စပ်ကဵုပရေင်ဂီုကၠီုဂကူမ္ဂး ပ္ဍဲကောံဓရီုဇၞော်ပရေင်ဂကူမန် သၞာံ (၂၀၂၅) ဏံ ဒးသဳကၠဳထေက်ရောင် သၟာပရေင်ဍုင်ကွာန်လ္ၚဵု စှေ်စိုတ်ရ။
ကောံဓရီုဇၞော်ပရေင်ဂကူမန် သၞာံ (၂၀၂၅) ဏံဂှ် သွက်ဂွံကၠောန်အာ ပ္ဍဲဂိတုအေပရဴ (၂) စဵုစိုပ် (၅) ပွိုင် (၄) တ္ၚဲ သွက်ဂွံကၠောန်အာ လတူဍုင်မတ်မလီု ပ္ဍဲဘာဓာတုမာလာတုဲ ရံင်ကဵုအကာဲအရာ ပရေင်ဍုင်ကွာန်တ္ၚဲဏံတုဲ စပ်ကဵုပရေင်ဂီုကၠီုဂကူဂှ် ဒးသဳကၠဳအာထေက်ရောင် သၟာပရေင်ဍုင်ကွာန်မ္ၚးဗော်မွဲတၠ ဟီုဗီုဏံရ။
“ရံင်ကဵုအခိင်အကာဲအရာ ပရေင်ဍုင်ကွာန်တ္ၚဲဏံတုဲတှေ် ပ္ဍဲကောံဓရီုဇၞော်ပရေင်ဂကူမန် သွက်ဂွံကၠောန်ဗဒှ်အာ ပ္ဍဲအေပရဴမံက်ဏံဂှ် စပ်ကဵုပရေင်ဂီုကၠီုဂကူတုဲတှေ် ဗီုလဵုဂွံဖျေံအာဗီု နကဵုပရေင်ဂကူဂှ် ဒးသဳကၠဳအာ ထေက်ဏောင်စှေ်စိုတ်” သာ်ဝွံ သ္ဂးရ။
ကောံဓရီုဇၞော်ပရေင်ဂကူမန် သၞာံ (၂၀၂၅) ဂှ် စပ်ကဵုပရေင်ဓဝ်ညဳသာဂကူကီု၊ သွက်ဂွံသ္ၚဳဂၠိပ်အာ သဇိုင်သၞောဝ်ဥပဒေ ဒက်ပတန်ဍုင်မန်ရာမညကီု၊ သွက်ဂွံသ္ၚဳဂၠိပ်အာ သဇိုင်မူကၟိန်ဍုင်ပံင်ကောံဖေဝ်ဒရာကီု၊ သွက်ဂွံသ္ၚဳဂၠိပ်အာ မူဝါဒစပ်ကဵု ပရေင်ဂကူသွာင်နာနာကီု နွံရောင် ချူဓမံက်လဝ်ပ္ဍဲလိက်ဘိက်နွံဂှ် ဂွံဆဵုကေတ်ရ။
“ပရေင်ဂီုကၠီုဂကူဂှ် ပ္ဍဲကဵုသဇိုင်သၞောဝ်ဒက်ပတန်ဍုင်မန်ရာမညဂှ်လေဝ် ချူဓဇက်နွံလဝ်တုဲတုဲမံင်ရ၊ ပ္ဍဲကဵုမူဝါဒသၟတ်မန်တံလေဝ် ချူလဝ်တုဲ သ္ပလဝ်ဒတန်တုဲမံင်ရရဏောင်၊ လညာတ်ပိုဲတှေ် ပ္ဍဲကဵုသဇိုင်မူချူလဝ်တေံတေံဂှ်ရ စုတ်အာအစဳဇန်သဳကၠဳ သွက်ဂွံလးဖျေံကမၠောန် ပ္ဍဲကောံဓရီုဇၞော်ဏံထေက်၊ နူဂှ်မွဲကဆံင် အတိုင်ညးစၞးဂမၠိုင် သဳကၠဳဂွံတင်တုပ်စိုတ်ဂှ် ဆက်ဗမံက်အာရုပ်ရဴတှေ် လၟေင်ကေမၠာန်စပ်ကဵုပရေင်ဂီုကၠီုဂကူဂှ် ရုပ်ရဴဍေံမံက်တိုန်ဏောင်” ညးဆက်ဟီုရ။
စပ်ကဵုပရေင်ဂီုကၠီုစဵုဒၞာဂကူဂှ် ပ္ဍဲကဵုလိက်သဇိုင်သၞောဝ်ဒက်ပ္တန်ဍုင်မန်ရာမည အခန် (၉) တင် (က) ဂှ် စပ်ကဵုပရေင်ဂီုကၠီုတုဲ ဇၟာပ်ကောန်ဍုင်မန်ရာမည တာလျိုင်နွံတုဲ တင် (ခ) ဂှ် ဇၟာပ်ကောန်ဍုင်မန်ရာမည ပေင်အာယုက် (၁၈) သၞာံတုဲ အကြာ (၃၅) သၞာံဂှ် ဒးကေတ်တာလျိုင်ယိုက်ဂၠေင် ဒပ်ပၞာန်စဵုဒၞာဍုင်မန်ရာမည အောန်အိုတ် (၂) သၞာံ ဒးယိုက်ဂၠေင်ရောင် ချုဓမံက်လဝ်ရ။
