တမ်ဒပ် (ခမရ – ၅၈၃) ဖျေံသဇိုၚ်ကွာန်ဘာ၊ ပွိုၚ်ဍုၚ်ရေဝ်၊ တွဵုရးဍုၚ်မန်ဝွံ နူတနေံဏံ ဂိတုအေဗရဴ (၂၂)၊ အခိၚ်နူဂယးဂှ် ဂကောံလကိုဟ်ရေဝ်တံ လုပ်စိုပ်ဗ္တိုက်လဝ်ရောၚ် ဂွံတီကေတ် နူညးဒေသကဵု က္ဍိုပ်သ္ကိုပ်ဂကောံလကိုဟ်ရေဝ်ရ။
နူတနေံဏံ ဂိတုအေဗရဴ (၂၂)၊ အခိၚ်နူဂယး ၜိုတ် (၈) နာဍဳဂှ် လုပ်စိုပ်ဗ္တိုက်လဝ် တမ်ဒပ် (ခမရ – ၅၈၃) ဖျေံသဇိုၚ်ကွာန်ဘာ၊ မၞုံသၟဝ် (စကခ – ၁၉)၊ ပွိုၚ်ဍုၚ်ရေဝ်တုဲ ကတဵုဒှ်အာပေဲါဗ္တိုက်ၜါလ္ပာ် ၜိုတ်ကဝက်နာဍဳရ။
ဟိုတ်နူပေဲါဗ္တိုက်ဂှ်တုဲ ကောန်သ္ဂံၚ်ကမ္မယှေန်ပၞာန် (၂) တၠ ကေတ်လဝ်ဒၞာဲ ပ္ဍဲမ္ၚးသၞေဟ်ကၚ်ဂှ် ဒးဘဲဇီုကပိုက်မာန်ကီုလေဝ် သ္ပဒ္တန်ချိုတ်ချိုတ်ပၠိုတ်ပၠိုတ်ဟွံမာန်ဏီ က္ဍိုပ်သ္ကိုပ်ဂကောံလကိုဟ်ရေဝ် ချူဓမံက်လဝ် ပ္ဍဲမုက်လိက်ပရေၚ်မၞိဟ်ညးရ။
“နကဵုမေတ်ယှေန်ဟေၚ် ဗ္တိုက်ဏာ တမ်ဒပ် (ခမရ – ၅၈၃) ရဂှ်လေဝ်” က္ဍိုပ်သ္ကိုပ်ဂကောံလကိုဟ်ရေဝ် ဟီုကဵုဌာန်ပရိုၚ်ဗၠးၜးမန် IMNA ရ။
ဂကောံလကိုဟ်ရေဝ် လုပ်စိုပ်ဗ္တိုက်ဏာ တမ်ဒပ်ဂှ်တုဲဂှ် ပရေၚ်ဒးဘဲဇီုကပိုက်ဟၟဲမွဲသာ် က္လေၚ်ဆုတ်တိတ်ကၠုၚ်မာန်ရဂှ်လေဝ် ဂွံတီကေတ်ရ။
အဃောဂကောံလကိုဟ်ရေဝ် က္လေၚ်ဆုတ်တိတ်ဂှ်မ္ဂး နူကဵုဒပ်ကမ္မယှေန်ပၞာန်တံ က္လေၚ်ပန်ကဵုလွဟ်ဇၞော်ကီုရ။
ဟိုတ်နူပန်ကဵုလွဟ်ဇၞော်တုဲ ညးဒေသအာကၠုၚ်အကြာဂၠံၚ်ဍာန်တံ ဒးပဲါဒဴဒၞာဲဗၠးဘဲမွဲချိုန်ခဏတုဲ လ္ပာ်ကမ္မယှေန်ပၞာန်တံ တၟာတ်လဝ်ဂၠံၚ် ပွိုၚ်ကဝက်နာဍဳပြၚ်ဏီရ။
ညးဒေသရေဝ်မွဲတၠဂှ် “အခိၚ်လ္ပာ်လကိုဟ်ရေဝ်တံပန်ဂှ်တှေ် လ္ပာ်ဒပ်ကမ္မယှေန်ပၞာန်တံ က္လေၚ်ပန်ကဵုလွဟ်ဇၞော်ဏီရ။ ပိုဲတံလေဝ် ဒးပဲါထောံမွဲခဏရ။ ဟွံသေၚ်တှေ် ကြေပ်မံၚ်အကြာဏောၚ်။ တုဲတှေ် ဂၠံၚ်ဂှ်လေဝ် ကၟာတ်ထောံ ပွိုၚ်ကဝက်နာဍဳပြၚ်ပြၚ်ဏီရ။ တုဲမှ ဍေံတံ ဂွံက္လေၚ်ပံက်ကဵု” သာ်ဝွံ ဟီုရ။
ဗွဲကြဴနူတမ်ဒပ် (ခမရ – ၅၈၃) ဒးဒုၚ်ဗ္တိုက်တုဲဂှ် က္လေၚ်ဗပေၚ်လဝ်ဇြဟတ်ပၞာန်ဗွဲမဂၠိုၚ်တုဲ သီုပတေၚ်လဝ် ပရေၚ်ဂီုကၠီု၊ ဖျေံလဝ်ကၚ်ဏောၚ် ဂွံတီကေတ်ရ။
တမ်ဒပ် (ခမရ – ၅၉၁) ကေုာံ တမ်ဒပ် (ခမရ – ၅၈၃) ဖျေံသဇိုၚ်ကွာန်ဘာ၊ မၞုံသၟဝ်ဌာန်ဂအုပ်ကောပ်ကာဲပြုပြေၚ်ပၞာန် (စကခ – ၁၉) ဂှ်ဝွံ ပ္ဍဲသၞာံ (၂၀၂၆)၊ အပ္ဍဲပွိုၚ်ပိဂိတုဏံ နကဵုဒရုၚ်မေတ်ယှေန်ဂှ် နူဂကောံလကိုဟ်ရေဝ် ဗ္တိုက်လဝ်ဟွံအောန်နူ (၃) ဝါနွံရ။
ဂိတုအေဗရဴ စၟတ်တ္ၚဲ (၁၉) တုဲကၠုၚ်ဏံဂှ်လေဝ် တိုက်လွဟ်မၞုံသၟဝ်တမ်ဒပ် (စကခ – ၁၉) ဌာန်ဂအုပ်ကောပ်ကာဲပြုပြေၚ်ပၞာန် စၟတ် (၁၉) ဍုၚ်ရေဝ်ဂှ် ပၟတ်တူခတိုဟ်အာတုဲ ဟိုတ်နူပၟတ်တူခတိုဟ်လအ်ကဵုနာဍဳဂှ်ရ လွဟ်ဇၞော်၊ လွဟ်ဍောတ် ကေုာံ မကမ်ဗွဲမဂၠိုၚ် လီုလာ်တူအာပၟတ်ရ။
