မာံသုခ၊ ဂိတုဂျောန် ၁၃၊ ၂၀၂၂
ပ္ဍဲစၟတ်တ္ၚဲ (9.6.2022) ဂှ် ပ္ဍဲဘာတန်သၠုၚ်ကောန်ဂကူမန် (ဝၚ်သ္ပဝ်) ဟိုတ်နူကွးဘာကၠုၚ်တိုန်ဘာ ဂၠိုၚ်တုဲ သိုၚ်ခၞံကၠုၚ်ဘာဒၟံၚ်တၟိ သွက်ကွးဘာတအ်မွဲမနွံရ။
ပ္ဍဲအခိၚ်စအပ်ဘာ သၞာံ (၂၀၂၂ / ၂၀၂၃) ဏံ ကွးဘာနူဌာန်စုၚ် ဘာအလဵုအသဳ၊ ဘာကောန်ဂကူ ပြံၚ်စိုပ်ကၠုၚ် တိုန်ဘာ ပ္ဍဲဘာတန်သၠုၚ်ကောန်ဂကူမန် (ဝၚ်သ္ပဝ်) ဂၠိုၚ်တိုန်နူသၞာံတုဲဏံဂှ်ရ ဒၞာဲဇူဒၟံၚ်သွက်ကွးဘာဂွံရုံဂပ်မာန် ဒးသိုၚ်ခၞံကၠုၚ်ဒၞာဲတၟိဏံရ။
“ဒၞာဲဗ္တောန်လိက်ဂှ်တှေ် ၜိုတ်ဒှ်ကဵုဒှ် သၠဲပ္တိတ်ညိညတုဲမံၚ်အာ၊ ဒၞာဲကွးဘာဂွံဒၟံၚ်ဂှ်ဒေါံဟွံဂွံ ဒးသိုၚ်တွဵုလေဝ် ဍေံကြေပ်အာယျတှေ်၊ ဆ ဆလအ်တုဲဂှ်ဟွံတီ တန်တဴကဵုဇြဟတ်ဩန်ရ၊ လၟုဟ်ဂှ် ဩန်လေဝ် ဟွံသၠဲလးစကွေံ” သာ်ဏံ နာဲဆာန်လောန် ဂအုပ်ဘာတန်သၠုၚ် (ဝၚ်သ္ပဝ်) ဟီုရ။
ဘာဒၟံၚ်သွက်ကွးဘာဏံဝွံ သိုၚ်အာဇမၠိၚ် (၅၀) ဟတ်ကဵု အနာံဩိုဟ် (၁၈) ဟတ်တုဲ ဘာဒၟံၚ်ဏံတုဲဒှ်မ္ဂး ကွးဘာညးတြုံမၞုံမံၚ် ပ္ဍဲဘာထပ်လ္တူဂှ် ပြံၚ်မံၚ်အာ ဒၞာဲဒၟံၚ်သိုၚ်မံၚ်လၟုဟ်ဏံ မဒှ်ရ။
ဘာတန်သၠုၚ်ကောန်ဂကူမန် (ဝၚ်သ္ပဝ်) ဝွံ အဓိကကွးဘာနူဘာအလဵုအသဳ လ္ပာ်ပွိုၚ်ဍုၚ်ရေဝ်သၟဝ်ကျာ၊ ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်ကအ်ကြိက်၊ ပွိုၚ်ဍုၚ်ကျာ်မြဟ်တအ်ဂှ် ပြံၚ်စိုပ်ကၠုၚ် ပ္ဍဲဘာတန်သၠုၚ်ကောန်ဂကူမန် (ဝၚ်သ္ပဝ်) ဏံ ဂၠိုၚ်ရ။
ကွးဘာ ပ္ဍဲဘာတန်သၠုၚ်ကောန်ဂကူမန်ဂှ် ဂၠိုၚ်တိုန်မံၚ်လၟေၚ်သၞာံတုဲ သၞာံဗ္တောန်ပညာ (၂၀၂၁ / ၂၀၂၂) တုဲဏံ လၟိဟ်ကွးဘာ (၃၃၀) တၠပြၚ်တုဲ သၞာံဏံ ပြဟ်ပြဟ်ဂွံလဝ်စရၚ်လၟိဟ်ကွးဘာ (၅၄၀) တၠပြၚ်မံၚ်ယျရောၚ် ဂွံတီကေတ်ရ။
ပ္ဍဲဘာတန်သၠုၚ်ကောန်ဂကူမန် (ဝၚ်သ္ပဝ်) ဝွံ သၞာံတုဲဟိုတ်နူကွးဘာဂၠိုၚ် ဒၞာဲခန်ဗ္တောန်လိက် မံၚ်ဟွံရုံဂပ်တုဲ ကွးဘာလၟိဟ်ကဵုစှော် ဒးဗ္တောန်ကတ်လ္ၚတ်မံၚ်လိက် ပ္ဍဲဒၞာဲရုၚ်ပုၚ်တအ်နွံရ။
