သ္ကုတ်ဂၠံၚ်ဇၞော် စၟတ် (၈)၊ ဗိက်-ထဝဲါ၊ ရးတၞၚ်သဳဂှ်ဝွံ က္လေၚ်ကဵုလဝ်အခေါၚ်ကွဳစက်ဂမၠိုၚ် အာကၠုၚ်ကီုလေဝ် ပတေၚ်လဝ်ပရေၚ်စၟဳစၟတ်ဂှ်ရ ရံၚ်အကာဲအရာတုဲ ဒးအာကၠုၚ်ဒၟံၚ်ရောၚ် ညးဒေသကဵု ညးဒဳကွဳစက်တံ ဟီုရ။
အတိုၚ်ညးဒေသတံဟီုလဝ်ဂှ်မ္ဂး သ္ကုတ်ဂၠံၚ်ဗိက်-ထဝဲါ မတၟာတ်လဝ်ဂှ် စပ္တံနူဂိတုအေဗရဴ (၁၈) ဏံတုဲ လ္ပာ်ကမ္မယှေန်ပၞာန်တံ က္လေၚ်ပံက်ဏာဂှ်ရ ကွဳစက်ဂမၠိုၚ် အာကၠုၚ်ဒၟံၚ်ရောၚ် ဂးရ။
ညးတတ်အာကၠုၚ်တံဂှ်ဝွံ ဒးနွံကဵု လိက်ထံက်ဂလာန်ဌာန်ဒၟံၚ်ဇကု ကေုာံ လိက်ထံက်ဂလာန် ဒၞာဲမအာစိုပ်ဂှ်တုဲ ညးမအာကဵု ကွဳစက်ဒမြိပ်လာၚ်တံဂှ် စၟဳစၟတ်တေၚ်ဂြတ်ဒၟံၚ်ရောၚ် ညးဒေသ တီအကာဲအရာဂၠံၚ်ဍာန်မွဲတၠဂှ် ဟီုရ။
“အာကၠုၚ်ဂွံမံၚ်ရ။ ဆဂး ဖျေံစိုတ်ဟွံဂွံဏီပုဟ်။ ဆဠတှေ် ပရေၚ်ပန်ပှော်နွံမံၚ်ဖိုဟ်ရ။ သၟာန်သၟုက်ဂၠုၚ်ဍာန်တုဲမှ အာကၠုၚ်မံၚ်။ ပြဟ်ပြဟ်ဏံ ကွဳစက်ဒမြိပ်လာၚ်တံ အာကၠုၚ်မံၚ်ရ။ ပရေၚ်စၟဳစၟတ်နွံမံၚ်ရ။ တတ်နေဝ်ဟီုတှေ် ဒးကေတ်လိက်ထံက်ဂလာန် (၂) ရ။ ကာပူဂဵုဟီုတှေ် ဟွံစၟဳစၟတ်ကွေံပုဟ်” သာ်ဝွံ တမ်ရိုဟ်ပရိုၚ်လ္တူဂှ် ဂးရ။
သၟာၚ်နူဂှ်ပၠန် သ္ကုတ်ဂၠံၚ်ဗိက်-ထဝဲါဂှ် ကဵုအခေါၚ်အာကၠုၚ်ဒၟံၚ် စနူအခိၚ်ဂယး (၆) နာဍဳ စဵုကဵုသဝ်တ္ၚဲ (၆) နာဍဳကီုလေဝ် ယဝ်တတ်ကၠောံအာကၠုၚ် အပ္ဍဲပွိုၚ်ဍုၚ်ပုဠဝ်မ္ဂး စနူအခိၚ်ဂယး (၆) နာဍဳ စဵုကဵု (၁၀) နာဍဳဟေၚ် ကဵုလဝ်အခေါၚ်ရောၚ် ဂးရ။
လ္ပာ်ကမ္မယှေန်ပၞာန်တံဝွံ သၟာၚ်နူကဵုအခေါၚ်အာကၠုၚ်ဂှ်တုဲ ကၠောန်သ္ပဒၟံၚ် ပရေၚ်စၟဳစၟတ်ဂှ်ရ ကွဳစက်လ္ၚဵုတံ ဟွံဂံၚ်အာကၠုၚ်ဏီတုဲ ဒးမၚ်ရံၚ်ဒၟံၚ် အကာဲအရာရောၚ် ညးတြုံ နူဒေသဂှ်မွဲတၠ ဟီုရ။
“ဂၠံၚ်ဂှ်တှေ် အခိၚ်ဟွံရုဲ က္လေၚ်ကၟာတ်မာန်မံၚ်။ တုဲတှေ် လ္ပာ်ဒပ်ပၞာန်တံ ကၠောန်သ္ပမံၚ် ပရေၚ်စၟဳစၟတ်ရ။ ညးလ္ၚဵုတံဂှ်လေဝ် သွက်ဒးပလံၚ်ကပေါတ်နွံတှေ် ပလံၚ်မံၚ်ပြဟ်ပြဟ်ရ။ ဒးအာနွံတှေ် အာမံၚ်ဏောၚ် အဃောပံက်ဂၠံၚ်ဏံ။ ညးလ္ၚဵုတံလေဝ် ဖေက်တုဲ ဟွံဂံၚ်အာကၠုၚ်ဏီပုဟ်” သာ်ဝွံ ညးဟီုရ။
ဗွဲကြဴနူဂကောံကမ္မယှေန်ပၞာန်တံ က္လေၚ်ထိၚ်ဒဝ် ဗဒိုပ်ဒပ်ဝေန်ဝ မၞုံပ္ဍဲသ္ကုတ်ဂၠံၚ်ဗိက်-ထဝဲါတုဲဂှ် ရပ်ညးဒေသတံတုဲ သ္ပမံၚ်ပရေၚ်စဵုဒၞာ (ဒၞာတာ) ပသောၚ်တိဍာ် စဵုကဵုတ္ၚဲဏံရ။
နူကဵုဗဒိုပ်ဂှ် ဆက်ပန်မံၚ်လွဟ်ဇၞော်ဆဆဵု အဆက်ဆက်ဂှ်ရ ညးပဲါဒဴဘဲပၞာန်တံ ဟွံဂံၚ်စဴသ္ၚိဌာန်ဏီရ။
စပ္တံနူဂိတုဖေဖဝ်ဝါရဳ (၁၀) တုဲကၠုၚ်တေံတုဲ ဟိုတ်နူပေဲါဗ္တိုက်သီဗဒိုပ်ဝေန်ဝ အကြာကမ္မယှေန်ပၞာန်ကဵု ဂကောံဒပ်ပၠန်ဂတးတံဂှ်ရ နကဵုအကာဲအရာဂီုကၠီုတုဲ သ္ကုတ်ဂၠံၚ်ဗိက်-ထဝဲါဂှ် လ္ပာ်ဂကောံဒပ်ပၠန်ဂတးတံ တၟာတ်ထောံ အခေါၚ်တတ်ကၠောံအာကၠုၚ်ရ။
တုဲပၠန် စနူဂကောံပၠန်ဂတးတံ သီဂွံဗဒိုပ်ဝေန်ဝ ဂိတုမာတ် (၁၁) ဂှ်တုဲ စဵုကဵုအပ္ဍဲကာလ ဒးဗလးဏာတဲဏံ တၟာတ်ပံက်ဒၟံၚ်သ္ကုတ်ဂၠံၚ်ဂှ် ဟွံအောန်နူ (၃) ဝါရ။
အခိၚ်လၟုဟ်ဏံလေဝ် ပ္ဍဲကဵုမွဲဒမြိပ်သ္ကုတ်ဂၠံၚ်ကွာန် ဘဝ်ဓိကာန်-ညံၚ်ပေန်ကွေန်၊ ဍုၚ်တၞၚ်သဳ၊ ပွိုၚ်ဍုၚ်တၞၚ်သဳ ဗာန်လဝ်၊ (၅) မိုၚ်၊ (၆) မိုၚ် ကေုာံ ကွာန်ထုၚ်တဝ်ဂှ် ဒပ်ကမ္မယှေန်ပၞာန်တံ ကေတ်ဒၞာဲတြးလဝ်ဇြဟတ်တုဲ အခိၚ်ဟွံရုဲ ပေဲါဗ္တိုက်သ္ကာတ်မြဟ် မာန်ဂှ်ရ ညးဒေသတံ သွက်ဂွံပဲါဒဴအာ ဒၞာဲဂီုကၠီုတေံဂှ် လ္ပာ်ဒပ်ပၠန်ဂတးတံ ကဵုလဝ်သတိကီုရ။
