ကွးဘာတန်ဇၞော်ဇၞော် ပ္ဍဲဘာကောန်ဂကူမန် ဗွိုင်ပ္ဍဲဍုင် ဘာလ္ၚဵုဂှ် မိမတံကော်ပတိတ်ဏာ အာကၠောန်စဍုင်သေံ နွံဂၠိုင်မံင်ရောင် ဂွံတီကေတ် နူကဵုအ္စာဘာကောန်ဂကူမန်တအ် ဟီုရ။
နကဵုမိမတံဂှ် ထ္ၜးဟိုတ်ကဵု ပရေင်ဒးကၠောန် ပါတ်သပေါတ် (Passport) သွက်ဂွံအာဍုင်သေံဂးတုဲ ကွးဘာတန်ဇၞော်ဇၞော် စကာကမၠောန်ဂွံ ဗွဲမဂၠိုင်ဂှ် မိမကွးဘာတံ ကော်နုက်ပတိတ်ဘာ ကတဵုဒှ်နွံဂၠိုင်ကၠုင်ရောင် အ္စာဘာဂှ် သ္ဂးရ။
“နကဵုမိမကွးဘာတံဂှ် ထ္ၜးကၠုင်ဟိုတ် အခိင်ဏံ ပ္ဍဲဍုင်သေံတေံ ဍေံကၠောန်တက်ကဵု ပါတ်သပါတ် သွက်ကောန်ကမၠောန်တၟိတံ ဂးတုဲတှ်ေ ကောန်ကွးဘာတန်ဇၞော်ဇၞော် စကာကမၠောန်ဂွံတံဂှ် ကော်နုက်ပတိတ်ဘာတုဲတှ်ေ ကဵုဗက်အာမိမ ကၠောန်စဍုင်သေံနွံဂၠိုင်ကွေံကွေံ၊ ကိစ္စဏံ ပ္ဍဲဘာကောန်ဂကူမန်ပိုဲ ဗွိုင်ပ္ဍဲဍုင်ဏံတှ်ေ ကတဵုဒှ်မံင် ဇၟာပ်ဘာ ဟီုကြပ်ဂွံမံင်” သာ်ဝွံ အ္စာဘာ မၞုံတာလျိုင် ကဆံၚ်ပွိုင်ဍုင်မွဲတၠ ဟီုထ္ၜးရ။
မိမကွးဘာတံ ထ္ၜးဟိုတ်ကဵု ပရေင်ဒးကၠောန်ကာဒ်ကမၠောန်၊ ဒးကၠောန်ပါတ်သပေါတ် ပၟိက်ကိစ္စဇၞော်မံင်ဂးတုဲ နကဵုဂအုပ်ဘာ အ္စာဘာတံ ဟွံကဵုအခေါင်လေဝ် နကဵုမိမတံ ကော်ဏာကောန်ဇာတ်တံ ကဵုဗက်အာကရောံမိမတံ အာကၠောန်ကမၠောန်ပ္ဍဲဍုင်သေံ ကတဵုဒှ်နွံဂၠိုင်ရ။
“ပ္ဍဲဘာပိုဲတှ်ေ မိမကွးဘာတံ ကော်ဏာကဵုအာသေံ ၜိုတ် ၁၀ တၠပြင် ဒှ်မံၚ်၊ အခိင်ညးကၠုင် နုက်တိတ်ဘာဂှ် ပိုဲဟွံကဵု အခေါင်ပုဟ် မုဒှ်ခက်ခုဲရောတှ်ေ အရာပိုဲသ္ပမာန်ဂှ် ပိုဲဘိုင်ဖ္ဍိုက်ဗပေင်ကဵု ဟီုလေဝ် မိမတံဂှ် ဟွံကလင်ပုဟ် ညးကော်ဏာကောန်ညး ကဵုအာဍုင်သေံတွဵုတှ်ေ ညးကဵုတိတ်ဘာ၊ သၞောဝ်ပ္ဍဲဘာပိုဲတှ်ေ မိမတံကော်ပတိတ် ကဵုဒေါံဘာလေဝ် ပိုဲဟွံဇိုတ်စရင်ပုဟ်၊ ဆဂး ပေင်ပွိုင် ၃ ဂိတု ကွးဘာဂှ် ဟွံတိုန်ဘာပုဟ်တှ်ေ ပိုဲဒးဇိုတ်စရင်၊ ကွးဘာဂှ် စရင်တိတ်နူဘာ အခိင်ဂှ်မှ ပိုဲဇိုတ်” သာ်ဝွံ အ္စာဗြဴ နူဘာတန်မူလလောန် ဘာကောန်ဂကူမန်မွဲတၠ ဟီုရ။
ကိစ္စကွးဘာတန်ဇၞော်ဇၞော်လ္ၚဵုတေံမိမကော်ပတိတ်ဏာ ကွးဘာတံ ကဵုဒေါံဘာတုဲ ကဵုဗက်အာကၠောန်စပ္ဍ္ဍဲဍုင်သေံဂှ် ဘာလ္ၚဵုဂှ် ကွးဘာ ၂၀ တၠပြင်၊ ဘာဍောတ်မ္ဂး ၁၀ တၠပြင်နွံတုဲ အခိင်ပ္ဍဲဍုင်သေံဂှ် ပံက်ကဵုအခေါင် ကၠောန်ကာဒ်ကမၠောန်၊ ကၠောန်ပါတ်သပေါတ် သွက်ကောန်ကမၠောန်တၟိတံ ကတဵုဒှ်ဂၠိုင်ရ။
အပ္ဍဲဒေသရးဍုင်မန်ဂှ် ဗွဲကြဴနူကဵုဒပ်ပၞာန်ဗမာတံ သီအဝဵုတုဲဂှ် ကွးဘာနူဘာတန်အလဵုအသဳဗွဲမဂၠိုင် ပြံင်လုပ်ကၠုင် ပ္ဍဲဘာကောန်ဂကူမန် ကတဵုဒှ်ဂၠိုင်တုဲ မိမကွးဘာဗွဲမဂၠိုင်တံလေဝ် တိတ်အာကၠောန်စမံင် ပ္ဍဲဍုင်သေံ ကေုာံ ဍုင်မ္ၚးတၞဟ်ဟ်တံ နွံဂၠိုင်ရောင် ဂွံတီကေတ်ရ။
