ဒေသမန်၊ ကရေၚ် ဂကောံရပ်လွဟ်လ္ၚဵုတအ် ထိၚ်ဒဝ်လဝ်ဂှ် အကြာညးဍုၚ်ကွာန်တအ် ရပ်သုၚ်စောဲမံၚ် တၞးဩန်ပတောံနွံမံၚ်ရောၚ် ညးဒေသပွိုၚ်ဍုၚ်လှာဒကှ်မွဲတၠ ဟီုထ္ၜးရ။
တၞးဩန်ပတောံဂှ် ရပ်သုၚ်စောဲမံၚ် အကြာညးဍုၚ်ကွာန်တအ်တုဲ ဆဵုရပ်သုၚ်စောဲမံၚ် အကြာဆေၚ်ဖျာတအ် နွံကၠးကၠးတုဲ ဂလိုၚ်လဵုပြးဇးမံၚ်ဂှ် ဟီုဟွံမာန်ရောၚ် ညးဒေသဂှ် ဟီု ထ္ၜးရ။
“သ္ၚိပိုဲ ဒှ်မံၚ်ဆေၚ်ဖျာတှ်ေ ညးဍုၚ်ကွာန်လ္ၚဵုတအ် ကၠုၚ်ရာန်ကပေါတ်ဖျာတှ်ေ တၞးဩန်တၟိတၟိဖအိုတ်၊ ဠတုဲတှ်ေ တၟေၚ်မွဲပၠန်ဂှ် မဂၞန်တၞးဩန်ဂှ် လၟေၚ်ဂၞန်လေဝ် ဟွံခၠန်ပုဟ်၊ ဥပမာ ဩန်တာန်မွဲဠက်တှ်ေ တၞုၚ်ဂၞန်ဍေံဂှ် (၁ ၂ ၃ ၄) လၟေၚ်ဍေံဟွံခၠန်ပုဟ်၊ ဩန်တိတ်နူတိုက်ဩန်(ဗေန်)လေဝ် လၟေၚ်ဍေံ ဂွံရေၚ်အာအတိုၚ်လၟေၚ်ဍေံဂှ် သာ်လဵုလေဝ် ဒှ်ဟွံမာန်ပုဟ်၊ တၞးစက္ခူဍေံလေဝ် ရံၚ်ချိုတ်ပၠိုတ်တှ်ေ ဍေံတၟေၚ်မံၚ်နူကဵု တၞးဩန်ဇေတ်ဇေတ်ဂှ် ဆဵုရပ်သုၚ်စောဲမံၚ်ကၠးကၠးဏောၚ်” သာ်ဝွံ မၞိဟ်ဗြဴ သွံမံၚ်ကပေါတ်ဖျာ (ကုန်စုံဆိုၚ်) ပွိုၚ်ဍုၚ်လှာဒကှ်မွဲတၠ ဟီုရ။
ဒေသမန်၊ ကရေၚ် ပွိုၚ်ဍုၚ်လှာဒကှ်ဂှ် ဂကောံပၠန်ဂတးတအ် အုပ်ဓုပ်လဝ်နွံကီု၊ ဒေသလ္ၚဵုဂှ် သီုဒပ်ပၞာန်ဗၟာတအ် ထိၚ်ဒဝ်လေဝ်နွံတုဲ တၞးဩန်ပတောံဂှ် ဂကောံလဵုလေဝ် ဂွံရပ်စပ်စၟဳစၟတ်ဟွံမွဲရောၚ် မၞိဟ်ဂှ် ဆက်ဟီုရ။
“ဒေသလှာဒကှ်ကီု ဒေသဆက်စပ်တအ်ကီုဂှ် ဩန်ပတောံပြးဇး ရပ်စပ်သုၚ်စောဲမံၚ်ဂှ် ဂကောံဂွံရပ်စပ် စၟဳစၟတ် ကေတ်အရေဝ်ဂှ် ဂကောံလဵုလေဝ် ဟွံမွဲပုဟ်၊ ဍေံကၠုၚ်ရာန်ဖျာတှ်ေ ဆဠတှ်ေ ဩန်တၟိတၟိဖအိုတ်၊ ဆဵုတှ်ေ ပတုပ်စမ်ရံၚ်ကဵု တၞးဩန်ဇေတ်ဇေတ်ဂှ် ဍေံတၞဟ်ခြာတီမံၚ်၊ ဆဂး ညးဍုၚ်ကွာန်ဓမ္မတာတအ်ရတှ်ေ ဂွံတီဂှ် အောန်မံၚ်၊ ဂွံသ္ပသတိဂှ် ဟွံမွဲပုဟ်၊ ရပ်စပ်မံၚ် သ္ဇက်ဟီုဟွံမွဲရ၊ ဠစိုပ်ပ္ဍဲဖျာဇကုတှ်ေ လဆောဝ်တှ်ေ ဒးဟီုဏာဗီုတေံ ဗီုဏံတုဲ ဟွံသွံကဵုလေဝ်နွံ၊ လဆောဝ်တှ်ေ ပါဲဓလေတ်ဝါတ် ပါဲထောံသက်သက်လေဝ် ဖေက်ဍေံစိုတ်ဒှ် ဖေက်ဍေံတၟေၚ်လတူဇကုတုဲတှ်ေ ဒးဒုၚ်ဏာတဲလေဝ်နွံ၊ ဩန်ဒုၚ်လဝ်တဲဂှ် ညံၚ်ဂွံအိုတ်အာ ပ္ဍဲဇကုဂှ်တှ်ေ ဒးဂစာန်ရာန်ဖန်ထောံအကြာဂှ် ပြဟ်ဟ် ဒးဖန်” သာ်ဝွံ ညးဆက်ဟီုရ။
အခိၚ်ကာလ ပရေၚ်ဍုၚ်ကွာန်ဒှ်ထုဲထံၚ်မံၚ်ဏံဂှ် အကြာဂကောံပၠန်ဂတးတအ်ကဵု ဂကောံဒပ်ကမ္မယှေန်ပၞာန်တအ် ဒေသအုပ်ဓုပ် ဂကောံပၠန်ဂတးတအ် ဩဇာတဴဂှ်ကီု၊ ဒေသဩဇာနှဴရဴလ္ၚဵုဂှ်ကီု တၞးဩန်ပတောံပြးဇးဂၠိုၚ်တုဲ ရပ်စပ်သုၚ်စောဲမံၚ် တၞးဩန်ပတောံနွံဂၠိုၚ်မံၚ်ရောၚ်ဂှ်လေဝ် သၟာပရေၚ်ဍုၚ်ကွာန် ဒေသ အကြာမန်၊ ကရေၚ် မွဲတၠဂှ် ဟီုပၠန်ရ။
တၞးဩန်ပတောံဂှ် ပြးဇးရပ်စပ်သုၚ်စောဲမံၚ် အကြာဒေသမန်၊ ကရေၚ်ဂှ် ဂကောံစၟဳစၟတ် ရပ်စပ်ကေတ်အရေဝ် ဟွံမွဲတုဲ အကြာညးဍုၚ်ကွာန်တအ် ရပ်စပ် ရာန်သုၚ်စောဲမံၚ် သၠဲသၠဲလးလးနွံရောၚ်ဂှ်လေဝ် အတိုၚ်တၠဆေၚ်ဖျာ (ကုန်စုံဆိုၚ်) လဴထ္ၜးဂှ် ဂွံတီကေတ်ရ။
