တိကၠအ်ဝါ မၞုံဇိုင်ဍုင် ကရပ်ကွာန်တအ်ဂှ် ကံင်ဇြဳပၞာန်တအ် ပ္တိတ်လဝ်ပၟိင်စၞောန် အခေါင်သွံဂအာင်သ္ရိ ကၟာတ်လဝ်ကီု လေဝ် ပ္ဍဲတွဵုရးဍုင်မန် ဇၟာပ်ပွိုင်ဍုင်ဂှ် ပညဳပညပ်ကဵုကေတ်ဩန်တုဲ ပါ်သွံဒၟံင်ဂအာၚ်သ္ၚိ အတိုင်သၞောတ်တြေံရောင် သ္ဂောံတီကေတ် နူဗွိုင်ညးမရေင်တၠုင်သွံရာန်ဂအာင်သ္ၚိဂမၠိုင်ရ။
“နူသၞာံအာ (သၞာံတုဲကၠုင်) တေံရ တိဝါကီု ကၠအ်ကီု မုက်ဂၠံင်ဇၞော် ဇိုင်ဍုင် ကရပ်ကွာန်တအ်ဂှ်တှ်ေ ဍေံ (ကံင်ဇြဳပၞာန်) တအ် ဟွံကဵုအခေါင်သွံရာန် ပါ်ဂအာင်သ္ၚိရပုဟ်၊ ဆဂးတှ်ေ အုပ်ဓုပ်အရာပ် အုပ်ဓုပ်ကွာန် ပံင်ကဵု တခဳရုင်တိတအ်တုဲ ပံက်လဝ်ကဵုအခေါင်သွံရာန် ပါ်မံင်ဂအာင်သ္ၚိ အတိုင်တြေံရ၊ သွံရာန်မံင် အတိုင်သၞောတ်တြေံဖိုဟ်” သာ်ဝွံ မိသဳတာဝေန် (ဗလေတ်လဝ်ယၟု) ညးရေင်တၠုင်သွံရာန်ဂအာၚ်သ္ၚိ ပွိုင်ဍုၚ်မုဟ်ဍုင် ဟီုရ။
ပရေင်တိဝါဗ္ၚ ကၠအ်သွဝ် မၞုံမုက်ဂၠံင်ဇၞော် ဗွိုင်ဆက်စပ်ကဵု ဍုင်ကွာန် အရာပ်ဂမၠိုင်တအ်ဂှ် ပလီုပလာ်တိဝါ ကၠအ်သွဝ်တုဲ ပါ်သွံဂအာင်ၜက်သၞောတ်သၞောဝ်ဂှ်ရ ကာလလက်ထက် အလဵုအသဳတုဲကၠုင်တေံကီု၊ ပ္ဍဲကာလ ကံင်ဇြဳပၞာန်ဏံကီု ကဵုလဝ်စၞောန်ပၟိင် ကုဌာနပရေင်တိကၠအ် လစှ်ေကံင်ဇြဳပၞာန်တအ် ကၟာတ်တာဒၞာလဝ်ရ။
“သၞောဝ်ဍာံဍာံဂှ်တှ်ေ တိကၠအ်မွဲ မိက်ဂွံပါ်သွံဂအာင်ကီု၊ မိက်ဂွံပြံင်သၠာဲကၠောန်ကမၠောန်မွဲမွဲသာ်ကီုတှ်ေ တိကၠအ် ဍောတ်တ်ဂှ်ရ ပ္ဍဲကဆံင်တွဵုရးဇကုဂှ် ပညဳတုဲ ကၠောန်ဂွံ၊ ယဝ်ခါရ တိကၠအ်ဂၠိုင်မံၚ်တှ်ေ ကဆံင်တွဵုရးဏံ ဖန်ဟွံဂွံရ၊ တုဲတှ်ေ ယဝ်ရ ဒှ်တိဝါတှ်ေ ပတိုန်ကဆံင်ကၟိန်ဍုင်တေံလေဝ် ဟွံကဵုအခေါင်ပါ်သွံဂအာင် ဟွံကဵုအခေါင် ကၠောန်မွဲမွဲသာ်ရ ညးတံ(ကံင်ဇြဳပၞာန်) ကၟာတ်စဵုဒၞာလဝ်ပေင်င်နွံမံင်ရရ၊ ဆဂး ဗီုဒှ်မံင်လၟုဟ်ဂှ်တှ်ေ ဗီုညးညး ကၠောန်စမံင်ညးကံတုဲတှ်ေ ပလီုကၠအ်တုဲ ပါ်သွံဂအာင် နဲဗီုညးကဵုညး ဒှ်မံင်ဗီုဏံဖအိုတ်ရ” ညးရေင်တၠုင်သွံရာန် ဂ အာင်သ္ရိဂှ် ဆက်လဴရ။
တိကၠအ်မ္ဂး သၟဝ် ၅ ဨကမ္ဂး ကၠောန်ပြံင်သၠာဲကီု၊ သွံရာန်မွဲမွဲသာ်ကီု အခေါင်ကၠောန်နွံတုဲ ယဝ်ခါရ ၜက်နူ ၅ ဨကမ္ဂး ဒး ကေတ်အခေါင်ပၟိင် နူကဆံၚ်ကၟိန်ဍုင်ရ။ ပ္ဍဲကဆံင်ကၟိန်ဍုင်တအ် စၟဳစၟတ်တုဲ ကဵုအခေါင်မှ ပါ်သွံဂအာင်သ္ၚိကီု ကၠောန်သၠာဲဂတးမွဲမွဲသာ်ကီု ဂွံအခေါင်ရ။ ယဝ်ခါရ တိဝါဗ္ၚမ္ဂး ကၟာတ်တာဒၞာလဝ် ဟွံကဵုအခေါင်ရောင် ဂွံတီကေတ်ရ။
