ပ္ဍဲကဵုရုင်ပွိုင်ဍုင် (ရုင်အာမ်ဖေ) သင်ခႅဠဗူရဳ (ဝင်က) မၞုံခရိုၚ်ကမ္မရဳ ကၟိန်ဍုၚ်သေံဂှ်ဝွံ သၞာံဏအ် စနူဂိတုဂျောန်မံက် ဓမံက်ရုပ်ရဴ ကၠောန်သၠုင်ပတိုန်အဆံင်ၝာတ် ကဵု ညးဍုင်ကွာန်တံတုဲ စဵုကဵုသၞာံဏံအိုတ် ကၠောန်ကဵုညံင်ဂွံတုဲဒှ်အာရောင် ဂွံတီကေတ် နူသၞာဲဒဴကၠောန်ဒၟံင်ကမၠောန် (ပ္ဍဲရုင်အာမ်ဖေ) မွဲတၠဂှ် ဟီုရ။

အတိုင်အလဵုအသဳသေံတအ် ကဵုလဝ်စၞောန်ဂှ်မ္ဂး ညးမၞုံတန်တဴဒၟံင်ဍုင်သေံ နကဵုၝာတ် ကာဒ်အရံၚ်နာနာကီု၊ ၝာတ် (၁၀) သၞာံ မၞုံကဵုဂၞန်ဒေါဝ် (၈၉) ဂှ်ကီု အတိုင်ဖျေံလဝ် ကိုန်အစဳဇန် ဗၞတ်ဗ္ၜတ်လဝ်သၞာံ သက္ကရာဇ်သာသနာ ဍုင်သေံ (၂၅၄၂) ဂိတုသေပ်တေမ်ဗာ လ္ပာ်သၟဝ်တအ်ဂှ်မ္ဂး ကၠောန်တက်ကဵုၝာတ်ဖအိုတ်တုဲ သက္ကရာဇ်လ္ပာ်လ္တူတအ်ဂှ်မ္ဂး ဒးမၚ်အာမွဲချိူန်ခဏပၠန်ရောၚ် ဂွံတီကေတ် နူရုၚ် (အာမ်ဖေ) မွဲအဆံၚ် မလလောၚ်ပ္တိတ်လဝ် အကြာညးဇၞော်ကွာန်ဝင်ကတံရ။

ပ္ဍဲပွိုၚ်ဍုၚ်သခႅဠဗူရဳဂှ် နူဂိတုတုဲကၠုၚ်ဂှ်ရ လလောၚ်တရးပ္တိတ်လဝ် ဂကောံကွာန် စၟတ် (၁) စဵုစိုပ် စၟတ် (၁၀) ဂှ် ကၠောန်အာကဵုလၟေင်င်တုဲ တ္ၚဲလဵုဇကုမ္ဒးအာရုင် မ္ဒးကၠောန်ဂှ်လေဝ် လလောၚ်ပ္တိတ်လဝ်ကဵုစရင် မွဲဟာန်ကေုာံယၟုဂမၠိုင်နွံရ။

ပ္ဍဲကဵုကၠောန်သၠုင်ပ္တိုန်ကဵုအဆံင်တၞးၝာတ်သေံလၟုဟ်ဝွံ ကဵုလဝ်ဖျုန် ကုညးဟွံမွဲဍုင်တုဲ ညးဒှ်မၞိဟ်ဍုင်သေံကဵု ညးဒှ်မၞိဟ်ဍုင်ဗၟာ သာ်ဝွံ ပါ်လဝ်ၜါဂကူရ။ စပ်ကဵုၜါဂကူဏံတုဲ ညးဒှ်မၞိဟ်ဍုၚ်ဗၟာမ္ဂး ကၠောန်ကဵုၝာတ် (တၚ်ဍဴထာဲဝန်) တုဲ ဒှ်မၞိဟ်ဍုင်သေံမ္ဂး တက်ကၠောန်ကဵု ၝာတ်သေံ မဂၞန် (၈) ရောင်။

ပ္ဍဲကဵုဂှ်မ္ဂး ညးဒှ်မၞိဟ်ဍုင်ဗၟာ သွက်မ္ဒးသၠုင်ပ္တိုန်အဆံင်ၝာတ် (တၚ်ဍဴထာဲဝန်) ဂှ် ဒှ်ခက်ခုဲအောန်တုဲ ညးဒှ်မၞိဟ်ဍုၚ်သေံ သ္ဂောံပြံင်သၠာဲပ္တိုန်အဆံင်ၝာတ်သေံတအ်ဂှ် ဒးက္လေင်ဗပေင်ကၠောန်ကဵု မပ္တံစရင်သ္ၚိကၟိန် မဂၞန်သ္ၚိ၊ လိက်စရင်ဒှ်မၞိဟ်စတံနွံဂှ်ရ ဒးမၚ် (၃) သၞာံလေဝ်နွံ၊ (၅) သၞာံလေဝ်နွံ၊ စဵုကဵု (၁၀) သၞာံလေဝ်နွံရောင် ဂွံတီကေတ်ရ။

တုဲပၠန် သွက်ဂွံပ္တိတ်တၞးလိက်စရၚ်စၟတ်သမ္တီ ဂၞန် (၈၉) ၝာတ် (၁၀) သၞာံဂှ်လေဝ် မၞိဟ်လ္ၚဵု ပတိတ်ဂွံ/ မၞိဟ်လ္ၚဵု ပတိတ်ဟွံဂွံနွံတုဲ လိက်စရၚ်စၟတ်သမ္တီဂှ် ရုၚ် (အာမ်ဖေ) တံ ဂိုၚ်ဒေပ်လဝ် ပ္ဍဲကမ်ပျူတာဟွံအိုတ်ဂှ်ရ သွက်သ္ဂောံကလိဂွံမာန်ဂှ် ဒးပတှ်ေကံကုသဵု ဇကုဇကုရဏောၚ်လေဝ် ညးစုက်လုက်ကဵု ရုၚ်ပွိုၚ်ဍုၚ် (အာမ်ဖေ) သခႅဠဗူရဳမွဲတၠဂှ် ဟီုဂးလဝ်ရ။

မွဲလ္ပာ်ဂှ် သွက်ကောန်င္ရာ်၊ ကွးဘာ ဒှ်မၞိဟ်ဍုင်သေံ ညးမဒှ်မိမကောန်ဍုင်မန်ဗၟာတအ်ဂှ် နွံကဵုၝာတ် (၁၀) သၞာံမ္ဂး ကေတ်ဏာစရင်ဒှ်မၞိဟ်ကောန်င္ရာ် ကေုာံ တင်နင်မဆက်စပ်ကဵု ၝာတ် (၁၀) သၞာံမိမတအ်ဂှ်တုဲ နူကဵုရုင်ပွိုင်ဍုင် (အာမ်ဖေ) တအ် တက်ကၠောန်ကဵုဒၟံင်ၝာတ်သေံကီုရောင် ဂွံတီကေတ်ရ။

ပ္ဍဲကဵုအလဵုအသဳသေံတအ် ကၠောန်သၠုင်ပ္တိုန်ကဵုဒၟံင်အဆံင်ၝာတ် ကုကောန်ဍုင်မန်ဗၟာ ပ္ဍဲရုင်ပွိုင်ဍုင်သခႅဠဗူရဳဝွံ ကောန်ဂကူမန်၊ ကရေင် ကေုာံ ဂကူတၞဟ်ဟ် လၟိဟ်ဗွဲမဂၠိုင် ပါလုပ်မံင်ရောင် ဂွံတီကေတ်ရ။