ဂကောံဒပ်ဗၠာဲသၟိၚ်ဒေသ ကေုာံ ညးတာလျိုၚ်သၞေဟ်ကၚ်စၟဳစၟတ် သၚ်ခဠၜုရဳ (ဝၚ်က)၊ ခရိုၚ်ကာန်ခဏၜုရဳ (ကမ္မရဳ) တံဝွံ ပ္ဍဲဂိတုဂျောန် စၟတ်တ္ၚဲ (၂၇) တုဲကၠုၚ်ဏံ အပ္ဍဲပွိုၚ်မွဲတ္ၚဲဓဝ်ဂှ် ရပ်ဂွံ ကောန်ဍုၚ်ကြုက် လုပ်စိုပ်ကၠုၚ် နဟွံလုပ်သၞောဝ် (၃) တၠကဵု ညးထ္ၜးဂၠံၚ် (၁) တၠကီု သီုသၟာကမၠောန်ဆုဲပြံၚ်ဗၟာ (၁၈) တၠနွံရောၚ် ဂွံတီကေတ်ရ။
ဂိတုဂျောန် (၂၇) ၊ အခိၚ်နူဂယး (၁၁းဝဝ) နာဍဳ အဃောဂကောံဒပ်ဂီုကၠီုဂမၠိုၚ် ကၠောန်သ္ပမံၚ်ပရေၚ်စၟဳစၟတ် ပ္ဍဲသၞေဟ်ကၚ်စၟဳစၟတ်ဒဒန်ဗု (ဒဒန်ရာန်တဳ) ဂှ် စၟဳစၟတ်ဏာလိက်သက်သဳ ကောန်ဍုၚ်ကြုက်ဍိုက်ဗက်ကၠုၚ်ကွဳသၠာပိ (၂) တၠဂှ် အာယုက်လိက်ဗဳဇြာအိုတ်မံၚ်ရ။
အပ္ဍဲတ္ၚဲဂှ်ရ ပ္ဍဲသၞေဟ်ကၚ်စၟဳစၟတ်ဒဒန်ဗုဂှ် ကောန်ဍုၚ်ကြုက် အာယုက် (၂၃) သၞာံ မွဲတၠ လိက်ပါမေတ်အာယုက်အိုတ် ဒၟံၚ်တန်ဒဴမံၚ် ဟွံလုပ်သၞောဝ်ဂှ်လေဝ် ဂွံဆဵုကေတ်ရ။
ဟိုတ်ဂှ်ရ ကောန်ဍုၚ်ကြုက်တံဂှ်ကဵု ညးထ္ၜးဂၠံၚ် ဒဳကွဳသၠာပိမွဲတၠဂှ် ရပ်ဏာလဝ်တုဲ သွက်ဂွံစောဲဂဗုတ်မာန်ဂှ် ပလံၚ်ဏာလဝ် ဗဒိုပ်ဗၠာဲသၟိၚ်ဝၚ်ကရ။
ပ္ဍဲဂိတုဂျောန် (၂၇) ၊ အခိၚ်ဗ္တံဂှ်လေဝ် သၟာကမၠောန်ဆုဲပြံၚ်ဗၟာ လုပ်စိုပ်ဒၟံၚ် ပ္ဍဲဂၠံၚ်သဘာဝ၊ လ္ပာ်ပလိုတ်ကၠအ်လိမဴ၊ ပွိုၚ်ဍုၚ်ဝၚ်က (သၚ်ခဠၜုရဳ) ဂှ် နူညးတာလျိုၚ်သေံတံ ဒစးဒုၚ်ဂွံလဝ်ပရိုၚ်တုဲ အာစိုပ်ဂၠိုက်ဂၠာဲရပ်စပ်လဝ်ရ။
နူကဵုပရေၚ်စၟဳစၟတ် ညးတာလျိုၚ်အုပ်ဓုပ်ဒေသ၊ ဂကောံဒပ်ဗၠာဲသၟိၚ်မၚ်ပယျဵု၊ ဗဒိုပ်ဗၠာဲသၟိၚ်ဝၚ်က ကေုာံ သၞေဟ်ကၚ်စၟဳစၟတ်တၞံပကုက်မွဲတဆံၚ်ဂှ် ပ္တိုန်ထ္ၜးလိက်သက်သဳ ပရေၚ်ကောပ်ကာဲမၞိဟ်လုပ်တိတ်ဟွံမာန်တုဲ သၟာကမၠောန်ဆုဲပြံၚ်ဗၟာ ဟွံလုပ်သၞောဝ် (၁၈) တၠတံဂှ်လေဝ် ရပ်ဂွံလဝ်ရ။
နကဵုတၚ်ရန်တၟံ သွက်ဂွံကၠောန်ကမၠောန် ပ္ဍဲဍုၚ်သေံဟေၚ် တိတ်ကၠုၚ်နူဍုၚ်ဗၟာရောၚ် ဟီုဂးဒုၚ်လဝ်ဝန်တုဲ သွက်ဂွံကၠောန်သ္ပ ပရေၚ်စၟဳစၟတ်ညးတံမာန်ဂှ် လှောဲပြံၚ်ဏာလဝ် ဇရေၚ်ညးတာလျိုၚ်ဂၠိုက်ဂၠာဲစၟဳစၟတ်ဝၚ်က (သၚ်ခဠၜုရဳ) ဂှ်ရောၚ် ဂွံတီကေတ်ရ။
ပ္ဍဲဂၠံၚ်ဂြိုပ်ဝၚ်က (သၚ်ခဠၜုရဳ) ကဵု သၞေဟ်ကၚ်စၟဳစၟတ်ဂမၠိုၚ်ဂှ် ကောန်ဍုၚ်သၟာၚ် ဟွံလုပ်သၞောဝ်တံ လုပ်စိုပ်ဒၟံၚ်မွဲနှေံမွဲနှေံဂှ်ရ စနူဂိတုဂျောန် (၂၈) နူတနေံဏံတုဲ ဂၠံၚ်လုပ်တိတ်အာကၠုၚ်ဒၟံၚ် နကဵုဓဝ်ကၠိုဟ်ခၠၚ်ၜါလ္ပာ် ပ္ဍဲဒေသပယျဵုကျာ်ပိဂှ် ဗက်ဂၠိုက်ဂၠာဲတၟာတ်မံၚ်ရောၚ် ဂွံတီကေတ်ရ။