ကမ္ပဏဳပုဂ္ဂလိက တြးဓါတ်လလဳ ပ္ဍဲဒေသရေဝ်သၟဝ်ကျာ Southern Myanmar Development (SMD) ဂှ် စနူဂိတုဨဗရဴမံက်ဏအ်တုဲ ကံက်သၠုင်ပ္တိုန်အာင္ရုဟ်ပၟတ် မွဲယူဏေတ် (၃၈၀၀) ဒ္ကေဝ်ဏောင် ပ္တိတ်လိက်ကဵုလဝ်သမ္တီရ။

တန်တဴကဵုအကာဲအရာ ရာန်ကၠေင်ပ္ဍေန်စက်ဂွံတုဲလေဝ် ဆေင်စပ်ကဵုင္ရုဟ်ပၟတ် ပြံင်သၠာဲမွဲမွဲသာ်နွံကၠုင်မ္ဂး ဆက်ကဵုအာသမ္တီပၠန်ရောင် လ္ပာ်ကမ္ပဏဳ SMD ဟီုရ။

ကမ္မဏဳ SMD ဝွံ ထ္ၜးဟိုတ်ကဵုကၠေင်ပ္ဍေန်စက်ကေတ်ဝါတ်၊ င္ရုဟ်က္ဍင်တုဲ စနူဂိတုမာတ် စၟတ်တ္ၚဲ (၇) တုဲကၠုင်ဏအ်လေဝ် နူဗလးကဵုမံင်ပၟတ် ပွိုင် (၂၄) နာဍဳဂှ် ပြံင်သၠာဲ ဖအောန်ဖျေံအခိင် စနူသဝ်တ္ၚဲ (၆) နာဍဳ ဒဵုစိုပ် (၆) နာဍဳနူဂယးနွံကီုရ။

“နူကဵုဍေံကုတ်ထောံပၟတ် ဂွံဒၟံၚ် (၂၄) နာဍဳဂှ် လၟုဟ်ဏံ ဍေံကဵုဗ္တံသၟးတှ်ေ ရမျှာၚ်ညးဍုၚ်ကွာန်တံ ဍေံဗြုကၠုၚ်၊ မုပရောဟီုတှ်ေ ဍေံကဵုလဝ်ဂှ် အခိၚ်အုဲအုဲတုဲ သွက်ရဲကၠောန်ကမၠောန်တ္ၚဲတံ ဍေံဟွံချပ်ကဵု ဍေံဟွံသ္ၚဳဂၠိပ်တုဲ ဗီုဍေံမိက်ဂွံဒှ်ရ ဍေံဒှ်ဒၟံၚ်၊ ဣညအ် လၟုဟ်ဏံ ဍေံကဵုဒၟံၚ်ပၟတ်ဗ္တံတုဲ ရဲကၠောန်ကမၠောန်တ္ၚဲတံ ယအ်စှ်ေအာ ဗ္ဒါဲ (၇၀) က္ဍိုပ်ကၠံနွံ” မၞိဟ်တြုံ နူဍုင်လၟိုင်မွဲတၠ ဟီုရ။

င္ရုဟ်ပၟတ် နူဂိတုမာတ်ဂှ် ဒးကဵုကၠုင်လဝ် မွဲယူဏေတ် (၂၂၀၀) ဒ္ကေဝ် ဂွံစကာပၟတ်အခိင်ဗ္တံသၟးရတုဲ လၟုဟ် ထပ်ကံက်သၠုင်ပ္တိုန်င္ရုဟ်ပၟတ်ဝွံ ခက်ခုဲနွံအာသီုညးဖ္အိုတ်ရောင် ဂးရ။

သာ်ဂှ်ကီု ကမ္ပဏဳမျာတ်တူရထောန် (ကုလားကြီး) တြးဓါတ်လလဳ လ္တူဍုင်ရေဝ်ကဵု ကွာန်မၞုံဗ္ဒါဲဍုင်ရေဝ်တအ်ဂှ်လေဝ် စနူဂိတုဨဗရဴမံက်ဝွံတုဲ နူကဵုကံက်ဒၟံင်င္ရုဟ်ပၟတ် မွဲယူဏေတ် (၂၁၀၀) ဒ္ကေဝ်ဂှ် သၠုၚ်ပတိုန်အာ စဵုကဵု (၃၆၀၀) ကီုရောင် ဂွံတီကေတ်ရ။

ပ္ဍဲတွဵုရးဍုင်မန် (၁၀) ပွိုၚ်ဍုၚ်ဂှ် အယာံမာတ် ပွိုၚ်ဍုၚ်ရေဝ်မွဲဟေၚ် ဟွံဂွံပၟတ်အလဵုအသဳတုဲ အမာတ်ကၠတ်ထဝ် သ္ပစၞးကဵုပွိုင်ဍုၚ်ရေဝ် ညးလဵုမွဲတိုန်န် ဆန္ဒညးဍုၚ်ကွာန်တံ နွံပၟိက်ပၟတ်ဓါတ်လလဳအလဵုအသဳဂှ် အမာတ်လဵုမွဲ ဗပေၚ်ကဵုဟွံမာန်ရောၚ် ညးဒေသရေဝ်မွဲတၠ ဟီုကၠုင်ရ။

“အမာတ်ပွိုၚ်ဍုၚ်ရေဝ် တုဲကၠုၚ်ၜါဆက်တေံ ခိုဟ်မံၚ်တုဲ ဟွံဂွံကၠုၚ်ပၟတ်ဓါတ်လလဳအလဵုအသဳ၊ အမာတ်လၟုဟ်ဏံ ခိုဟ်ဗီုဂှ်ပၠန်တှ်ေ ဟွံဂွံပၟတ်ဗီုဂှ်ပၠန်ရ” သာ်ဝွံ ညးဒေသဂှ် ဆက်ဟီုရ။

ပ္ဍဲလ္တူဍုင်ရေဝ်၊ ကွာန်သၞေဟ်ကာ၊ ကလအ်၊ ဟံင်ဂါမ်၊ အၜဝ်၊ ဒူရာ၊ အစေန်စတမ်တအ်ဂှ် ဒးရာန်စကာမံင်ပၟတ် နူကမ္ပဏဳပုဂ္ဂလိက မျာတ်တူရထောန်တုဲ ဍုင်လၟိုင်၊ တၟအ်ကၞေင်၊ ကအ်ဍောတ်၊ တံင်ပရင်၊ သၞေဟ်ခြေင်စတမ်တအ်ဂှ် ရာန်စကာမံင်ပၟတ် နူကမ္ပဏဳ SMD ရောင် ဂွံတီကေတ်ရ။