ကွးဘာဒှ်မံၚ်တၚ်ဝါတ်ဂါတ် သွက်ဂွံဆက်ကတ်ဗ္တောန်ပညာအဆံၚ်သၠုၚ် (၆) တၠတံဂှ် နူကဵုဌာန်သ္ဇိုၚ်ပရေၚ်ပညာပုပ္ဖဟံသာ သွက်ဂွံထံက်ပၚ်အာကဵု လာဘ်ဗ္တောန်ပညာ Scholarship နဒဒှ်အလန်ကၠာအိုတ်နွံရောၚ် ညးတာလျိုၚ်ဌာန်သ္ဇိုၚ်ပရေၚ်ပညာ ပုပ္ဖဟံသာ ဟီုကဵုဌာန်ပရိုၚ်ဗၠးၜးမန် IMNA ရ။

ပ္ဍဲကဵုအစဳဇန်ဏံဝွံ ကွးဘာတဆိပ်ကြာပါရဂူ PhD (၁) တၠ၊ ကွးဘာတဆိပ်ကြာမဟာ M.A (၁) တၠ၊ ကွးဘာတဆိပ်ကြာဝိဇ္ဇာ B.A (၁) တၠကဵု ကွးဘာဒဳပလိုဝ်မာ (၃) တၠတံ သွက်ဂွံထံက်ပၚ်ကဵု လာဘ်ဗ္တောန်ပညာဂှ် ရုဲစှ်အာရောၚ် ဂွံတီကေတ်ရ။

ဆေၚ်စပ်ကဵု ထံက်ပၚ်လာဘ်ဗ္တောန်ပညာဏံတုဲ “ပရေၚ်ထံက်ပၚ်ဗီုဏံဂှ် ပ္ဍဲကဵုဂကူမန် အောန်မံၚ်ဏီရ။ နအလဵုတၠဂုန်တံလေဝ် ကေၚ်တိုန်လဝ်ဘာဏောၚ်ဟီုတှေ် တၚ်ဝါတ်ဂါတ်ကွးဘာတံဂှ် ချပ်ဗ္စာကၠိုဟ်ကဵုမာန်ရ။ နကဵုကၠောန်ဏာဗီုဏံဂှ်တှေ် ၚုဟ်မးပညာဂှ် မိက်ဂွံကဵုညးဍုၚ်ကွာန်တံ တီဂၠိုၚ်ကၠုၚ်ကီု၊ ပ္ဍဲကဵုဇၟာပ်ဒေသဇကုဂှ်လေဝ် ညံၚ်ဂွံကၠောန်ဗက် ပရေၚ်ထံက်ပၚ်ပညာဗီုဏံဂှ် ရန်တၟံလဝ်ရ” သာ်ဝွံ ဂအုပ်နာယက ဌာန်သ္ဇိုၚ်ပရေၚ်ပညာပုပ္ဖဟံသာ ကျာ်ဇၞော်အ္စာပုပ္ဖဟံသာ ဟီုမြော်ဏာရ။

ပ္ဍဲဂိတုဂျာန္နဝါရဳတုဲကၠုၚ်တေံဝွံ အကြာဌာန်သ္ဇိုၚ်ပရေၚ်ပညာပုပ္ဖဟံသာကဵု ကဝ်လိက်၊ ဌာနပရေၚ်ပညာ မၞုံသၟဝ်ဌာနတက္ကသဵုမဟာစူလာလံၚ်ကန်တံ ထ္ပက်လဝ်လိက်ကသုက် MOU တုဲ သွက်ဂွံကဵုလာဘ်ဗ္တောန်ပညာ ကုညးဒေသမန် မဒှ်မံၚ်တၚ်ဝါတ် သွက်ဂွံကတ်ဗ္တောန်ပညာအဆံၚ်သၠုၚ်ဂှ် စပ္တံချဳဓရာၚ်ကၠုၚ်ရ။

လာဘ်ဗ္တောန်ပညာဂမၠိုၚ်ဂှ်ဝွံ သ္ပသဇိုၚ်တော်တၟော်လဝ် လ္တူၚုဟ်စရိတ်အိုတ် တက္ကသဵုမဟာစူလာလံၚ်ကန်ကီုလေဝ် ကွးဘာဂွံဒုၚ်ရုဲစှ်ဂမၠိုၚ်တံဝွံ တက္ကသဵုဇကုမိက်ဂွံတိုန်စိုပ်ဂှ် အခေါၚ်ဗ္တောန်ပညာနွံရောၚ် ညးတာလျိုၚ်ဂမၠိုၚ်တံ ဟီုရ။

ပ္ဍဲဂိတုမေသတ္တဟပထမတေံမ္ဂး သွက်ဂွံရုဲစှ်ကဵုလာဘ်ဗ္တောန်ပညာဂှ် ကၠောန်သ္ပအာ ပေဲါသၟာန်သွဟ်ချူ ကေုာံ သၟာန်သၟုက်အလဵုဇကုမၞိဟ် (အေန်တာဗျူ) တုဲ ညးဂွံဒုၚ်ရုဲစှ်တံဂှ် အပ္ဍဲဂိတုမေသတ္တဟဒုတိယတေံ လလောၚ်တြးအာ အပ္ဍဲအသေအဟာန်စှေ်ဘာဥတုက္ညၚ် မကၠောန်ဗဒှ် ပ္ဍဲဍုၚ်ဇြပ်ဗုဂှ်ရောၚ် ဂွံတီကေတ်ရ။

“ညးပ္တိုန်စရၚ်တံဂှ် ဒးဒှ်ဂကူမန်တုဲ လိက်ပတ်မန်ကဵု အရေဝ်ဘာသာဂှ်လေဝ် ဒးစိုန်သ္ကီုရ။ တုဲပၠန် ကာလကတ်ဗ္တောန်ပညာတုဲအာတှေ်လေဝ် ကွတ်ပညာဇကုလေပ်လဝ်တံဂှ် ဒးက္လေၚ်ရေၚ်တၠုၚ် မွဲကရောံကဵု ဌာန်သ္ဇိုၚ်ပရေၚ်ပညာပုပ္ဖဟံသာ သွက်ဂကူဘာသာ၊ သာသနာကဵု သွက်ညးဂမၠိုၚ်ဏောၚ်” သာ်ဝွံ ကျာ်ဇၞော်အ္စာပုပ္ဖဟံသာ ဟီုမြော်ရ။

ညးစိုပ်လုပ်စကဵု လာဘ်ဗ္တောန်ပညာ မပ္တံခၟဳ၊ ထ္ပိုဲ၊ သဳလ ကေုာံ မၞိဟ်ဂမၠိုၚ်တံလေဝ် ပ္တိုန်စရၚ်မာန်ရောၚ် လလောၚ်ပ္တိတ်လဝ်ရ။

ဌာန်သ္ဇိုၚ်ပရေၚ်ပညာပုပ္ဖဟံသာဝွံ ရန်တၟံသွက်ဂွံရီုဗၚ်ထံက်ပၚ် ကိစ္စဆေၚ်စပ်ကဵု ပရေၚ်ပညာပရိယတ္တိ၊ ပရေၚ်ပညာတက္ကသဵု၊ ပရေၚ်ပညာကောန်ဂကူမန် ကေုာံ ဆေၚ်စပ်ကဵုဘဲအန္တရာဲသဘာဝအပ္ဍဲဒေသတုဲ စဒက်ပ္တန်လဝ် ပ္ဍဲသၞာံ (၂၀၂၁) ရ။

သၟာၚ်နူဂှ်ပၠန် တန်ဗ္တောန်ကဵုဒါန်ပညာဂမၠိုၚ်၊ တန်ဗ္တောန်လိက်ပတ်မန်ဥတုက္ညၚ်ဂမၠိုၚ်ဂှ်လေဝ် သ္ပသ္ဇိုၚ်ကဵုဒေသတုဲ ကၠောန်သ္ပရေၚ်တၠုၚ်ဒၟံၚ် အဆက်ဆက်နွံရ။