မွဲအခိင်ကဵု ပဋိပက္ခရပ်လွဟ် အဃောသ္ကာတ်မြဟ်ဒၟံင် ကြပ်အလုံမွဲဍုင်ဂှ် ညးဇၞော်ကံင်ဇြဳပၞာန် သ္ကိုပ်ပၞာန် မေန်အံင်လှာင် ရပ်စပ်စကာ မအရေဝ် ဂၠာဲသွဟ်နနဲပရေင်ဍုင်ကွာန်တုဲ ဟီုဂးကၠုင်အဆက်က်နွံရ။
ပ္ဍဲတ္ရဲဏအ် ကၠောန်ဗဒှ်လဝ် တ္ရဲတွဵုရးကချေင် မရနုက်ကဵု (၇၇) သၞာံတုဲ နူသ္ကိုပ်ပၞာန်မေန်အံင်လှာင် ပလံင်ဗ္စိုပ်ဏာ လိက်သဝဏ်ဂှ်လေဝ် စကာလဝ်မအရေဝ် သွက်ဂွံဂၠာဲအာသွဟ် နနဲပရေင်ဍုင်ကွာန်ဂှ်ပၠန်ရ။
ပ္ဍဲအရာမဗမံက်ရုပ်ရဴ ပရေင်ၜိုဟ်လလမ်ဂှ် မ္ဒးဂၠာဲအာသွဟ် ပ္ဍဲလ္တူခုင် တက်ကျာပ္ညဳပ္ညပ်ကေတ် နနဲကဲ ပရေင်ဍုင်ကွာန်ဟေင် က္လိဂွံအံင်ဇၞးမာန်ဏောင် ပ္ဍဲလိက်သဝဏ် သ္ကိုပ်ပၞာန်မေန်အံင်လှာင် ပလံင်ဗ္စိုပ်လဝ်ကဵု တ္ရဲတွဵုရးကချေင်ဂှ် ချူဗမံက်လဝ်ရ။
တုဲပၠန် ပွမကွာ်ဖ္ဍောန်ဗက်လ္တူဂၠံင်တရဴ ဒဳမဝ်ကရေဇြဳ ကေုာံ ကၠတ်ထဝ်ဂှ် ဒှ်အထံက်အရီု သွက်ပရေင်ၜိုဟ်လလမ်ကၟိန်ဍုင်ရောင် ဆက်သ္ဂးလဝ်ရ။
နကဵုသ္ကိုပ်ပၞာန် မေန်အံင်လှာင်ဝွံ ပ္ဍဲအရာမပလံင်ဗ္စိုပ်လိက်သဝဏ်ကဵု တ္ရဲတၟေင် တ္ရဲပြဲ ဂကူကောန်ဍုင်အရင်တအ်မ္ဂး စကာမအရေဝ် ပရေင်ၜိုဟ်လလမ် ကေုာံ ပရေင်ဒေါံပန်ပှော်တအ်တုဲ ဟီုဂးကၠုင်မံင်အဆက်က်နွံရ။
မွဲလ္ပာ်ဂှ် နူကဵုဒပ်ကံင်ဇြဳပၞာန်တအ် စကာက္ၜင်ကျာဗ္တိုက်ပၞာန် ကေုာံ လွဟ်ဇၞော်ဂမၠိုင်တုဲ ပန်ဖျေံဗမ် အကြာညးဍုင်ကွာန်တအ် ဟွံပိုတ်သ္ကုတ်ကီုရ။
အကာဲအရာဗလးတိဇေတ်တ်ဝွံ ပ္ဍဲတွဵုရးကချေင်ဂှ် ပေါဲဗ္တိုက်အကြာဒပ်ကံင်ဇြဳပၞာန်ဗမာကဵု ဒပ်ပၞာန်ဗၠးၜးကချေင် KIA တအ် သ္ကာတ်မြဟ်မံင်တုဲ စဵုကဵုအခိင်လၟုဟ် ဗ္ဒိုပ်ကံင်ဇြဳပၞာန်ဗမာ ဗၞတ် ၃၁၀ ဒၞါဲပြင် စိုပ်အာလဝ်သၟဝ်တဲ ဒပ်ပၞာန် KIA တအ်ရ။
အကြာပွိုင်မွဲၜါတ္ရဲဏအ်လေဝ် လ္ပာ်ဒပ်ပၞာန်ဗၠးၜးကချေင် KIA တအ် လုပ်သီဂွံလဝ် ဍုင်မာန်သဳတုဲ ဆက်ဍိုက်ဗ္တိုက်ဒၟံင် ဍုင်ဇၞော်မရနုက်ကဵုဒုတိယ ဍုင်ဗါန်မဝ်ဖိုဟ်ရောင် ပ္ဍဲပရိုင်ဒေသကချေင်ဂမၠိုင် ချူဓမံက်လဝ်အိုတ်ရ။
