ပ္ဍဲကဵုဂၠံၚ်ဇၞော်လ္ဂုၚ်-မတ်မလီု၊ ဗဒဲါဆေၚ်အကံၚ်ကျိုက်၊ ဂကောံကွာန်နံၚ်ဘိုဝ်၊ ပွိုၚ်ဍုၚ်သဓီု၊ တွဵုရးဍုၚ်မန်ဝွံ ပ္ဍဲဂိတုအေဗရဴ စၟတ်တ္ၚဲ (၁၈) တုဲကၠုၚ်ဏံ ကတဵုဒှ်အာ ပရေၚ်ကွဳစက် တေက်ဇီုဂှ် ခၟဳသၚ် (၈) ဇကုပါလုပ်ကီု သီုဖအိုတ် ညးချိုတ်အာ စဵုကဵု (၁၃) တၠနွံရောၚ် ဂွံတီကေတ် နူဂကောံဟံၚ်ပြာ်မၞိဟ်တံရ။

ပ္ဍဲဂိတုအေဗရဴ စၟတ်တ္ၚဲ (၁၈) ၊ အခိၚ်သဝ်တ္ၚဲ ၜိုတ် (၄) နာဍဳကဝက် ကွဳစက် (မှန်လုံ) ဖ္ဍိုက်ညးအာတရဴ နူသဓီု ဒဳအာလ္ပာ်ၜဳက္လေၚ်ဂှ်ကဵု ကွဳစက်လ္ၚောဝ်ကျာ် Hiject ဒဳကၠုၚ်နူမွဲလ္ပာ်တေံဂှ် တေက်ဇီုဒးညးသ္ကံတဝ်တဝ်ရ။

ဟိုတ်နူကွဳစက်တေက်ဇီုဒးညးသ္ကံဂှ်ရ အပ္ဍဲကဵုညးဍိုက်ဗက်ကၠုၚ် ကွဳစက် Hiject ဂှ်မ္ဂး ခၟဳသၚ် (၈) ဇကု၊ ထပိုဲ (၁) ဇကု၊ ညးတြုံ (၄) တၠ သီုဖအိုတ် ချိုတ်အာ (၁၃) တၠရဂှ် ညးတာလျိုၚ်ဂကောံဟံၚ်ပြာ်မၞိဟ်တံ ဟီုရ။

“ပ္ဍဲကဵုပရူဒဒှ်ကွဳစက်ဇီုသဓီုဂှ်တှေ် ခၟဳသၚ် (၈) ဇကု၊ ထပိုဲ (၁) ဇကုကဵု မၞိဟ် (၄) တၠ ချိုတ်အာရ။ ညးဒးဘဲဝပ်တံလေဝ် ဒုၚ်ဝဳဝတ်မံၚ် ပ္ဍဲရုၚ်ဂဥုဲရ” သာ်ဝွံ ညးတာလျိုၚ်ဟံၚ်ပြာ်မၞိဟ်မွဲတၠဂှ် ဟီုရ။

ပ္ဍဲကဵုကွဳစက် Hiject ဂှ်ဝွံ ခၟဳသၚ် (၁၃) ဇကု၊ ထပိုဲ (၁) ဇကု ကေုာံ ညးတြုံ (၆) တၠ ဍိုက်ဗက်ကၠုၚ်ကီု ဂွံတီကေတ်ရ။

ဟိုတ်နူကွဳစက်တေက်ဇီုဂှ်ရ ညးဒးဘဲဝပ်ဂမၠိုၚ်တံဂှ် ဆက်ဒုၚ်လွဳလွတ်မံၚ် ပ္ဍဲရုၚ်ဂဥုဲဇၞော်သဓီုတုဲ ညးဒးဘဲဝပ်သ္ကာတ်မြဟ်လ္ၚဵုတံဂှ်လေဝ် ဆက်ပလံၚ်ဗ္စိုပ် ဒုၚ်လွဳလွတ်ဒၟံၚ် ပ္ဍဲရုၚ်ဂဥုဲဇၞော်လ္ဂုၚ်ရဂှ်လေဝ် ဂွံတီကေတ်ရ။

တုဲပၠန် ခၟဳသၚ်စဴအာသွဝ် (၈) ဇကု၊ ထပိုဲ (၁) ဇကုကဵု မၞိဟ်ချိုတ်အာ (၄) တၠတံဂှ် တ္ၚဲဏံ ဂိတုအေဗရဴ (၂၀) နူကဵုဘာတိုက်ၜိုပ်ထဝ်၊ ကွာန်ပဝ်တဝ်မူ၊ ပွိုၚ်ဍုၚ်သဓီုဂှ် ပလံၚ်ဗ္စိုပ် စံၚ်ဇွဇြဇုတ် ပ္ဍဲသုသာန်ကျံက်တာန်ဂှ်ရောၚ် ဂွံတီကေတ်ရ။

ညးချိုတ်အာ ဟိုတ်နူဘဲကွဳစက်တေက်ဇီုဂှ်ဝွံ ဒှ်ကောန်ဍုၚ်မတ်မလီုတုဲ ကၠာဟွံဂွံစိုပ်အခိၚ်အတးဂှ်ရ သ္ပလဝ် (ဒုလ္လဘ) ပ္ဍဲဘာလကျာ်ပဝ်တဝ်မူ၊ ပွိုၚ်ဍုၚ်သဓီုတုဲ အခိၚ်က္လေၚ်စဴနူလ္ၚောဝ်ကျာ်ဣသိယဵုဂှ် ကတဵုဒှ်အာ ပရူဒဒှ်ကွဳစက်တေက်ဇီုရ။

မၞိဟ်ဍိုက်ဗက်ကၠုၚ် ကွဳစက် (မှန်လုံ) ဖ္ဍိုက်ညးအာတရဴဂှ်ဝွံ ညးဒးဘဲဝပ်ဟွံမွဲရောၚ် ဂွံတီကေတ် နူဂကောံဟံၚ်ပြာ်မၞိဟ်တံရ။