အခိၚ်ကပေါတ်ဗွဝ်ဖျာ က္ဍၚ်တိုန်မံၚ်နာနာသာ်ဂှ် ၚုဟ်စၞစာၚ်လေဝ် က္ဍၚ်တိုန်ဟွံသာတုဲ ရဲကၠောန်ပတိတ်စပရဲလ္ၚဵုတအ် ကၠောန်ပတိတ်ကၠုၚ် စၞစာၚ်ပတောံနွံမံၚ်ရောၚ် တၠကမၠောန်လွဳစာၚ် နူပွိုၚ်ဍုၚ်ဇြပ်ဗုမွဲတၠ ဟီုလဴထ္ၜးရ။
တၠကမၠောန်လွဳစာၚ်လ္ၚဵုဂှ် ဟွံဆက်စၠောံလဝ်ကဵု ကုမ္ပဏဳမွဲသာ် ဗီုဇကုကဵုဇကု လွဳကၠောန်မံၚ်ဂှ် ရာန်ဗစဒးစၞစာၚ်ပတောံတုဲ သီုဟွံဒှ်စာၚ်ဖျုန်မွဲသာ် ဒှ်အာစာၚ်ကွာန်ဂှ်ရ အိုတ်အခိၚ်လအ် ကျဆောံမံၚ်နွံရောၚ် သ္ဂးရ။
“ပိုဲရဲလွဳစာၚ်ဏံဂှ်တှေ် မၞိဟ်လ္ၚဵုဂှ် ပံၚ်တောဲလဝ်ကဵု ကုမ္ပဏဳနွံ၊ လ္ၚဵုဂှ်တှေ် ကၠောန်လွဳစကေတ်ကေတ်၊ စၞစာၚ်လေဝ် ဇကုပ္တိတ်ရာန်စကေတ်ကေတ်၊ အခိၚ်လၟုဟ် စၞစာၚ်လေဝ်ၚုဟ်ဍၚ်မံၚ်တုဲတှေ် ရဲကၠောန်စတအ်ဂှ် ကၠောန်ပ္တိတ်စၞစာၚ်ပတောံနွံကၠုၚ်၊ ဗ္စဒးစၞစာၚ်ပတောံတှေ် စာၚ်ဂှ် ဟွံဒှ်ဖျုန် ဒှ်အာစာၚ်ကွာန်” သာ်ဝွံ နာဲထောန် တၠကမၠောန်လွဳစာၚ်ဂှ် ဟီုရ။
အခိၚ်လၟုဟ်ဝွံ ၚုဟ်ထဝ်လေဝ်တိုန် ၚုဟ်ကပေါတ်ဖျာဗွဲမဂၠိုၚ်တိုန် စၞစစာၚ်လေဝ်တိုန်ဗက်ကီုတုဲ ရဲကၠောန်ပတိတ်စပရဲပရေၚ်ပိုန်ဒြပ်လ္ၚဵုတအ် ကၠောန်ပ္တိတ်ကၠုၚ်ကပေါတ်ပတောံ စၞစာၚ်ပတောံ ဂၠိုၚ်ကၠုၚ်နွံရ။ စၞစာၚ်ပတောံဂှ် ဗုတ်သၠေက်လဝ်ကာံ (ခဗိုက်သြောံ) တုဲ ကၠောန်ပတုပ်လဝ်ရောၚ် တၠလွဳစာၚ်ဂှ် ဆက်ဟီုပၠန်ရ။
“စၞစာၚ်ဍေံကၠောန်လဝ်ပတောံဂှ် ဍေံကၠောန်ဗုတ်လဝ်ကဵုကာံ (ခဗိုက်သြောံ) ကဵု မုမုဟွံတီပုဟ်၊ ကဗုတ် ဟွံပါပုဟ်၊ ဂဥုဲဟွံပါပုဟ်၊ ဗ္စစာၚ်တှေ် အာဟာရဍေံဟွံပေၚ် စာၚ်ဟွံဇၞော်ပုဟ်၊ လအ်တိုန်ညိတှေ် ဟွံဒှ်ဖျုန်မွဲသာ် ဒှ်အာဗီုစာၚ်ကွာန် ကၠောန်ပတုပ်လဝ် ဗီုစၞစာၚ်ကွေံကွေံ၊ ဒှ်အာဗီုဂှ်တှေ် ရဲလွဳစာၚ်တအ် အခိၚ်သၟးရအိုတ်၊ ကျသီုအခိၚ် ကျသီုပရဲ” သာ်ဝွံ ညးဆက်ဟီုရ။
စၞစာၚ်ဂှ် နူကဵုမွဲရိုက် မွဲကိုဋ်ပြၚ်ညိဂှ် လၟုဟ်မ္ဂး တိုန်အာမွဲရိုက် ကြပ်ၜါကိုဋ်ရ။ စာၚ်မွဲခရိုၚ်မ္ဂး အောန်အိုတ် (၃၀၀၀) ဒးလွဳတုဲ ဗ္စစၞမွဲတ္ၚဲဂှ် အိုတ်မံၚ်အကြာ (၂၀) ကိုဋ်တုဲ ပွိုၚ် (၄၅) တ္ၚဲမ္ဂး စရိတ်စၞစာၚ်သၟးဂှ် ဒးအိုတ်မံၚ်အကြာ (၁၀၀၀) ကိုဋ်ဒှ်ရ။
စာၚ်လွဳဂှ် မွဲအသုတ်မ္ဂး လအ်အကြာ ပွိုၚ် (၄၅) တ္ၚဲတုဲ ယဝ်လွဳလအ်အာမ္ဂး စရိတ်ကမၠောန်ကီု၊ စရိတ်ဗ္စစၞကီု အိုတ်ဂၠိုၚ်အာရောၚ်ဂှ်လေဝ် တၠလွဳစာၚ်ဂှ် ဟီုရ။
ကမၠောန်လွဳစာၚ်ဂှ် အခိၚ်လၟုဟ်မ္ဂး စရိတ်စၞ က္ဍၚ်တိုန်ကီု၊ သၟာကမၠောန်ဂှ်လေဝ် ဂၠာဲဝါတ်တိုန်ကီုတုဲ ရုၚ်ကမၠောန်လွဳစာၚ် ပ္ဍဲဍုၚ်မန်ဗွဲမဂၠိုၚ် ဒးရုပ်သီထောံ ကမၠောန်လေဝ်နွံရောၚ် ဂွံတီကေတ်ရ။
