလးဟဂှ်ရ” သာ်ဝွံ ကောန်ကွာန်ဟၚ်ဂါံမွဲတၠ ဟီုရ။
ဟိုတ်နူပၟတ်ဟၟဲတုဲ ကောန်ကွာန်လ္ၚဵုတံ ကော်ပ္ကောံညးသ္ကံတုဲ ဇက်ဂၠောဲအာကဵုတၠစက် အာတ်မိက်ပတိုန်ထ္ၜး သဳကၠဳညးသ္ကံတုဲ ကေတ်တၚ်တုပ်စိုတ်ညးသ္ကံ ကေတ်အာၚုဟ်မးခရိတ်ပၟတ် မွဲယူဏေတ်မ္ဂး သၠုၚ်နူၚုဟ်မးပၟတ်ဍုၚ်ရေဝ် (၃၀၀) ဒ္ကေဝ်ရ၊ သ္ၚိကေတ်လဝ်ပၟတ်တံဂှ် အောန်အိုတ် (၅) ယူဏေတ် ဒးကဵုဇၟာပ်ဂိတုရောၚ်၊ အခိၚ်ဍေန်ဂှ်လေဝ် ကုတ်ယှအ်ထောံ စနူအခိၚ်သဝ်တ္ၚဲ (၅) နာဍဳ စဵုကဵုဗတံ (၁၀) နာဍဳဟေၚ် ဍေန်အာတုဲ အခိၚ်နူဂယးဂှ် ဟွံဍေန်ကဵုရ၊ ပြဟ်ဟ်ဏံ “ဟိုတ်နူဟွံဂွံဆက်စၠောံလဝ်ကဵု ကမ္ပဏဳကၠေၚ်တံဏီတုဲ ဍေန်အာအခိၚ် ဆၜိုတ်ဏံကၠာ ကေတ်အဆက်ကဵု ကမ္ပဏဳကၠေၚ် တက်ကျာပြေပြံၚ်မ္ဂး ထပ်ဍေန်ကဵုအခိၚ်နူဂယးပၠန်” တၠစက်ပၟတ်ဂှ် ဟီုလဝ်နွံရောၚ်ဂှ် ဂွံတီကေတ် နူကဵုကောန်ကွာန်ဟၚ်ဂါံ နာဲမျေအ်ဒေန်ရ။
ပ္ဍဲကဵုတွဵုရးဍုၚ်မန် နွံ (၁၀) ပွိုၚ်ဍုၚ်ဂှ်မ္ဂး (၉) ပွိုၚ်ဍုၚ်ဂှ် ပၟတ်အလဵုအသဳ စိုပ်မံၚ်အိုတ်တုဲ သှေ်ဆပွိုၚ်ဍုၚ်ရေဝ် မွဲပွိုၚ်ဍုၚ်ဓဝ် ဟွံဂွံပၟတ်အလဵုအသဳဏီရ၊ ပ္ဍဲပွိုၚ်ဍုၚ်ရေဝ်ဂှ် ကွာန်လ္ၚဵုတံ ဍေန်မံၚ်နကဵုစက်ပူဂဵုလေဝ်နွံ စက်ဘာလကျာ်လေဝ်နွံ၊ နကဵုဂကောံကွာန်လေဝ်နွံတုဲ ကမ္ပဏဳဇၞော်ဇၞော်တံဂှ် လ္တူဍုၚ်ရေဝ် အၜဝ်၊ ဒူရာ၊ အစေန်၊ ပါၚ်ၜဳတံဂှ် ကမ္ပဏဳမျာတ်ဒူရ၊ ဒေသလၟိုၚ်တံဂှ် ပၟတ်ကမ္ပဏဳ (အေက်သ်အေမ်ဒဳ)၊ ရေဝ်သၠုၚ်ကျာ ကွာန်က္လအ်၊ ကအ်လှိုၚ်တံဂှ် ကမ္ပဏဳဇြဳဂေတ်တံ ဍေန်ဒၟံၚ်ရ၊ အခိၚ်လၟုဟ် မွဲယူဏေတ်မ္ဂး မွဲလ္ၚီဒ္ကေဝ်ပြၚ်ၚ်ဖအိုတ်ရောၚ် ဂွံတီကေတ်ရ။