ဘာကောန်ဂကူမန်တန်သၠုၚ် မၞုံသၟဝ်ဌာနပရေၚ်ပညာကောန်ဂကူမန်၊ ဗော်ဍုၚ်မန်တၟိဝွံ ပ္ဍဲသၞာံ (၂၀၂၆) ဏံ ကွးဘာအံၚ်တန်လုပ်တက္ကသဵု (၁၃) တၠ နွံရဂှ် ဂွံတီကေတ် နူညးတာလျိုၚ်ဘာတံရ။
ပ္ဍဲပေဲါသၟာန်သွဟ်လိက်တန်လုပ်တက္ကသဵု သၞာံ (၂၀၂၆) ဏံဝွံ ကွးဘာ နူဘာတန်သၠုၚ်ညဳသာ (၁၈) တၠ၊ ဘာဝၚ်သပဝ် (၃၆) တၠ၊ ဘာအၚ်ဒၚ် (၂၀) တၠ ကေုာံ ဘာတန်သၠုၚ်ပါ်ပ္ၚ (၂) တၠနွံတုဲ သီုဖအိုတ် ကွးဘာလုပ်သွဟ် (၇၆) တၠနွံရောၚ် ဂွံတီကေတ်ရ။
ပ္ဍဲပေဲါသၟာန်သွဟ်လိက်တန်လုပ်တက္ကသဵု သၞာံ (၂၀၂၆) ဏံဝွံ သၟာၚ်နူကွးဘာ ဘာကောန်ဂကူမန် လုပ်သွဟ်အောန်တုဲ လၟိဟ်အံၚ်လေဝ်အောန်မံၚ်ရောၚ် အ္စာဘာ နူဘာကောန်ဂကူမန်မွဲတၠ ဟီုရ။
“ဘာဝၚ်သပဝ် သှ် (၃၆) တၠ၊ အံၚ် (၅) တၠ၊ မွဲတၠဂှ်တှေ် ဂွံဂုန်တၟေၚ် (ဘောဂ) ရ။ ဘာညဳသာ သှ် (၁၈) တၠ၊ အံၚ် (၅) တၠ၊ ဘာအၚ်ဒၚ် သှ် (၂၀) တၠ၊ အံၚ် (၂) တၠရ။ ဘာပ္ၚ သှ် (၂) တၠ၊ အံၚ် (၁) တၠ” သာ်ဝွံ ဟီုရ။
ပၞောဝ်ကဵုညးလုပ်သွဟ် (၇၆) တၠဂှ် အံၚ်အာ (၁၃) တၠတုဲ တၟော်ကဵုက္ဍိုပ်ကၠံမ္ဂး အံၚ်ဇၞးအာ (၁၇.၁၁) က္ဍိုပ်ကၠံရ။
ပ္ဍဲပေဲါသၟာန်သွဟ်လိက်တန်လုပ်တက္ကသဵု သၞာံ (၂၀၂၅) တုဲကၠုၚ်တေံဝွံ ပၞောဝ်ကဵုကွးဘာကောန်ဂကူမန်တန်သၠုၚ် လုပ်သွဟ် (၁၂၇) တၠဂှ် အံၚ်ဇၞးအာ (၆) တၠဟေၚ်တုဲ ပ္ဍဲကဵုမွဲဒမြိပ်မ္ဂး လၟိဟ်အံၚ်ပရေံအိုတ်ရ။
ၜိုန်ဂှ်ကီုလေဝ် ကွးဘာဟွံအံၚ်တန်လုပ်တက္ကသဵုတံဝွံ တိုန် Pre -College မွဲသၞာံတုဲမ္ဂး ဂွံအခေါၚ်တိုန် ကဝ်လိက်ကောန်ဂကူမန်နွံရဂှ်လေဝ် ဂွံတီကေတ်ရ။
သၞာံဗ္တောန်ပညာ သၞာံ (၂၀၂၅ – ၂၀၂၆) တုဲကၠုၚ်ဏံဝွံ ကွးဘာ G-12 နူဌာနပညာကောန်ဂကူမန် သ္ဂောံဆက်ကတ်ပညာအဆံၚ်သၠုၚ်မာန်ဂှ်မ္ဂး သွက်ဂွံလုပ်သွဟ်ပေဲါသၟာန်သွဟ်လိက် တန် “ဒွါဒဿမ” နူဂကောံဌာနစၟဳစၟတ်လိက် ကမ္မတဳပရေၚ်ပညာကောန်ဂကူမန် (ဝါ) ပေဲါသၟာန်သွဟ်လိက်တန်လုပ်တက္ကသဵုအလဵုအသဳ မကၠောန်ဗဒှ်ဂှ် နူစသၞာံဗ္တောန်ပညာ ကဵုလဝ်အခေါၚ်ရုဲစှ်နွံရောၚ် ဂွံတီကေတ်ရ။
ဟိုတ်ဂှ်ရ သွက်ဂွံလုပ်သွဟ်တန်လုပ်တက္ကသဵု သၞာံ (၂၀၂၆) ဏံဂှ် ညးရုဲစှ်အောန်အာရဂှ်လေဝ် ညးတာလျိုၚ်ဘာကောန်ဂကူမန်တံ ဟီုရ။
အတိုၚ်လိက်လလောၚ် ဌာနဝန်ဇၞော်ပရေၚ်ပညာ ကမ္မယှေန်ပၞာန် ဂိတုဂျောန် စၟတ်တ္ၚဲ (၂၈) နူတနေံဏံမ္ဂး ကွးဘာလုပ်သွဟ်တန်လုပ်တက္ကသဵု သၞာံ (၂၀၂၆) ပ္ဍဲတွဵုရးဍုၚ်မန် အံၚ်အာ (၅၉၂၄) တၠတုဲ အံၚ်ဇၞးအာ (၅၉ ဒဿမ ၁၉) က္ဍိုပ်ကၠံနွံရောၚ် ဂွံတီကေတ်ရ။