ဗဒိုပ်ဗၠာဲသၟိၚ် ကေုာံ ကရောၚ်ပၞာန်ကမ္မယှေန်ပၞာန် မဖျေံသဇိုၚ်ချဳဓရာၚ်ဒၟံၚ် အပ္ဍဲပွိုၚ်ဍုၚ်ဇြပ်ဗု ကေုာံ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် နူကဵုဂကောံဒပ်ကောဒေံစက်ဗရုသာဲ မန် – တၞၚ်သဳကဵု ဒပ်ပံၚ်ကောံမဟာမိတ်ပၠန်ဂတးတံ ပန်ဗ္တိုက်လဝ်ကဵုစက်ဗရုသာဲရောၚ် ဒပ်ပၠန်ဂတးဍုၚ်မန် MSRF လလောၚ်ပ္တိတ်လဝ် ပ္ဍဲဂိတုအေဗရဴ စၟတ်တ္ၚဲ (၁၈) တုဲကၠုၚ်ဏံရ။

အတိုၚ်လလောၚ်ပ္တိတ်လဝ်ဂှ်မ္ဂး ဒပ်ကမ္မယှေန်ပၞာန် ထ္ပက်ကၠုၚ်ကရောၚ်ပၞာန် ဗဒဲါကွာန်အံၚ်တပျေဂှ် ပ္ဍဲဂိတုအေဗရဴ စၟတ်တ္ၚဲ (၉၊ ၁၀၊ ၁၁) တုဲကၠုၚ်ဏံ ပန်ဗ္တိုက်ဏာကဵု မခတိုဟ် (၂၀) မ နကဵုစက်ဗရုသာဲ (၃) တ္ၚဲအဆက်ဆက်တုဲ ဗဒိုပ်ဗၠာဲသၟိၚ် ဖျေံသဇိုၚ် ပ္ဍဲကွာန်အနေၚ်၊ ပွိုၚ်ဍုၚ်ဇြပ်ဗုဂှ်လေဝ် ပ္ဍဲဂိတုအေဗရဴ (၁၅၊ ၁၆) ၜါတ္ၚဲအဆက်ဆက်ဂှ် ပန်ဗ္တိုက်လဝ်ကဵု မခတိုဟ် (၂) မ နကဵုစက်ဗရုသာဲကီု ဓမံက်ထ္ၜးလဝ်ရ။

အပ္ဍဲပွိုၚ် (၅) တ္ၚဲ ဂိတုအေဗရဴဏံ နူကဵုဒပ်ပံၚ်ကောံမဟာမိတ်ပၠန်ဂတး ကေုာံ ဒပ်ပံၚ်ကောံကောဒေံစက်ဗရုသာဲ မန် – တၞၚ်သဳတံ ပန်ဗ္တိုက်လဝ်ကဵု စက်ဗရုသာဲ (၆) ဝါရ။

သွက်သ္ဂောံက္လေၚ်ထိၚ်ဒဝ် သ္ကုတ်ဂၠံၚ်ဇၞော် စၟတ် (၈) မာန်ဂှ်မ္ဂး စပ္တံနူဂိတုဖေဖဝ်ဝါရဳတုဲကၠုၚ်တေံရ လ္ပာ်ဒပ်ကမ္မယှေန်ပၞာန်တံ ထ္ပက်ပြုပြေၚ်မံၚ်ပၞာန် အပ္ဍဲပွိုၚ်ဍုၚ်ရေဝ်သၟဝ်ကျာ ဗွဲမသကာတ်မြဟ်တုဲ စဵုကဵုတ္ၚဲဏံ ဟွံက္လေၚ်ဆုတ်တိတ်မွဲသာ် သီုထပ်ဗပေၚ်လဝ်ဇြဟတ်ပၞာန်ရောၚ် ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF မိတၠညာဏ် ဟီုရ။

“ဍေံတံ မိက်ဂွံက္လေၚ်ထိၚ်ဒဝ် ဂၠံၚ်ဇၞော် စၟတ် (၈) ဂှ်ရ ထ္ပက်မံၚ်ပၞာန် ဗွဲမသကာတ်မြဟ်တုဲ သီုဗပေၚ်လဝ်ဇြဟတ်ရ။ လၟုဟ်ဏံ ဇြဟတ်ဍေံတံ ၜိုတ် (၁၅၀) ပြၚ်နွံရ။ ကရောၚ်ပၞာန်ဂှ်တှေ် မွဲရ။ ဆဂး တန်တဴကဵုဗျူဟာပၞာန် ဍေံတံတုဲတှေ် ပါ်မံၚ် (၂၊ ၃) ကရောၚ်လေဝ်နွံရ။ ကရောၚ်ပၞာန်ဂှ်လေဝ် ကၠေံအာ မံက်အာ ဒှ်မံၚ်” သာ်ဝွံ မိတၠညာဏ် ဟီုရ။

ဟိုတ်ဂှ်ရ ပ္ဍဲသ္ကုတ်ဂၠံၚ်ဇၞော် စၟတ် (၈) ရေဝ် – ဇြပ်ဗု ကေုာံ ပွဳဗွိုၚ်ဒေသရေဝ်သၟဝ်ကျာဂှ် အခိၚ်ဟွံရုဲ ကတဵုဒှ်ပေဲါဗ္တိုက်မာန်ဂှ်ရ နကဵုညးဍုၚ်ကွာန်ဒေသတံ အာကၠုၚ်စွံသတိညိဂှ် လ္ပာ်ဒပ်ပၠန်ဂတးတံ ဟီုဂးဖ္တိုက်ဖၟောဝ်လဝ်ရ။

ပ္ဍဲကဵုပန်ဗ္တိုက်ထောံဖျေံမခတိုဟ် ပွိုၚ် (၅) တ္ၚဲ နူဂိတုအေဗရဴ (၉) စဵုကဵု (၁၆) ဂှ်ဝွံ ဒပ်ပံၚ်ကောံမဟာမိတ် ဒပ်ပၠန်ဂတးဍုၚ်မန် MSRF ၊ ဒပ်စဵုဒၞာညးဍုၚ်ကွာန်ရေဝ် YPDF ၊ တမ်ဒပ် (၉၀၁) ဒပ်မန်ရာမည RMA ၊ ဒပ်ပါ် (၁) တမ်ဒပ် (၂၇) KNLA ကေုာံ ဒပ်ပါ်တဝ်စၞေဟ် စၟတ် (၈၀၀၁) ဒပ်ဒမၠုက်ရေဝ် YGF ကဵု ဒပ်ပံၚ်ကောံကောဒေံစက်ဗရုသာဲ မန် – တၞၚ်သဳတံ ပံၚ်ကောံဗ္တိုက်လဝ်ရောၚ် ဂွံတီကေတ်ရ။