ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ဝွံ ဂိတုဂျောန် စၟတ်တ္ၚဲ (၂၈) တုဲကၠုၚ်ဏံဂှ် ဆဵုဂဗညးသ္ကံ ပ္ဍဲဘာသုဓမ္မဝတဳ၊ ဍုၚ်ၜၚ်ကံက်တုဲ ဒက်ပ္တန်ဏာ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဍုၚ်သေံ ဗွဲမအံၚ်ဇၞးရောၚ် ဂွံတီကေတ်ရ။
ဂကောံပံၚ်ကောံမန်ၜါဍုၚ် (ဍုၚ်သေံ-ဍုၚ်မန်) မဒက်ပ္တန်လဝ် ပ္ဍဲအသေအဟာန် တ္ၚဲကောန်ဂကူမန် မရနုက်ကဵု (၇၉) ဝါ ပ္ဍဲသုဘာန်ၜုရဳဂှ်ဝွံ ကိစ္စပရေၚ်ကောန်ဂကူ အကြာၜါဍုၚ်ဂှ် စရေၚ်တၠုၚ်ဏာ အလန်ကိုပ်ကၠာအိုတ်ရ။
ဆေၚ်စပ်ကဵုကိစ္စလိက်ပတ်တုဲ သွက်လၟေၚ်ကမၠောန်ဂတတေံဂှ် ဆက်ကၠောန်သ္ပအာ ပရေၚ်ပါ်ပရအ်တာလျိုၚ်ရောၚ် ဥက္ကဌဂကောံလိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် ဟီုရ။
“တ္ၚဲစပံက်ဂကောံဏံဂှ်ရ လမျီုလုပ်အာဗဗွဲဓဝ်ရ။ သွက်လၟေၚ်ကမၠောန်ဂတတေံတှေ် ကၠောန်သ္ပအာ ပရေၚ်ပါ်ပရအ်တာလျိုၚ်ဏောၚ်။ အဓိက ကောန်ၚာ်မန် နွံပ္ဍဲဍုၚ်သေံတံ ရန်တၟံ ဂွံဗ္တောန်ကဵုလိက်မန်ရ။ အခေါၚ်အရာသွဟ်လိက်မာန် မိက်ဂွံကဵုနွံရ” သာ်ဝွံ ဟီုရ။
ပ္ဍဲကၟိန်ဍုၚ်သေံဝွံ လ္တူကၠောန်သ္ပသၠုၚ်ပ္တိုန်အသိၚ် ကိစ္စလိက်ပတ် ကေုာံ ယေန်သၞာၚ်ဗုဒ္ဓဘာသာမာန်ဂှ် ညးဍုၚ်ကွာန်မန် မနွံပ္ဍဲဒေသနာနာတံ ဒုၚ်တၠုၚ်မိပ်စိုတ်ရဂှ်လေဝ် ညးဆက်ဟီုလဝ်ရ။
ပ္ဍဲကၟိန်ဍုၚ်သေံဝွံ သွက်ဂွံဗ္တောန်လိက်ပတ်မန်ဗဗွဲဓဝ် ပ္ဍဲအခိၚ်တၟာတ်ဘာတန်ဂှ် ညးဍုၚ်ကွာန်မန်စိုပ်ဍုၚ်သေံဂမၠိုၚ်၊ ခၟဳသၚ်မန်ဂမၠိုၚ်၊ ကွးဘာနူတက္ကသဵုမဟာစုလာလံၚ်ကန်ဂမၠိုၚ် ဘိုၚ်ရေၚ်တၠုၚ်ကဵုမံၚ်ရောၚ် ဂွံတီကေတ်ရ။
ညးဍုၚ်ကွာန်မန်ဂမၠိုၚ် အဃောစိုတ်လုပ်စဒၟံၚ်ကဵု ကိစ္စပရေၚ်ကောန်ဂကူမန်ဂှ် ကၠောန်သ္ပရေၚ်တၠုၚ် သၠုၚ်ပ္တိုန်အသိၚ် လိက်ပတ် ကေုာံ ယေန်သၞာၚ်ဗုဒ္ဓဘာသာမ္ဂး အနာဂတ်တေံ သၟတ်မန်ဂမၠိုၚ် တီကၠိုဟ်ကၠုၚ် ပရူဝၚ် ကေုာံ လိက်ပတ်မန် ဂၠိုၚ်ကၠုၚ်ရောၚ် ဂးရ။
ညံၚ်ရဴကၟိန်ဍုၚ်သေံကီု ကၟိန်ဍုၚ်မလေဝ်ယှာကဵု သေၚ်ကာပေါဝ်ဂှ်လေဝ် အကြာညးတာလျိုၚ်မန်ၜါဍုၚ်တံ ဆဵုဂဗညးသ္ကံတုဲ သွက်ဂွံရေၚ်တၠုၚ်ကၠောန်သ္ပအာ လၟေၚ်ကမၠောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာနွံရ။
သြန်ဂအုံစရိတ်ပ္တိုန်ဂုန်စရာဲလိက်ပတ်မန် မဒှ်တၚ်ကော်ဆော ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ဂှ်လေဝ် ကောန်ဂကူမန်မစိုပ်ဍုၚ်မ္ၚးဂမၠိုၚ် သွက်ဂွံဆက်စၠောံရေၚ်တၠုၚ်အာနွံရဂှ်လေဝ် ဂွံတီကေတ်ရ။
ပ္ဍဲသက္ကရာဇ် (၁၃၆၀) သၞာံ လောန်ကၠုၚ်တေံ ခၟဳသၚ်မန်ဂမၠိုၚ်ကဵု ပူဂဵုဆာန်ဂကူမန်ဂမၠိုၚ်တံ ပံၚ်ကောံက္ဍိုက်က္ဍိုပ်တုဲ နကဵုပွိုၚ်ဍုၚ် (၆) ပွိုၚ်ဍုၚ်ဂှ် စဒက်ပ္တန်လဝ် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ရ။
အခိၚ်လၟုဟ်ဏံဝွံ နူကဵုဒေသမန်၊ ကရေၚ်၊ တၞၚ်သဳ၊ ဗ္ဂေါဂှ် စဵုကဵု (၂၅) ပွိုၚ်ဍုၚ် ပံၚ်ကောံပါလုပ်ကၠုၚ်တုဲ စဵုကဵုကၟိန်ဍုၚ်ဇိုၚ်ဝုတ်ဒိုဟ်ဂမၠိုၚ်လေဝ် ဆက်စၠောံရေၚ်တၠုၚ်ကၠုၚ်နွံရ။