ဂကောံရပ်လွဟ်မွဲဂကောံ ရပ်ကော်ဏာလဝ် ဒုညးက္ဍိုက်က္ဍိုပ်ဌာနပရေၚ်တဵုလွဳ၊ ဍုၚ်ခေါဇာ၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် က္လေၚ်ဗၠးကၠုၚ်ယျရောၚ် ဂွံတီကေတ် နူညးစုက်လုက်ကဵု ပွဳဗွိုၚ်သၞာဲဒဴတံရ။
ညးတာလျိုၚ်ဍုၚ် (ဒုညးက္ဍိုက်က္ဍိုပ်) ဌာနပရေၚ်တဵုလွဳ၊ ဍုၚ်ခေါဇာ ဥူကျဝ်တူဝွံ ပ္ဍဲဂိတုအေဗရဴ စၟတ်တ္ၚဲ (၂၄) တုဲကၠုၚ်ဏံ နူမုဟ်ဍုၚ် အဃောအာဍုၚ်ရေဝ်ဂှ် ဂကောံရပ်လွဟ်မွဲဂကောံ ရပ်ကော်ဏာလဝ် ပ္ဍဲဗဒဲါပါၚ်ဂၠံၚ်ကွာန်သၞေဟ်ခြေၚ်၊ ပွိုၚ်ဍုၚ်ရေဝ်၊ သ္ကုတ်ဂၠံၚ်ဇြပ်ဗု-ရေဝ်ရ။
ဥူကျဝ်တူဝွံ ဒးဒုၚ်ရပ်ကော်ဏာ လလအ်ပွိုၚ် (၄) တ္ၚဲတုဲ ပ္ဍဲဂိတုအေဗရဴ စၟတ်တ္ၚဲ (၂၇)၊ အခိၚ်တ္ၚဲစေၚ်ဂှ် က္လေၚ်ဆဵုညး ပ္ဍဲဗဒဲါကွာန်ဝါဂမိတ်၊ ပွိုၚ်ဍုၚ်ဇြပ်ဗု၊ သ္ကုတ်ဂၠံၚ်ဇြပ်ဗု-ရေဝ်ရ။
“ညး (ဥူကျဝ်တူ) ဂှ် ဂကောံရပ်လွဟ်တံ က္လေၚ်ကဵုဖုၚ်ကဵု ထိုၚ်လှုဲတုဲ ကၟာတ်ထောံမတ်တုဲဂှ်တှေ် ဖဍိုက်နၚ်ကဵုကာ ဗဒဲါကွာန်ဝါဂမိတ်ဂှ်တုဲ ဖျေံလဝ် ပ္ဍဲသ္ကဲဂၠံၚ်ဇြပ်ဗု-ရေဝ်ဂှ် ဂးရ။ နူကဵုဖုၚ်မွဲတဆံၚ် ကဵုသမ္တီကဵုညးမဆေၚ်စပ်တုဲ အာကော်နၚ်ညးရ” သာ်ဝွံ ဟီုရ။
ဥူကျဝ်တူဝွံ ပရေၚ်ထတ်ယုက်ခိုဟ်မံၚ်ရတုဲ ပြဟ်ပြဟ်ဏံ ညးမဆေၚ်စပ်တံ ကၠောန်သ္ပမံၚ် ပရေၚ်စၟဳစၟတ်နွံ ဂးရ။
ဒုညးက္ဍိုက်က္ဍိုပ်ဌာနပရေၚ်တဵုလွဳဍုၚ်ခေါဇာ ဥူကျဝ်တူဝွံ ဟိုတ်နူတိဍာ်အပ္ဍဲပွိုၚ်ဍုၚ်ရေဝ် ဟွံၜိုဟ်သြိုဟ်ဂှ်ရ ဒၟံၚ်တန်တဴမံၚ် ပ္ဍဲမုဟ်ဍုၚ်တုဲ နကဵုကိစ္စကမၠောန် အဃောက္လေၚ်စဴကၠုၚ်ကဵုကွဳစက် ဇရေၚ်ဍုၚ်ရေဝ်ဂှ် ဂကောံရပ်လွဟ်တံ ရပ်ကော်ဏာလဝ် ပ္ဍဲဗဒဲါပါၚ်ဂၠံၚ်ကွာန်သၞေဟ်ခြေၚ်ရ။
တုပ်သာ်ဂှ်ကီု ပ္ဍဲဂိတုအေဗရဴ စၟတ်တ္ၚဲ (၁၇) တုဲကၠုၚ်ဏံဂှ်လေဝ် ပ္ဍဲကဵုဗဒဲါကွာန်ကၠအ်လိမဴ၊ ပွိုၚ်ဍုၚ်ရေဝ်၊ သ္ကုတ်ဂၠံၚ်ဇြပ်ဗု-ရေဝ်ဂှ် ဂကောံရပ်လွဟ်တံ ရပ်ကော်ဏာလဝ် သၞာဲဒဴအုပ်ဓုပ်ခရိုၚ်ရေဝ် (၃) တၠတုဲ စဵုကဵုဂိတုအေဗရဴ (၂၈)၊ နူတနေံဏံ ဟွံဂွံအဆက်ကဵု သ္ၚိကၟိန်ဏီရောၚ် ဂွံတီကေတ် နူညးစုက်လုက်ကဵု ဂကောံသ္ၚိကၟိန်တံရ။
ပ္ဍဲသ္ကုတ်ဂၠံၚ်ဇြပ်ဗု-ရေဝ်၊ ဂၠံၚ်ဇၞော်စၟတ် (၈)၊ အကြာပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် သၟာၚ်နူဒပ်ကမ္မယှေန်ပၞာန်တုဲ ဂကောံရပ်လွဟ်ဇဳတံ အာကၠုၚ်ချဳဓရာၚ်ဒၟံၚ်ရ။
