ဟိုတ်နူဂမ္တဴဂၠိုၚ်တုဲ ကၠအ်သတ်ဆုဒေသလ္ၚဵုဂှ် ဍာ်ပလိုၚ်ဇတ်၊ ဍာ်ကၟာခြိုၚ်ဍာ် ဇတ်ဂၠိုၚ်ကၠုၚ်ဒၟံၚ် အရိုဟ်ဟ်သၞာံတုဲ ဍာ်ဒဴဒၟံၚ် လၟေၚ်အရိုဟ်ဟ်သၞာံရောၚ် တၠကၠအ်ဒူရေန် နူဍုၚ်ဇြပ်ဗုမွဲတၠ ဟီုရ။
ကၠအ်သတ်ဆုတအ်ဂှ် သွက်ဂွံစဝ်ဍာ်ကဵုတၞံဆုတအ်ဂှ် ၜံက်လဝ်ဍာ်ပလိုၚ်၊ ၜံက်ခါဲလဝ်ကၟာလေဝ် သၞာံဏံဂှ် ဍာ်ဇတ်ဂိကွေံကွေံရောၚ် တၠကၠအ်ဒူရေန်ဂှ် ဟီုဗီုဏံရ။
“ပ္ဍဲကၠအ်ဒူရေန်အဲဂှ် ၜံက်လဝ်သီုပလိုၚ် သီုကၟာ၊ သၞာံတုဲကၠုၚ် ၜိုတ် (၅) သၞာံသၚ်လ္ပာ်တေံတှေ် ရပ်သုၚ်စောဲရုမ်မံၚ်၊ နူတေံတုဲတှေ် မွဲသၞာံတှေ် ဇတ်ဂၠိုၚ်ညိ၊ အရိုဟ်ဟ်သၞာံဂှ် ဍာ်ဇတ်ဂၠိုၚ်ကၠုၚ်မံၚ်အရိုဟ်သၞာံ၊ အဵု စိုပ်သၞာံဏံဂှ် ဇတ်အိုတ်တး၊ ဍာ်ဇတ် အိုတ်တှေ် ဂွံစဝ်ဟဍာ်ကဵုတၞံသတ်ဆု၊ တၞံဒူရေန်ဂှ် ဍာ်ဟွံမွဲ ဒှ်ခက်ခုဲကွေံကွေံ၊ ၜိုတ်အဲသ္ပသမ္တီတှေ် ဍာ်ဒဴဒၟံၚ် အရိုဟ်ဟ်သၞာံဏောၚ်” သာ်ဝွံ နာဲသိုဝ်ဝေန် တၠကၠအ်ဒူရေန် နူဇြပ်ဗုဂှ် ဟီုရ။
ဒေသဍုၚ်မန်ဂှ် ဇၟာပ်စိုပ်အခိၚ်ကညၚ်ဂမ္တဴဏံမ္ဂး ဒေသဗွဲမဂၠိုၚ်ဂှ် ဍာ်ပလိုၚ်ဇတ်၊ ဍာ်ကၟာဇတ်တုဲ ဒှ်ခက်ခုဲကဵု ပရေၚ်သုၚ်စောဲဍာ် အရိုဟ်ဟ်သၞာံရ။
ဟိုတ်နူပရေၚ်ထိၚ်ဒဝ်ဂြိပ်ဆုသဘာဝဟွံမွဲတုဲ ဍာ်ဂှ် ဒဴအာဒၟံၚ် လၟေၚ်အရိုဟ်ဟ်သၞာံရောၚ်ဂှ်လေဝ် တၠကၠအ်ပၞဴ မွဲတၠပၠန်ဂှ် ဟီုဗီုဏံရ။
“ဍာ်ကဵု တၞံဆုဂှ် ဍေံမံၚ်ဒၟံၚ်မွဲစွံဏောၚ်၊ ဂြိပ်ဆု တၞံဆုဟွံမွဲတှေ် ဍာ်လေဝ် ဒဴကၠေံအာကီုရ၊ လၟုဟ်ဂှ် တၞံဆုဂှ်လေဝ် ဗာ်ထောံအိုတ်၊ ဂြိပ်ဆုဂှ်လေဝ် ကၠောန်ထောံကၠအ်အိုတ်ရတှေ် ဍာ်ဂှ် အလဵုဂွံမံၚ်ဒၟံၚ်ဏီ၊ ဍာ်ဒဴအာ အရိုဟ်ဟ်သၞာံရ၊ ဆဏံဟွံကဏီ ယဝ်ရ ဟွံထိၚ်ဒဝ် ဂြိုပ်ဆု တၞံဆုပုဟ်တှေ် ဍုၚ်မန်ဂှ် ဍာ်သွက်ဂွံကၠောဝ်နူလၟုဟ်ဏံဏီ” သာ်ဝွံ နာဲကျဳဝေန် တၠကၠအ်ပၞဴ နူပွိုၚ်ဍုၚ်ဇြပ်ဗုဂှ် ဟီုရ။
ပ္ဍဲဍုၚ်မန်ဝွံ ဍာ်ကြုၚ်၊ ဍာ်စောဝ်ဂမၠိုၚ်ဂှ် လၟေၚ်အရိုဟ်ဟ်သၞာံ ဒိုဟ်စှေ် (ဍောတ်တိုန်) ကၠုၚ်ဒၟံၚ်ဂှ်တုဲ တၞံဆု၊ ဂြိပ်ဆုဂမၠိုၚ်တအ်ဂှ်လေဝ် သရံၚ်သဂါတ်စှေ်အာအိုတ်ရ။
ဍာ်ကြုၚ်၊ ဍာ်စောဝ်လ္ဂောဝ် ပ္ဍဲဒေသတအ်ဂှ် ဟွံပလေဝ်ဂယိုဟ်ပတိုန်ဂှ်ကီု၊ တၞံဆု ဂြိုပ်ဆုတအ်ဂှ် ပရေၚ်ထိၚ်ဒဝ်ဟွံမွဲ ဗာ်စံၚ်ထောံအိုတ်ဂှ်တုဲ ဍာ်ဒေသဍုၚ်မန်ဂှ် မွဲသၞာံကဵုမွဲသၞာံ ဍာ်ဒဴအိုတ်တုဲ ဍာ်ကၠောဝ်ဂၠိုၚ်ကၠုၚ်ဒၟံၚ် အရိုဟ်ဟ်သၞာံရောၚ် ညးဍုၚ် မန်ဗွဲမဂၠိုၚ်တအ် ဟီုရ။
